Ani Nyɔŋmɔ Jwɛŋɔ Ohe?

Ani nilee yɛ mli akɛ David aaakpa gbɛ akɛ Nyɔŋmɔ aaajwɛŋ enɔ? Ani Nyɔŋmɔ jwɛŋɔ ohe? Mɛni hewɔ ewa kɛhã mɛi pii akɛ amɛaahe amɛye akɛ Nyɔŋmɔ ofe lɛ yɛ amɛhe miishɛɛ lɛ?

Yiŋtoo kome ji akɛ Nyɔŋmɔ nɔ kwɔ kwraa fe adesai. Akɛni Nyɔŋmɔ nɔ kwɔ waa hewɔ lɛ, jeŋmaji lɛ fɛɛ tamɔ “nu kuli yɛ blage he, ni abuɔ amɛ tamɔ mulu kuli ní kpɛtɛ ŋsɛni he.” (Yesaia 40:15) Ŋmɛnɛŋmɛnɛ beaŋ niŋmalɔ ko ni heee Nyɔŋmɔ nɔ eyeee lɛ ŋma akɛ “eji henɔwomɔ kpele akɛ aaahe aye akɛ Nyɔŋmɔ ko yɛ ni susuɔ nibii ni ofeɔ lɛ ahe.”

Mɛi komɛi hu susuɔ akɛ amɛ diɛŋtsɛ amɛnifeemɔ nii hewɔ lɛ, amɛsaaa mɛi ni esa akɛ Nyɔŋmɔ asusu amɛhe. Akɛ nɔkwɛmɔnɔ lɛ, nuu ko ni atsɛɔ lɛ Jim ni eye afii 40 kɛmiimɔ 60 lɛ kɛɛ akɛ: “Be fɛɛ be lɛ, misɔleɔ koni mafee mɔ ko ni he jɔ ni nyɛɔ eyeɔ ehe nɔ, shi etsɛɛɛ kɛkɛ lɛ mimli esaa efu ekoŋŋ. Naagbee lɛ, mimu sane naa akɛ mi ji mɔ ko ni feɔ nɔfɔŋ waa, ni no hewɔ ni Nyɔŋmɔ nyɛɛɛ aye abua mi lɛ.”

Ani Nyɔŋmɔ kɛ wɔteŋ jekɛ aahu akɛ enyɛɛɛ eye ebua wɔ? Te enuɔ he diɛŋtsɛ yɛ ebɔɔnii ni yeee emuu lɛ ahe ehãa tɛŋŋ? Kɛ́ Nyɔŋmɔ diɛŋtsɛ etsɔɔɔ wɔ ehe nii lɛ, adesa ko kwraa nyɛŋ awie ahã Nyɔŋmɔ ni ehã sanebimɔi nɛɛ ahetoo. Kɛ̃lɛ, Biblia lɛ, ni ji shɛɛ ni Nyɔŋmɔ jɛ mumɔ lɛ mli ekɛhã adesai lɛ maa nɔ mi ehãa wɔ akɛ, Nyɔŋmɔ jeee mɔ ko ni kɛ wɔteŋ jekɛ ní nyɛɛɛ asusu wɔhe. Biblia lɛ kɛɔ akɛ, “ekɛ wɔteŋ mɔ fɛɛ mɔ teŋ jekɛɛɛ.” (Bɔfoi lɛ Asaji 17:27) Yɛ saji ejwɛ ni nyiɛ sɛɛ lɛ amli lɛ, wɔbaasusu nɔ ni Nyɔŋmɔ kɛɔ wɔ ni tsɔɔ akɛ esusuɔ wɔteŋ mɔ fɛɛ mɔ he, kɛ bɔ ni ejie mɔ hesusumɔ kpo etsɔɔ adesai krokomɛi tamɔ bo nɔŋŋ lɛ he.