Nyɛshia Kpe Ni Nyɛhia Akaa Shi
1 Akɛni je lɛŋ shihilɛ miitsake oyayaayai hewɔ lɛ, kwɛ bɔ ni kpokpaa nɔ kpee kɛha 1991 lɛ yitso ni ji “Nyɛshia Kpe ni Nyɛhiɛ Akaa Shi” lɛ sa jogbaŋŋ ha. (1 Tes. 5:6) Wɔ fɛɛ wɔbaanyɛ wɔkpa mumɔŋ nibii kpakpai ni ato he gbɛjianɔ lɛ gbɛ, ni akɛ ehe saji ni he hiaa lɛ baamaje nyɛ yɛ be ni sa mli.
2 Saji otii ni yɔɔ gbɛjianɔtoo lɛ mli lɛ ekomɛi ji wiemɔ ko ni mɛi ejwɛ baatsara nɔ amɛha ni ato he gbɛjianɔ bɔni afee ni eye ebua wɔ ni ‘wɔhiɛ aka shi yɛ nii fɛɛ mli’ lɛ. (2 Tim. 4:5) Yɛ bɔ ni ekolɛ wɔhi shi yɛ tsutsu ni hiɛshikamɔ bɛ mli lɛ hewɔ lɛ, mɛɛ gbɛ nɔ wɔɔtsɔ amrɔ nɛɛ koni wɔjo Satan ŋaatsɔi lɛ anaa foi ni wɔwuu wɔshi je lɛŋ mumɔ lɛ hu? Bɔɔ mɔdɛŋ koni nɛkɛ sane ni he hiaa waa nɛɛ akaŋmɛɛ bo. Abaagbala wɔjwɛŋmɔ hu kɛba ŋaawoo ni anyɛɔ atsuɔ he nii ni yɔɔ Questions Young People Ask—Answers That Work wolo lɛ mli lɛ nɔ yɛ wiemɔ lɛ mli. Aawo obalaŋtai kɛ fɔlɔi lɛ titri hewalɛ koni amɛkane wolo nɛɛ jogbaŋŋ, kɛji amɛfeko nakai momo lɛ. Aawo fɔlɔi lɛ ahewalɛ ni amɛkɛ amɛbii lɛ asusu emli saji lɛ ahe jogbaŋŋ yɛ bei fɛɛ mli. Taakɛ afeɔ daa lɛ, abaato gbɛjianɔ kɛha baptisimɔ yɛ kpokpaa nɔ kpee lɛ shishi. Mɛi ni shweɔ akɛ amɛbaafee amɛhenɔjɔɔmɔ lɛ he okadi yɛ kpokpaa nɔ kpee lɛ shishi lɛ atsɔ hiɛ amɛtswa onukpai asɛinɔtalɔ lɛ adafi mra.
3 Abaafee nɔkwɛmɔ nii pii hu atsɔɔ, ni akɛbaatsɔɔ bɔ ni wɔɔfee wɔna jaramɔ shihilɛi ni baa wɔnɔ, ni wɔ diɛŋtsɛ wɔtɔmɔi fata he lɛ ahe sɛɛ. Maŋshiɛmɔ ni abaaha lɛ yitso ji “Ni Wɔkɛ Nilee Aaatsu Nii yɛ Jeŋ ni Hiɛshikamɔ Bɛ Mli lɛ Mli.” Esa akɛ Maŋtsɛyeli shiɛlɔi kɛ mɛi fɛɛ ni yɔɔ wiemɔ lɛ he miishɛɛ lɛ abɔ mɔdɛŋ ni amɛhi kpee lɛ shishi.
4 Akɛni shihilɛ mli nɔnyɛi lɛ miiya nɔ eefa hewɔ lɛ, wɔheɔ wɔyeɔ akɛ mɛi fɛɛ baana sɛɛ kɛ hejɔɔmɔ hu kɛjɛ nibii ni ato he gbɛjianɔ kɛha wɔ ekaawoo nɛɛ mli. Wɔbaana gbɛi ni wɔɔnyɛ wɔtsɔ nɔ ni wɔhiɛ ahi wɔ diɛŋtsɛ kɛ wɔwekui lɛ kɛ mɛi krokomɛi ni yɔɔ asafo lɛ mli lɛ amumɔŋ hiamɔ nii anɔ lɛ nɔ jogbaŋŋ. Tswaa ofai shi akɛ obaahi kpokpaa nɔ kpee lɛ shishi yɛ be lɛ fɛɛ mli ni ojwɛŋmɔ baanyiɛ wiemɔ lɛ sɛɛ hu, “ejaakɛ agbɛnɛ wɔyiwalaheremɔ lɛ ebɛŋkɛ fe tsutsu beni wɔhe wɔye lɛ.”—Rom. 13:11.