Sanebimɔ He

● Ani esa akɛ nyɛmimɛi yei kɛ wiemɔ ni ji “Taakɛ Buu-Mɔɔ lɛ tsɔɔ lɛ . . . ” atsɔ amɛwiemɔ hiɛ yɛ asafoŋ kpeei ashishi be fɛɛ be?

Etamɔ nɔ ni enɛ efee nɔ ko ni eka yɛ nɔ ni atsɔɔ yɛ March 15, 1964 Watchtower lɛ mli ni eyitso ji “Kristofonyo Yoo lɛ Hegbɛi” lɛ shishi ni ayanuuu jogbaŋŋ lɛ hewɔ.

Yɛ Watchtower lɛ baafa 180 lɛ, etsɛ wiemɔ ni yɔɔ 1 Timoteo 2:​11, 12 ni kɛɔ akɛ: “Yoo afee dioo ni ekase nii yɛ toiboo fɛɛ mli; shi mihaaa yoo hegbɛ akɛ etsɔɔ nii aloo eye nuu nɔ, shi moŋ efee dioo.” Nɔ ni atsɛ yisɛɛ hu ji 1 Korintobii 14:​33, 34 ni kɛɔ akɛ: “Taakɛ bɔ ni eyɔɔ yɛ hetselɔi asafoi lɛ fɛɛ mli lɛ, nyɛhaa yei lɛ afea dioo yɛ asafoi lɛ amli, ejaakɛ aŋmɛɛɛ amɛ gbɛ ni amɛwie, shi moŋ amɛba amɛhe shi.”

Watchtower lɛ bi yɛ kuku ni nyiɛ sɛɛ lɛ mli akɛ: “Ani enɛ tsɔɔ akɛ yoo nyɛŋ awie kɔkɔɔkɔ yɛ asafoŋ kpee shishi?” Eha hetoo akɛ: “Dabi, jeee nakai atsɔɔ lɛ. Yɛ blema bei lɛ amli lɛ yei kɛ agbɛnɛ hii fɛɛ nine shɛ mumɔ krɔŋkrɔŋ lɛ nikeenii anɔ, ni lilɛii sɔrɔtoi kɛ gbalɛ fata he, ni enɛ baabi ni amɛwie yɛ asafo lɛ mli. No hewɔ lɛ mɛɛ shishinumɔ naa ‘amɛbafee dioo yɛ asafo lɛ mli yɛ? Eka shi faŋŋ akɛ yɛ nɔ ni amɛwiemɔ baatsɔɔ akɛ amɛbaaa amɛhe shi lɛ mli. No hewɔ lɛ anaŋ ni nyɛmiyoo ko kɛ nyɛmimɛi hii miije ŋwane yɛ mɛi ateŋ ni eewie eeshi amɛ, kɛ yɛ kpee ko shishi loo yɛ asafo lɛ mlibii komɛi ateŋ yɛ bei krokomɛi amli. . . . Kɛ yoo ko yɛ sanebimɔ ko yɛ sane ni nuu ni yɔɔ asafo lɛ mli lɛ ewie he lɛ, belɛ esa akɛ ebi ewu yɛ shia.​—1 Kor. 14:​35.”

Nɛkɛ sane mlitsɔɔmɔ nɛɛ hewɔ ni Watchtower lɛ tee nɔ ekɛɛ akɛ: “Enɛ etsɔɔɔ akɛ ehe miihia ni eta shi ni efee dioo kwraa. Akɛ nɔkwɛmɔ nɔ lɛ, yɛ asafoŋ kpeei ashishi lɛ, yei ni amɛjɔɔ amɛhe nɔ lɛ baanyɛ aha sanebimɔi ni akɛfɔɔ asafo lɛ hiɛ yɛ be mli ni akaseɔ nii ni atsɔɔ jwɛŋmɔ lɛ ahetoo, ni yɛ nakai feemɔ mli lɛ, amɛfeɔ babaoo amɛkɛtswaa mɛi ni eba kpee lɛ shishi lɛ fɛɛ amɛmaa shi yɛ miishɛɛ mli.”

