SANEYITSO LƐ MLITSƆƆMƆ | ANI SATAN YƐ LƐƐLƐŊ?
Ani Satan Yɛ Diɛŋtsɛ?
Amaga ko yɛ Madrid, ni yɔɔ Spain, ni miifee ŋwɛibɔfo Satan ni bɛ jeŋba ni aba lɛ shi lɛ he mfoniri
“Mida yɛ El Salvador. Kɛ́ migbo toi lɛ, mimami kɛɔ akɛ, ‘Abonsam miiba ebamɔ bo!’ Kɛkɛ lɛ mikɛɛ lɛ akɛ, ‘Hã ni eba!’ Miheɔ Nyɔŋmɔ nɔ miyeɔ shi jeee Satan.”—ROGELIO.
Ani okɛ gbekɛ nuu fioo nɛɛ ni atsɛɔ lɛ Rogelio lɛ kpãa gbee? Te susumɔi ni nyiɛ sɛɛ nɛɛ ateŋ nɔ ni nilee yɔɔ mli kɛhã bo lɛ?
Satan jeee mɔ ko ni yɔɔ diɛŋtsɛ; eji okadi ko kɛkɛ ni damɔ shi kɛhã nɔ fɔŋ.
Satan yɛ shihilɛ mli, shi ebɛ adesai ahe dekã.
Satan ji mumɔŋ bɔɔnɔ ko ni yɔɔ hewalɛ ni náa adesai anɔ hewalɛ waa.
Susumɔi nɛɛ ateŋ eko fɛɛ eko lɛ, mɛi akpekpei abɔ yɛ ni fĩɔ sɛɛ. Shi ani ehe miihia ni aná susumɔi nɛɛ ateŋ nɔ ni ja? Kɛ́ Satan bɛ shihilɛ mli lɛ, belɛ alaka mɛi ni heɔ yeɔ akɛ eji mɔ ko ni yɔɔ diɛŋtsɛ lɛ. Kɛ́ Satan yɛ shihilɛ mli shi ebɛ adesai ahe dekã lɛ, no lɛ yakatswaa mɛi kwɛɔ amɛhe nɔ jogbaŋŋ yɛ ehe loo amɛsheɔ lɛ gbeyei lɛ. Kɛ̃lɛ, kɛ́ Satan ji mɔ ko ni lakaa mɔ lɛ, no lɛ ehe yɛ oshara kwraa fe bɔ ni mɛi susuɔ.
Hã wɔsusu bɔ ni Ŋmalɛ Krɔŋkrɔŋ lɛ hãa sanebimɔi nɛɛ ahetoo lɛ he wɔkwɛa: Mɛni loo namɔ ji Satan—nɔ fɔŋ he okadi ko aloo mumɔŋ gbɔmɔ? Kɛ́ Satan ji gbɔmɔ lɛ, ani onaa akɛ ebaanyɛ eye bo awui? Kɛ́ nakai ni lɛ, mɛɛ gbɛ nɔ oootsɔ obu ohe kɛjɛ ehe?