Okɛ Osusuma Fɛɛ Atsu Nii Yɛ Shiɛmɔ Nitsumɔ Lɛ Mli
Fa 4—Ato Gbɛjianɔ Koni Wɔgbe Wɔsɔɔmɔ lɛ Naa ni Emɔ Shi
1 Susuma fɛɛ ni akɛaatsu maŋ shiɛmɔ nitsumɔ lɛ biɔ mɔ diɛŋtsɛ gbɛjianɔtoo kpakpa. Yesu to okadi kpakpa efɔ shi eha wɔ kɛha wɔsɔɔmɔ nitsumɔ lɛ ŋmɛnɛ. (Luka 10:1, 2; Bɔfoi 1:8) Wɔbaanyɛ wɔkase nii hu kɛjɛ bɔ ni klɛŋklɛŋ afi oha lɛ mli kaselɔi lɛ tsu amɛsɔɔmɔ lɛ he nii amɛha lɛ mli. (Bɔfoi 5:42; 2 Tim. 4:5) Shi mɛɛ gbɛ nɔ oootsɔ oto gbɛjianɔ jogbaŋŋ koni bo hu ona nibii kpakpai ni jɛɔ mli baa lɛ amli miishɛɛ ŋmɛnɛ?
2 Too Be he Gbɛjianɔ Kɛha Shiɛmɔyaa: Wɔsɔɔmɔ nitsumɔ lɛ jeee wɔshihilɛ mli nɔ ko ni he ehiaaa loo nɔ ni wɔfeɔ trukaa kɛkɛ. Wɔnyɛŋ wɔshi be ni wɔto ni wɔkɛtsuɔ wɔsɔɔmɔ lɛ he nii lɛ ni eba trukaa. Kɛji wɔɔbo wɔsɔɔmɔ lɛ he gbɛjianɔ ni emɔ shi jogbaŋŋ lɛ, no lɛ esa akɛ wɔto be kɛha fai sɔrɔtoi lɛ fɛɛ. (Efes. 5:15, 16) Shiɛlɔi pii ena akɛ kɛji amɛkɛ ŋmɛlɛtswai oti ko ni amɛaatuu amɛwo shiɛmɔ nitsumɔ lɛ mli yɛ daa nyɔŋ nɔ ma amɛhiɛ lɛ, eyeɔ ebuaa amɛ jogbaŋŋ. Bei pii lɛ enɛ biɔ ni amɛto amɛ nibii ahe gbɛjianɔ koni amɛnyɛ amɛkɛ amɛhe awo shiɛmɔ nitsumɔ lɛ mli daa otsi. Esa akɛ Kristofoi ni ji fɔlɔi lɛ aye abua amɛbii lɛ ni amɛto be he gbɛjianɔ koni amɛnyɛ amɛkɛ amɛhe awo shiɛmɔ nitsumɔ lɛ fai sɔrɔtoi lɛ fɛɛ amli daa.—5 Mose 6:7; Abɛi 22:6.
3 Okɛ Otii Kpakpai Amamɔ Ohiɛ: Otii pɔtɛɛ ni okɛaamamɔ ohiɛ lɛ baaha ona nɔ ni obaabɔ mɔdɛŋ ni oshɛ he. Kɛ oshɛ oti ni okɛma shi lɛ he lɛ, ebaaha ona miishɛɛ akɛ otsu nɔ ko pɔtɛɛ. (Abɛi 13:12) Bɔfo Paulo wo hewalɛ akɛ: “Shi nɔ ni wɔnine eshɛ nɔ momo lɛ, nyɛhaa wɔnyiɛa nakai susumɔ kpaa lɛ nɔŋŋ naa.” (Fil. 3:16) Esa akɛ oshiɛmɔ nitsumɔ lɛ aye odase akɛ oyɛ susumɔ kpaa ni onyiɛɔ sɛɛ, tamɔ bɔ ni eji yɛ omumɔŋ nɔyaa lɛ fai sɔrɔtoi ni eshwɛ lɛ hu fɛɛ mli lɛ.
4 Akɛ nɔkwɛmɔ nɔ lɛ, ani oyɛ dɛhiɛmɔ woji kɛ woji bibii ni fa bɔ ni sa? Ani ohiɛɔ woji tɛtrɛbii heei lɛ saŋŋ be fɛɛ be, ni amɛhe tse jogbaŋŋ hu? Ani okɛ shia-kɛ-shia kadimɔ woji lɛ tsuɔ nii jogbaŋŋ, ni okɛ ekome kadiɔ mɛi ni yɔɔ wiemɔi lɛ he miishɛɛ kɛ ekroko hu kɛha mɛi ni bɛ shia lɛ?
5 Dani okɛ ohe aaawo sɔɔmɔ nitsumɔ lɛ mli lɛ, esa akɛ ohe be ni okɛti Saneyitso Kɛha Sanegbaa hee lɛ mli. Halamɔ otii kɛjɛ wolo ni akɛhaa lɛ mli ni obaanyɛ okɛgba sane, koni osaa ohe jogbaŋŋ akɛ okɛbaatsu nii kɛmɔ shi ni okɛtee mɛi amiishɛɛ shi. Agbɛnɛ hu, feemɔ klalo akɛ okɛ wolo ni akɛyaa shiɛmɔ, ni ji Reasoning From the Scriptures lɛ hu baatsu nii. Kɛji ojɛ shia kome mli kɛmiiya he krokro lɛ, obaanyɛ ogbele mli ni okwɛ emli ŋawooi babaoo lɛ kɛha ekɛ nitsumɔ. Nɛkɛ otii diɛŋtsɛ nɛɛ kɛ nitsumɔ baaha bɔ osɔɔmɔ nitsumɔ lɛ mɔɔ shi ehaa lɛ aya hiɛ babaoo.
6 Gbɛfaŋnɔ ni mɔɔ shi ni wɔɔna yɛ “sanekpakpa lɛ he nitsumɔ krɔŋkrɔŋ” lɛ nɔ yɛ nɛkɛ naagbee gbii nɛɛ amli lɛ ji hegbɛ ni Jɔɔmɔ yɔɔ mli. (Rom. 15:16, NW) Esa akɛ wɔbɔ mɔdɛŋ ni wɔgbe wɔsɔɔmɔ lɛ naa kɛtsɔ odase ni hi fe fɛɛ ni wɔye, “naabui ni jajeɔ egbɛi lɛ ayibii” nɔ. (Heb. 13:15; okɛto Hoshea 14:2 he.) Kɛji wɔɔnyɛ wɔfee enɛ lɛ, no lɛ nyɛhaa wɔtoa be kɛhaa gbɛfaŋnɔ ni wɔna yɛ shiɛmɔ nitsumɔ lɛ mli daa koni wɔkɛ otii ni baaye abua wɔ bɔni afee wɔtsu wɔsɔɔmɔ nitsumɔ lɛ wɔgbe naa ni wɔkɛwo Yehowa hiɛ nyam lɛ amamɔ wɔhiɛ.