Sanebimɔ He

◼ Mɛni hewɔ esa akɛ Kristofonyo akase nikanemɔ kɛ niŋmaa?

Ŋmɛnɛŋmɛnɛ je ni yɔɔ Satan Abonsam shishi lɛ mli ewu duŋ yɛ mumɔŋ ni ekpɔtɔ yɛ jeŋba mli. Te Kristofonyo aaafee tɛŋŋ amɔ Yehowa jalɛ taomɔ nii lɛ amli kpɛŋŋ? Kɛtsɔ ‘mɛi fɔji lɛ aŋaawoo ni aaakwa kɛ Yehowa mla lɛ he nyamɔ, kɛ ekanemɔ nyɔɔŋ kɛ shwane nɔ. (Lala 1:​1, 2) Abi ni anɔkwa jalɔi afee mɛi ni le nikanemɔ kɛ niŋmaa yɛ afi ohai abɔ lɛ fɛɛ mli. (5 Mose 6:​6, 9; 17:​18, 19; Hab. 2:2; Mat 24:​16; okɛto Bɔfoi lɛ Asaji 17:11 he.) Ŋmɛnɛ, Kristofoi ni nyɛɔ amɛkaneɔ ni amɛŋmaa nii lɛ wajeɔ amɛ diɛŋtsɛ amɛhe kɛ mɛi krokomɛi hu kɛtsɔɔ daa teemɔŋ nikasemɔ kɛ sɔɔmɔ nitsumɔ ni mɔɔ shi nɔ. No hewɔ lɛ amɛbaleɔ Yehowa kɛ eyiŋtoi lɛ jogbaŋŋ ni enɛ yeɔ ebuaa amɛ koni amɛmɔ amɛ emuuyeli mli yɛ yiwaa po shishi.​—Lala 1:⁠3.

Kɛ anɔkwa Kristofoi ŋɔ hegbɛ ni akɛhaa yɛ Nyɔŋmɔ webii asafoi lɛ amli lɛ, amɛnyɛɔ amɛnaa ‘amɛshweremɔ lɛ jeɔ kpo faŋŋ.’ (1 Tim. 4:15) Nɔ ni fata nɛkɛ hegbɛi nɛɛ ahe ji Teokrase Sɔɔmɔ Skul lɛ kɛ gbɛgbamɔ sɔɔmɔ lɛ mli ni akɛ he aaawo. Nyɛmimɛi hii hu baanyɛ ana hegbɛ ni amɛtsɔ asafoŋ sɔɔlɔi kɛ onukpai. Mɔ ni leee nikanemɔ kɛ niŋmaa lɛ nyɛŋ ana sɔɔmɔ hegbɛi nɛɛ amli ŋɔɔmɔ. Nyɛmimɛi ni leee nikanemɔ kɛ niŋmaa lɛ yaa nɔ amɛkɛ amɛhe fɔɔ mɛi ni le woloŋ lɛ ayelikɛbuamɔ nɔ lolo yɛ sɛɛsaramɔ. Biblia kasemɔ kɛ sɔɔmɔ nitsumɔ lɛ ahe akɔntaabuu mli. Susumɔ bɔ ni nitsumɔ nɛɛ baaya hiɛ yɛ maŋ nɛɛ mli aha, kɛ shiɛlɔi fe 5,000 ni leee woloŋ lɛ fɛɛ aaale nikanemɔ kɛ niŋmaa lɛ he okwɛ! Hei pii yɛ ni nyɛmimɛi eŋɔ hegbɛ lɛ ni amɛkɛ bɔ ni shihilɛ lɛ mli egbɔjɔ fioo eha lɛ ewo nikanemɔ kɛ niŋmaa kui lɛ amli hewalɛ. Onukpai lɛ baatee nikasemɔ kɛ ni ŋmaa kui lɛ ashi ekoŋŋ yɛ hei ni akpa feemɔ yɛ lɛ. Esa akɛ nyɛmimɛi hii kɛ yei fɛɛ ni leee nikanemɔ kɛ niŋmaa lɛ ana suɔmɔ ni mli wa akɛ amɛaale nakai feemɔ koni amɛya amɛhiɛ kɛyashɛ dalɛ mli! Heb. 6: 1, 2.