Ani Ole?

Mɛni hewɔ eja gbɛ akɛ Yesu tsɛ mɛi ni hɔ̃ɔ kooloi yɛ Yerusalem sɔlemɔwe lɛ “ojotswalɔi” lɛ?

MATEO SANEKPAKPA lɛ bɔ amaniɛ akɛ: “Yesu bote sɔlemɔwe lɛ ni eyashwie mɛi ni hɔ̃ɔ nii kɛ mɛi ni heɔ nii yɛ sɔlemɔwe lɛ, ni etsirɛ shika tsakelɔi lɛ akpɔlɔi lɛ kɛ mɛi ni hɔ̃ɔ okpoi lɛ asɛii lɛ etswiatswiaa shi. Ni ekɛɛ amɛ akɛ: ‘Aŋma akɛ, “Abaatsɛ mishĩa lɛ sɔlemɔ shĩa,” shi nyɛ lɛ, nyɛkɛmiifee ojotswalɔi atɛkplo.’”​—Mat. 21:12, 13.

Yudafoi lɛ ayinɔsaji ni aŋmala ashwie shi lɛ hãa wɔnaa akɛ, mɛi ni hɔ̃ɔ nii yɛ sɔlemɔwe lɛ shishiu amɛnihelɔi lɛ waa, ejaakɛ amɛnibii lɛ ajara wala kwraa tsɔ. Akɛ nɔkwɛmɔnɔ lɛ, wɔle akɛ yɛ blema lɛ, okpoi ajara waaa, ni no hewɔ lɛ, ohiafoi kɛ nomɛi fɔɔ afɔleshãa. Shi Yudafoi lɛ ablema woji komɛi kɛɔ akɛ, yɛ klɛŋklɛŋ afii 100 lɛ mli lɛ, okpoi ajara bawa aahu akɛ, kɛ́ mɔ ko hiɛ shika denar kome lɛ, okpoi enyɔ pɛ ebaaná. Enɛ feɔ nyɔmɔ ni abaawo apaafonyo ko kɛji etsu nii gbii 25 sɔŋŋ. No ji, okpoi ajara bawa aahu akɛ ohiafoi nyɛɛɛ ahe dɔŋŋ. (3 Mose 1:14; 5:7; 12:6-8) Enɛ wo Rabbi Simeon ben Gamaliel mli la aahu akɛ, etse afɔlei abɔ ni abiɔ ni Yudafonyo fɛɛ Yudafonyo ashã lɛ nɔ. Be ni efee nakai lɛ, okpoi lɛ ajara ba shi amrɔ nɔŋŋ bɔ ni kɛ́ ohiɛ tsutsu jara lɛ oha mlijaa ekome po kɛkɛ lɛ, obaanyɛ ohe.

Enɛ hãa wɔnaa faŋŋ akɛ, mɛi ni hɔ̃ɔ nii yɛ sɔlemɔwe lɛ shishiu nihelɔi lɛ ni amɛye amɛ amim. No hewɔ lɛ, eja gbɛ akɛ Yesu tsɛ amɛ “ojotswalɔi.”