Sanebimɔ He

● Te wɔɔfee tɛŋŋ wɔjie Kristofoi asu kpo yɛ be mli ni wɔyaa Asafo Woloŋ Nikasemɔ?

Wɔ akutseiaŋbii naa wɔ, ni yɛ bei komɛi amli lɛ amɛbaawie ni amɛbaafee nɔ ko po yɛ wɔjeŋba he. (Okɛto 1 Korintobii 4:9 he.) Akɛ Yehowa tsuji lɛ, wɔmiisumɔ ni amɛwiemɔi kɛ amɛnifeemɔi yɛ wɔjeŋba he lɛ afee nɔ ni yɔɔ fɛo. (1 Pet. 2:12) Enɛ ji anɔkwale yɛ wɔ nifeemɔ yɛ Asafo Woloŋ Nikasemɔ lɛ shishi. Akɛni afeɔ nɔ ni fa yɛ mɛi ashia amli hewɔ lɛ, esa akɛ wɔkwɛ jogbaŋŋ koni wɔjie subaŋ kpakpa kpo yɛ nɔ fɛɛ nɔ ni wɔfeɔ lɛ mli. Kɛ he ni akɛ tsɔnei baamamɔ lɛ edaaa lɛ, mɛni hewɔ nyɛbuaaa nyɛhe naa koni nyɛtara kar fioo ko pɛ mli koni nyɛkɛgba akutso ni nyɛyaa woloŋ nikasemɔ yɛ mli lɛ mlibii lɛ anaa? Suɔmɔ ni wɔyɔɔ kɛhaa wɔ akutsoŋbii lɛ baatsi wɔ gbɛ koni wɔkashi wɔ kar sɔrɔtoi lɛ wɔmamɔ shi kɛkɛ bɔ ni ebaanyɛ egba wɔ akutseiaŋbii lɛ naa.

Wɔmii shɛɔ wɔhe kɛ wɔkpe yɛ he fɛɛ he, ni enɛ haa wɔgbaa saji waa dani kpee lɛ jeɔ shishi kɛ esɛɛ fɛɛ. (Mika 2:12) Jeŋba kpakpa kɛ mɛi krokomɛi ahesusumɔ biɔ ni wɔha wɔsanegbaa lɛ naa aba shi ni ekafee hoo tsɔ yɛ he ni wɔyɔɔ lɛ.(Mat. 7:​12; Gal. 6:10) Kristofoi asuɔmɔ hu baanyɛ wɔnɔ koni wɔtsi wɔbii anaa koni amɛkajo foi kɛmiiya kɛmiiba ni amɛfite mɛi krokomɛi anibii. (Abɛi 29:​15;1Kor.13:​4,5) Nɔ ni baafata enɛ he ji jeŋba ni tsɔɔ bulɛ yɛ shia ni afeɔ nikasemɔ lɛ yɛ mli lɛ. Kɛ ajie subaŋ ko ni esaaa kpo lɛ, esaaa akɛ onukpai lɛ shashaoɔ shi yɛ kamɔ loo wiemɔ-kɛtsɔɔmɔ ni suɔmɔ yɔɔ mli ni akɛaaha lɛ mli koni naagba ko akate shi ni nɔ ni baanyɛ ajɛ mli aba ji wiemɔ ni akutseiaŋbii lɛ aaawie, aloo naagba ni baaba shiatsɛ ni here wɔ gbɔ ni egbele eshia eha nikasemɔ lɛ nɔ, aloo ni eeegba mɛi ni yaa woloŋ nikasemɔ yɛ he ko pɔtɛɛ Iɛ anaa.