Okpɔŋɔnɔtaralɔi Ejwɛ Lɛ Kɛ Bo

Amɛfamɔ kpo kɛ foi, ní amɛnajiashi miigbɛɛ! Bɔ ni Biblia lɛ wie okpɔŋɔi ejwɛ ni yɔɔ hewalɛ kɛ amɛnɔtaralɔi lɛ ahe lɛ hãa efeɔ tamɔ nɔ ni amɛmiifamɔ kpo kɛmiijɛ Biblia lɛ mli ní oona! Klɛŋklɛŋ okpɔŋɔ lɛ ji okpɔŋɔ yɛŋ​—enɔtalɔ lɛ ji maŋtsɛ hee ni awó, ni hiɛ yɔɔ nyam. Okpɔŋɔ kroko ni tsuɔ tamɔ lalilɛi nyiɛ esɛɛ kɛje kpo, ni mɔ ni ta enɔ lɛ jie toiŋjɔlɛ kɛje shikpɔŋ lɛ nɔ fɛɛ. Okpɔŋɔ ni ji etɛ nɔ je kpo kɛnyiɛ sɛɛ. Eji okpɔŋɔ diŋ tuu, ni mɔ ni ta enɔ lɛ hiɛ nsɛnii, ni be ni ejekpo lɛ, ajaje mɔbɔ sane ko akɛ niyenii ahe baasɛ̃ waa diɛŋtsɛ. Okpɔŋɔ ni ji ejwɛ lɛ hiɛ su ni ekwá loo esu tamɔ lamulu, ni eji okadi ni tsɔɔ akɛ helai kɛ gbele helai baamɔmɔ mɛi, ni Gbele diɛŋtsɛ ji mɔ ni ta nɔ. Ni Gbonyo Bu, ni ji mfonirifeemɔŋ gbonyo bu kome kɛhã adesai fɛɛ lɛ, nyiɛ esɛɛ kpaakpa, ni eegbe mɛi babaoo!​—Kpojiemɔ 6:1-8.

“Be klɛŋklɛŋ ni mikane okpɔŋɔnɔtaralɔi ejwɛ lɛ ahe sane lɛ, gbeyei mɔ mi waa. Mi nu he akɛ Kojomɔ Gbi lɛ miiba, ni akɛni mifeko klalo hewɔ lɛ, ahereŋ miyiwala.”​—Crystal.

“No mli lɛ, miisumɔ ni male okpɔŋɔnɔtaralɔi ejwɛ lɛ ni tara okpɔŋɔi ni hiɛ sui srɔtoi lɛ anɔ lɛ ahe sane. Shi be ni mibanu ninaa lɛ shishi lɛ, mibana nɔ ni amɛdamɔ shi kɛhã diɛŋtsɛ.”​—Ed.

Ani onuɔ he tamɔ bɔ ni Crystal nu he be ni ekane okpɔŋɔnɔtaralɔi ejwɛ lɛ ahe sane yɛ Kpojiemɔ wolo lɛ mli lɛ? Aloo onuɔ he tamɔ Ed nu he lɛ? Ekɔɔɔ he eko bɔ ni onuɔ he ohãa lɛ, okpɔŋɔnɔtaralɔi ejwɛ lɛ ahe sane lɛ fata saji ni ale waa yɛ Kpojiemɔ wolo lɛ, ni ji naagbee wolo ni yɔɔ Biblia lɛ mli lɛ he. Ani ole akɛ kɛ́ onu ninaa nɛɛ shishi lɛ, obaanyɛ oná he sɛɛ waa? Mɛɛ gbɛ nɔ obaanyɛ oná he sɛɛ? Nyɔŋmɔ ewo shi akɛ, kɛ́ okane nibii ni aŋma yɛ nakai gbalɛ wolo lɛ mli, ni okase, ni ohi shi yɛ naa lɛ, obaaná miishɛɛ waa.​—Kpojiemɔ 1:1-3.

Eyɛ mli akɛ mɛi komɛi sheɔ ninaa ni kɔɔ okpɔŋɔnɔtaralɔi ejwɛ lɛ he lɛ gbeyei moŋ, shi ejeee nɔ ko ni akɛhã koni akɛwo wɔ he gbeyei. Anɔkwa, mɛi akpekpei abɔ ena akɛ ninaa nɛɛ woɔ amɛhemɔkɛyeli lɛ mli hewalɛ, ni ehãa amɛnáa hiɛnɔkamɔ akɛ, wɔsɛɛ lɛ, amɛbaaná shihilɛ kpakpa. Bo hu ebaanyɛ efee nakai nɔŋŋ ehã bo! Sane ni nyiɛ sɛɛ lɛ baahã ona nɔ hewɔ.