Wɔ Hiɛnɔkamɔi Ni Jara Wa Waa Lɛ
1 Kwɛ bɔ ni Yehowa sɔɔmɔ lɛ jara wa waa kɛha wɔ! Eji wɔhiɛnɔkamɔ ni hiɛdɔɔ yɔɔ mli akɛ wɔɔhi shi kɛya naanɔ ni wɔjie Yehowa wɔ-Bɔlɔ kpeteŋkpele lɛ yi. (Mika 4:5) Nɛkɛ hiɛnɔkamɔ ni ma shi shiŋŋ nɛɛ wajeɔ wɔ kɛtsɔɔ naagbai fɛɛ mli.
2 Abonsam kɛ edaimonioi lɛ baafee nɔ fɛɛ nɔ ni amɛaanyɛ ni amɛkɛshɔ nɛkɛ nyɔmɔwoo nɛɛ kɛjɛ wɔdɛŋ. Amɛkɛ gbɛtsii nii loo pampii sɔrɔtoi baashwie wɔgbɛ nɔ, shi esaaa akɛ “amanehulu” ni ŋmɛnɛŋmɛnɛ ehaa wɔnɔ lɛ haa mɔ ko nijiaŋ jeɔ wui.—Bɔfoi 14:22.
3 Wɔ Nuŋtsɔ Yesu Kristo to etsui shi yɛ sɛŋmɔtso nɔ yɛ “nyamɔ ni ka ehiɛ lɛ hewɔ.” (Heb. 12:2) No hewɔ lɛ, yɛ be mli ni nyɛsusuɔ Yehowa shiwoo ni hi fe fɛɛ kɛha wɔsɛɛ be lɛ he lɛ, eba akɛ amɛmlibaa he miishɛɛ ni nyɛyɔɔ lɛ aaaya nɔ awaje nyɛ yɛ kaa ŋmɛlɛtswaa nɛɛ mli.
4 Anyɛ Kristofoi anɔkwafoi yɛ yinɔsane be fɛɛ mli yɛ Kristo gbɛi lɛ hewɔ. (Mateo 24:9) Amanehulu fɛɛ amanehulu ni gbɛjianɔtoo nɛɛ kɛaaba wɔnɔ akɛ aŋkroaŋkroi loo akɛ gbɛjianɔtoo loo asafo lɛ, wɔbaafee jogbaŋŋ akɛ wɔkɛ bɔfo Paulo ni lɛ hu ena amanehulu babaoo yɛ sanekpakpa lɛ hewɔ lɛ wiemɔi nɛɛ aaato wɔtsui mli. Kwɛ bɔ ni ewiemɔi ni yɔɔ 1 Korintobii 10:13 lɛ shɛjeɔ wɔmii ehaa: “Kaa ko bako nyɛnɔ ni jeee gbɔmɔ he nɔ; shi anɔkwafo ji Nyɔŋmɔ, mɔ ni haŋ aka nyɛ fe bɔ ni nyɛaanyɛ, shi moŋ ekɛ kaa lɛ nɔŋŋ aaaje gbɛ aha nyɛ ni nyɛje mli hu, koni nyɛnyɛ mli nyɛmɔ.”
5 Enɛ tsɔɔ akɛ he ko bɛ ni nɔ ko bɛ ni baanyɛ akumɔ anɔkwa Kristofoi. Nɔ fɛɛ nɔ ni Yehowa ŋmɛɔ gbɛ lɛ, ele akɛ wɔbaanyɛ wɔdamɔ naa. No hewɔ lɛ wɔmiisumɔ ni wɔto wɔtsui shi. Kɛfata he lɛ, eŋmɛŋ gbɛ ni nɔ ko ni fe wɔhewalɛ aba wɔnɔ. No hewɔ lɛ, ehe miihia ni Nyɔŋmɔ webii fɛɛ ana jwɛŋmɔ kpakpa diɛŋtsɛ eyɛ mli akɛ wɔnaa wɔhe yɛ naatsii ashishi. Shi wɔle akɛ yɛ be mli ni wɔyaa nɔ akɛ anɔkwafoi lɛ, yɛ Yehowa duromɔ naa lɛ, wɔhiɛnɔkamɔ ni jara wa waa akɛ wɔɔhi shi kɛya naanɔ koni wɔya nɔ wɔjie Yehowa yi lɛ baaba mli anɔkwale.
6 No hewɔ lɛ, esa akɛ teemɔŋ nikasemɔ kɛ sɔlemɔ afee wɔ shihilɛ mli nibii ni anyɛɛɛ ajie kɛjɛ wɔhe yɛ be mli ni wɔbɔɔ mɔdɛŋ ni wɔhi shi yɛ wɔ gbɛi akɛ Yehowa Odasefoi Kristofoi lɛ naa lɛ.