Sanebimɔ He
◼ Mɛɛ gbɛ mɛi ni yakwɛɔ baptisimɔi lɛ baanyɛ atsɔ nɔ ajie miishɛɛ kpo yɛ?
Baptisimɔ ji miishɛɛ be. Wɔmli filiɔ wɔ kɛ wɔna bɔ ni mɛi heei lɛ kɔɔ amɛshidaamɔ yɛ Yehowa masɛi, yɛ faŋŋ, ni amɛmiijie amɛhemɔkɛyeli kpo lɛ. (Lala 40:9) Yesu kɛɛ akɛ enɛ kɛ miishɛɛ babaoo baa ŋwɛi. (Luka 15:10) Weku mlibii kɛ shiɛlɔi ni kɛ mɛi ni abaptisiɔ amɛ lɛ fee nikasemɔ lɛ naa miishɛɛ waa akɛ mɛi heei nɛɛ ekɔ nifeemɔ gbɛ ni he hiaa nɛɛ. Shi mɛɛ gbɛ ni ja nɔ abaanyɛ atsɔ ajie miishɛɛ nɛɛ kpo yɛ?
Yesu baptisimɔ lɛ fee nɔkwɛmɔ nɔ kɛha Kristofoi abaptisimɔ ŋmɛnɛ. Eyɔse akɛ eekɔ gbɛ ko ni hiɛdɔɔ diɛŋtsɛ yɔɔ mli. Beni abaptisiɔ lɛ lɛ no mli lɛ eesɔle. (Luka 3:21, 22) Ele akɛ baptisimɔ ji be ni akɛ hiɛdɔɔ jwɛŋɔ saji ahe. Ekaselɔi lɛ hu yɔse bɔ ni baptisimɔ he hiaa ha lɛ. Beni afɔse mumɔ krɔŋkrɔŋ lɛ ashwie shi yɛ Pentekoste gbi lɛ nɔ yɛ afi 33 Ŋ.B. lɛ sɛɛ lɛ, abaptisi gbɔmɛi aaafee 3,000. Mɛni ji kaselɔi ni na nɔ ni tee nɔ nɛɛ anifeemɔ? “Ni amɛhiɛ bɔfoi lɛ atsɔɔmɔ lɛ kɛ naanyobɔɔ lɛ kɛ aboloo kuumɔ lɛ kɛ sɔlemɔi lɛ amli.” (Bɔf. 2:41, 42) Kaselɔi lɛ susu mumɔŋ nibii ahe ni amɛtsɔ gbɔfeemɔ nɔ amɛkɛ mɛi krokomɛi ja amɛnibii.
Anyaa baptisimɔi ahe waa yɛ Kristofoi akpeei ashishi yɛ ŋmɛnɛŋmɛnɛ beaŋ. Eji nɔ ni ja diɛŋtsɛ akɛ wɔɔtsɔ dɛtswaa kɛ kafomɔ nɔ wɔtsɔɔ wɔmiishɛɛ kɛ wɔna aŋkroaŋkroi ni miikɔ shidaamɔ yɛ Yehowa masɛi lɛ. Shi yɛ gbɛ kroko nɔ lɛ, dɛtswaaa babaoo ni anyɛɛɛ aye nɔ, bɛlɛkpamɔi, ninefɔɔ yɛ yitsei ahe, kɛ gbɛii atsɛmɔ baafee nɔ ni esaaa. Subaŋ ni tamɔ nɛkɛ lɛ tsɔɔ hiɛsɔɔ ni abɛ kɛha hiɛdɔɔ kɛ krɔŋkrɔŋ nii ni nɛkɛ hemɔkɛyeli kpojiemɔ nɛɛ ji lɛ. Asaŋ enɛ hu jeee be ni sa kɛha nikee ni akɛhaa mɛi ni abaptisi amɛ lɛ beni amɛjeɔ kpo kɛjɛɔ baptisimɔ nu lɛ mli lɛ. Baptisimɔ kadiɔ Kristofoi afoidamɔ kɛha yiwalaheremɔ lɛ shishijee. Wɔmli baanyɛ afili wɔ ni wɔbaanyɛ wɔwo mɛi ni abaptisiɔ amɛ lɛ hewalɛ kɛtsɔ yelikɛbuamɔ ni wɔkɛaaha amɛ lɛ nɔ ni amɛyoo amɛkɛ Yehowa teŋ wekukpaa ni bɛŋkɛ kpaakpa ni baptisimɔ gbeleɔ nakai gbɛ kɛhaa amɛ lɛ.
Hei ni abaptisiɔ mɛi yɛ lɛ efeŋ he ni sa kɛha fɛoyeli, shwɛmɔ, ŋshɔ loo faa wumɔ, aloo jeŋba kroko ni baafite hiɛdɔɔ ni yɔɔ nɛkɛ be nɛɛ mli lɛ. Eba akɛ wɔjie wɔmiishɛɛ kpo yɛ gbɛ ni bulɛ yɔɔ mli nɔ. Bɔ ni wɔbaa wɔjeŋ jogbaŋŋ wɔhaa kɛ hiɛdɔɔ lɛ baaha mɛi fɛɛ ni yɔɔ jɛmɛ lɛ amiishɛɛ afa.