Wɔha Nyɔŋmɔ Sɔɔmɔ Afee Wɔ Miishɛɛ Nɔ
1 Nitsumɔi pii yɛ ni kɛ miishɛɛ ko bahaa mɛi ni kɛ amɛhe woɔ mli lɛ, titri lɛ kɛ afee enɛ yɛ mlihilɛ yiŋtoo ko hewɔ lɛ. Shi enɛɛmɛi ateŋ eko bɛ, kɛ abua fɛɛ naa kutuu po, ni abaanyɛ akɛto Nyɔŋmɔ sɔɔmɔ he, kɛ eba nɔ ni kɛ miishɛɛ ni fa ni hiɔ shi daa haa lɛ he lɛ. Hɛɛ, taakɛ atsɔ gbalɔ Yesaia nɔ agba afɔ shi lɛ, “mitsuji lɛ aaala kɛ tsuijurɔ.”—Yes. 65:14.
2 Kristofonyo miishɛɛ kɛ Wɔ Sɔɔmɔ Nitsumɔ Lɛ: Kristofonyo miishɛɛ lɛ ji tsui ni nyɔɔ mɔ mli henumɔ ko ni nyamɔ yɔɔ mli akɛni ele akɛ eefee nɔ ni ja, eesa Nyɔŋmɔ hiɛ lɛ hewɔ. Ebaa kɛjɛɔ le ni wɔleɔ akɛ wɔmiitsu nitsumɔ kpakpa ni he baa sɛɛnamɔ kɛhaa mɛi krokomɛi, ni haa Nyɔŋmɔ yiŋtoo shwereɔ, ni ewoɔ egbɛi kpeteŋkpele ni yɔɔ krɔŋkrɔŋ lɛ nɔ gojoo lɛ mli.
Nibii ni tamɔ nɛkɛ ni baa mli lɛ haa wɔtsui nyɔɔ wɔmli kɛ miishɛɛ henumɔ ko kɛ mligbɛ toiŋjɔlɛ ni sɛɛ tsɛɔ.—Fil. 4:4.
3 Kɛ wɔɔfee Nyɔŋmɔ sɔɔmɔ lɛ wɔmiishɛɛ nɔ kpele lɛ, belɛ esa akɛ wɔjwɛŋmɔ ahi nibii ni kɛ miishɛɛ baa lɛ anɔ. Wɔnyɛŋ wɔkpa gbɛ akɛ wɔbaana miishɛɛ ni tamɔ nɛkɛ kɛ wɔtuu wɔhe wɔha niiashikpamɔi ni etswaaa mɔ emaaa shi. Shi moŋ esa akɛ wɔkɛ jwɛŋmɔ kpakpa akwɛ wɔ sɔɔmɔ lɛ, nɔ ni etsuɔ yɛ Nyɔŋmɔ yiŋtoi lɛ amlibaa amli, yɛ gbɔmɛi ni egbalaa amɛmli kɛhaa wala, yɛ odase ni ayeɔ yɛ egbɛi lɛ kɛ Maŋtsɛyeli lɛ he kɛ wɔ emuuyeli ni wɔjieɔ lɛ kpo wɔtsɔɔ lɛ mli.
4 Wɔ Miishɛɛ Nɔ Kpele lɛ ni Wɔjieɔ Iɛ Kpo Wɔtsɔɔ: Te wɔfeɔ tɛŋŋ wɔjieɔ lɛ kpo wɔtsɔɔ akɛ wɔkɛ Nyɔŋmɔ sɔɔmɔ miifee wɔmiishɛɛ nɔ kpele? Kɛtsɔ ehe susumɔ nɔ, ehe wiemɔ be fɛɛ be ni hegbɛ aaaba, kɛ agbɛnɛ kɛtsɔ Nyɔŋmɔ Maŋtsɛyeli lɛ taomɔ klɛŋklɛŋ nɔ. (Mat. 6:33; kwɛmɔ 1973 Yearbook of Jehovah’s Witnesses baafa 153, kukuji 1-5 hu.) Wɔle akɛ bɔ ni wɔhiɔ shi wɔhaa daa gbi, kɛ emli nibii kɛ gbɛnaa nii sɔrɔtoi babaoo lɛ efee odaseyeli kɛha wɔ Nyɔŋmɔ lɛ.
5 Wɔtsɔɔ hu akɛ wɔkɛ Nyɔŋmɔ sɔɔmɔ miifee wɔ miishɛɛ nɔ kpele kɛtsɔ he ni wɔheɔ kɛjɛɔ heloo gbɛfaŋ nibii kɛ miishɛɛnamɔ sɛɛdii lɛ amli wɔhaa kpeei, mɔ diɛŋtsɛ teemɔŋ kɛ weku nikasemɔi kɛ shiɛmɔ mli lɛ nɔ. (Efe. 5:15, 16) Wɔtsɔɔ enɛ hu kɛtsɔɔ nibii ni wɔyɔɔ ni wɔkɛhaa yaka koni akɛtsu teokrase nitsumɔi, yɛ abɔ ni wɔyɔɔ lɛ naa, ni wɔkaiɔ akɛ susuma muu fɛɛ mli ni ajɛɔ ahaa nɛkɛ kɛ miishɛɛ baa. (Luka 21:1-4; Bɔf. 20:35) Eba akɛ Yehowa sɔɔmɔ aaafee wɔ aŋkroaŋkro miishɛɛ nɔ̃.