SANEBIMƆI NI BIBLIA LƐ EHÃ HETOO
Mɛni hãa mɔ ko feɔ fɔlɔ kpakpa?
Ani otsɔseɔ obii lɛ ni amɛsumɔ Nyɔŋmɔ?
Kɛ́ wu kɛ ŋa sumɔɔ amɛhe ni amɛjieɔ bulɛ kpo amɛtsɔɔ amɛhe lɛ, ehãa miishɛɛ hiɔ shĩa lɛ ni efeɔ nɔkwɛmɔnɔ kpakpa kɛhãa bii. (Kolosebii 3:14, 19) Fɔlɔi kpakpai sumɔɔ amɛbii ni amɛjieɔ amɛyi, taakɛ Yehowa Nyɔŋmɔ jie e-Bi lɛ yi lɛ.—Kanemɔ Mateo 3:17.
Wɔŋwɛi Tsɛ lɛ boɔ etsuji atoi ni esusuɔ bɔ ni amɛnuɔ he amɛhãa lɛ he. Esa jogbaŋŋ akɛ fɔlɔi baakase Yehowa ni amɛbo nɔ ni amɛbii lɛ yɔɔ amɛ kɛɛmɔ lɛ toi. (Yakobo 1:19) Esa akɛ amɛsusu bɔ ni amɛbii lɛ nuɔ nii ahe amɛhãa kɛ nibii ni gbaa amɛnaa lɛ ahe.—Kanemɔ 4 Mose 11:11, 15.
Te ooofee tɛŋŋ otsɔse obii koni amɛdara kɛbatsɔmɔ onukpai kpakpai lɛ?
Akɛ fɔlɔ lɛ, oyɛ hegbɛ akɛ owoɔ obii lɛ mla. (Efesobii 6:1) Kasemɔ Nyɔŋmɔ. Akɛni Nyɔŋmɔ yɛ suɔmɔ kɛhã ebii lɛ hewɔ lɛ, kɛ́ ehã amɛ mla ko lɛ, etsɔɔ amɛ mli fitsofitso ni etsɔɔ amɛ nɔ ni baajɛ mli kɛba kɛ́ amɛgbo toi. (1 Mose 3:3) Yɛ nɔ najiaŋ ni ebaanyɛ mɛi anɔ ni amɛbo emlai lɛ atoi lɛ, etsɔɔ amɛ bɔ ni kɛ́ amɛfee nɔ ni ja lɛ amɛbaaná he sɛɛ.—Kanemɔ Yesaia 48:18, 19.
Hã efee oti ni ma ohiɛ akɛ obaatsɔse obii lɛ ni amɛsumɔ Nyɔŋmɔ. Kɛ́ ofee nakai lɛ, amɛbaanyɛ amɛkpɛ yiŋ ni ja kɛ́ obɛ amɛmasɛi po. Okɛ onifeemɔ atsɔɔ akɛ osumɔɔ Nyɔŋmɔ ní okɛfee nɔkwɛmɔnɔ ohã obii lɛ, taakɛ Nyɔŋmɔ feɔ lɛ.—Kanemɔ 5 Mose 6:5-7; Efesobii 4:32; 5:1.