Nɛgbɛ Ohiŋmɛii Kwɛɔ?
1 Yɛ bei babaoo mli lɛ, Nyɔŋmɔ tsuji kɛ naagbai kɛ shihilɛi ni kaa mɔ kpeɔ. Ni Ŋwɛi Flooflonyo lɛ yelikɛbuamɔ he hiaa wɔ yɛ nakai beaŋ. No hewɔ lɛ ani okɛ ekaa kpaa Yehowa Nyɔŋmɔ fai kɛha yelikɛbuamɔ, ni okwɛɔ lɛ gbɛ kɛha wajemɔ kɛ gbɛtsɔɔmɔ?
2 Enɛ ji hewalɛwoo ni wɔnaa kɛjɛɔ Lala 123 lɛ. Klɛŋklɛŋ kuku lɛ kɛɔ akɛ: “Bo miholeɔ mihiŋmɛii anɔ mikwɛɔ, bo mɔ ni ota ŋwɛi lɛ.” Akɛni Nyɔŋmɔ Ofe lɛ yɛ ŋwɛi ati lɛ nɔ tɔɔ hewɔ lɛ, eja gbɛ jogbaŋŋ akɛ lalatsɛ lɛ aaawie ehiŋmɛii anɔ ni eholeɔ kɛyaa ŋwɛi beni ekpaa Bɔlɔ lɛ fai kɛha yelikɛbuamɔ lɛ he.
3 Agbɛnɛ, kanemɔ kukuji enyɔ kɛyashi ejwɛ lɛ. Tsuji kɛ tsulɔyei kwɛɔ amɛnuŋtsɔmɛi kɛ amɛ awulai lɛ aniji jogbaŋŋ, koni amɛkɛle nɔ ni amɛtaoɔ ni amɛfee. Ni amɛnuŋtsɔmɛi kɛ amɛ awulai lɛ aniji kɛ shihilɛ mli hiamɔ nibii kɛ hebuu hu haa tsuji nɛɛ. Nakai nɔŋŋ hu Nyɔŋmɔ tsuji kwɛɔ lɛ gbɛ, ni amɛtaoɔ ni amɛle nɔ ni ji esuɔmɔnaa nii yɛ saji ahe, ni amɛsumɔɔ ni amɛnine ashɛ ehebuu, eduromɔ kɛ ejɔɔmɔi anɔ.
4 Aye taiatsɛ lɛ kɛ enanemɛi Israelbii lɛ ahe fɛo. Heguɔgbee ni akɛba amɛnɔ lɛ fa babaoo diɛŋtsɛ. “Hewolɔi” ni kɛ enɛɛmɛi baa lɛ ‘ahe ejɔ amɛ,’ ni tsɔɔ akɛ amɛtamɔ mɛi komɛi ni yɛ shweshweeshwe. Shi amale shweshweeshwe shihilɛ nɛ. Shiwoo ni Yehowa kɛha etsuji lɛ efeee efolo ni ebaaa mli, yɛ shihilɛi ni mli wawai po mli.—Yosh. 21:45; Lala 37:25.
5 Nakai nɔŋŋ Yehowa webii ni yɔɔ ŋmɛnɛ lɛ kɛ henyɛlɔi ashitee-kɛ-woo kɛ hefɛoyeli ni naa wa kpeɔ. Kɛji wɔɔnyɛ wɔdamɔ nɛkɛ nɔnyɛɛi nɛɛ anaa lɛ, no lɛ ehe miihia ni wɔya nɔ wɔkwɛ Yehowa gbɛ kɛha eduromɔ kɛ jɔɔmɔ. Ehaŋ wɔnine anyɛ shi kɔkɔɔkɔ. Ebaaha wɔ nibii ni wɔbiɔ lɛ lɛ. (1 Yoh. 3:21, 22) Hɛɛ, wɔyɛ hiɛnɔkamɔ ni tamɔ nakai. No hewɔ lɛ, kwɛmɔ Yehowa gbɛ kɛha gbɛtsɔɔmɔ.—Kwɛmɔ 1984 Yearbook bf. 22 kk. 1.