Agbɛnɛ hu kadimɔ nɔ ni nyiɛ sɛɛ nɛɛ jogbaŋŋ yɛ baafa 181 lɛ: “Kɛ nyɛminuu ko ha sane hetoo ko ni ejaaa yɛ kpee lɛ shishi, yɛ Buu-Mɔɔ nikasemɔ mli nɛkɛ lɛ, enɛ biii ni kɛ atsɛ nyɛmiyoo lɛ ni enyiɛ sɛɛ nakai nɔŋŋ ni eha ewiemɔ lɛ kɛ hetoo ni ejaaa lɛ akpa gbee. Ni asaŋ etsɔŋ ehetoo lɛ loo egbee nɔ ewieŋ eshiŋ nyɛminuu lɛ hetoo lɛ. Ekɛ ŋaa baatsɛ nɔ ni Buu-Mɔɔ lɛ diɛŋtsɛ ewie ni kɔɔ sane lɛ he lɛ sɛɛ, ekolɛ ebaanyɛ ekɛ nɛkɛ wiemɔi nɛɛ atsɔ ehetoo lɛ hiɛ: ‘Eyɛ miishɛɛ akɛ aaakadi nɔ ni kuku ni wɔkaseɔ he nii nɛɛ kɛɔ lɛ . . . ’ Shi kɛji akɛ nyɛmimɛi hii ni amɛdara yɛ mumɔŋ yɛ jɛmɛ lɛ, ebaahi jogbaŋŋ moŋ akɛ nikasemɔ nɔkwɛlɔ lɛ aaatsɛ nyɛminuu ko ni eha hetoo kɛ ana akɛ hetoo lɛ ejaaa lɛ, koni amɛtsɔɔ sane lɛ mli lolo ni ehe aba sɛɛnamɔ aha mɔ fɛɛ mɔ, koni enɛ akwa hiɛgbelewoo.”

Wɔbaanyɛ wɔna kɛjɛ nɔ ni yɔɔ yiteŋgbɛ nɛɛ mli akɛ Buu-Mɔɔ lɛ kɛ mla ko efɔɔɔ shi ehaaa nyɛmimɛi yei lɛ akɛ be fɛɛ be lɛ amɛkɛ wiemɔi ni akadi loo ato naa aje amɛwiemɔ shishi. Yɛ be mli ni nyɛmiyoo ko ena akɛ ehetoo lɛ baate shi awo hetoo ni ejaaa ni nyɛminuu ko kɛha lɛ pɛ awoɔ lɛ ŋaa ni ekɛ wiemɔ ni tsɔɔ akɛ eetsɛ nɔ ni nikasemɔ lɛ kɛɔ lɛ yisɛɛ shi jeee akɛ eewie eeshi nyɛminuu lɛ wiemɔi lɛ atsu nii. Yɛ anɔkwale mli lɛ shihilɛi ni tamɔ nɛkɛ eteŋ shi tsɔ kɛji akɛ mɛi ni kwɛɔ kpeei lɛ anɔ lɛ, baatse nyɛminuu kroko ni yɔɔ asafo lɛ mli ni eha hetoo ni ja lɛ moŋ fe ni eeetsɛ nyɛmiyoo ko ni ekɛ nakai hetoo ni ja lɛ aba.

Wɔbaasumɔ ni wɔkɛfata he hu akɛ, niiashikpamɔ etsɔɔ akɛ gbɛ ni hi fe fɛɛ ni nikasemɔ nɔkwɛlɔ lɛ baatsɔ nɔ ajaje hetoo ni ejaaa lɛ ji ni eeetsɔ sanebimɔi krokomɛi anɔ ni ekɛye ebua mɔ ni ha hetoo ni ejaaa lɛ koni lɛ diɛŋtsɛ ejaje loo ekɛ hetoo ni ja lɛ aba. Kɛ enɛ yeee ebuaaa lɛ, nikasemɔ nɔkwɛlɔ lɛ diɛŋtsɛ kɛ hetoo ni ja lɛ aba. Enɛ wooo mɔ ko hiɛgbele.