Sanebimɔ He
● Beni Kpokpaa Nɔkwɛlɔ Lɛ Saraa Nyɛ Lɛ
1 Mɛɛ gbɛjianɔtoo esa akɛ anyiɛ sɛɛ yɛ be mli ni afeɔ kpee krɛdɛɛ ni Asafo Woloŋ Nikasemɔ lɛ fata he yɛ kpokpaa nɔkwɛlɔ lɛ saramɔ otsi lɛ mli lɛ?
2 Yɛ kpokpaa nɔkwɛlɔ lɛ saramɔ be lɛ mli lɛ, atoɔ gbɛjianɔ koni asafo muu lɛ fɛɛ akpe yɛ Maŋtsɛyeli Asa lɛ nɔ kɛha kpee krɛdɛɛ ni Asafo Woloŋ Nikasemɔ lɛ fata he, kɛ Ŋmalɛ naa kɛ asafoŋ gbɛjianɔtoo he susumɔ ni eyitso ji “Yaa nɔ yɛ Nibii ni Okase lɛ Amli,” kɛ sɔɔmɔ wiemɔ ni kpokpaa nɔkwɛlɔ lɛ baaha. Asumɔɔ ni afee nɛkɛ kpee nɛɛ yɛ Soo loo Sohaa gbɛkɛ mli.
3 Akɛ lala kɛ sɔlemɔ jeɔ kpee lɛ shishi, kɛkɛ lɛ onukpai lɛ ateŋ mɔ kome kɛ minitii 45 ekwɛ Asafo Woloŋ Nikasemɔ lɛ nɔ. Esa akɛ abɔ mɔdɛŋ ni akase nɔ ni ato akɛ esa akɛ akase yɛ otsi lɛ mli lɛ fɛɛ, ni akane kukuji lɛ fɛɛ, taakɛ afɔɔ feemɔ yɛ daa otsi nikasemɔ lɛ shishi lɛ. Nɔ ni nyiɛɔ Asafo Woloŋ Nikasemɔ lɛ sɛɛ ji Maŋtsɛyeli lala kroko ni alaa. Kɛkɛ lɛ kpokpaa nɔkwɛlɔ lɛ kɛ minitii 30 baatsu kpee lɛ fa ni ji “Yaa nɔ yɛ Nibii ni Okase lɛ Amli” lɛ he nii. Yɛ no sɛɛ lɛ ekɛ minitii 30 baaha sɔɔmɔ wiemɔ ni kɔɔ asafo ni asɔmɔɔ amɛ lɛ hiamɔ nii ahe. Ekɛ yijiemɔ ni sa baaha yɛ sɔɔmɔ wiemɔ lɛ mli kɛ ŋaawoo hu ni baatswa asafo lɛ ama shi ni ewo nyɛmimɛi lɛ hewalɛ ni amɛfi shi shiŋŋ yɛ Maŋtsɛyeli sɔɔmɔ lɛ mli.
4 Akɛ kpee lɛ baa naagbee kɛ lala kɛ sɔlemɔ. Kpokpaa nɔkwɛlɔ lɛ ji mɔ ni baahala lalai ni abaala lɛ fɛɛ. Esaaa akɛ kpee lɛ, ni lalai kɛ sɔlemɔi fata he lɛ tekeɔ ŋmlɛtswai enyɔ.
5 Nɛkɛ gbɛjianɔtoo nɛɛ ni aje shishi yɛ 1977 mli lɛ eye ebua, ni eha kpokpaa nɔkwɛlɔ lɛ saramɔ lɛ efee nɔ ko krɛdɛɛ ni asafo muu lɛ fɛɛ nyaa he ni ehe baa sɛɛnamɔ hu kɛhaa asafo muu lɛ kɛ aŋkroaŋkroi fɛɛ. Amrɔ nɛɛ, yɛ naatsii lɛ hewɔ lɛ, ekolɛ anyɛŋ atsu gbɛjianɔtoo nɛɛ he nii yɛ asafo fɛɛ asafo mli. Shi kɛ ajie naatsii lɛ, ni wɔsɔleɔ hu akɛ ebalɛ nakai lɛ, asafoi lɛ fɛɛ baanyɛ atsu Yehowa asafo lɛ gbɛjianɔtoo kpakpa nɛɛ he nii kɛmɔ shi.