Wɔ Nyɛsɛɛ Yinɔsane Nɛɛ Mli Nikasemɔi Sɔrɔtoi
1 Beni onu adafitswaa yɛ October 31, 1991, akɛ ajie “naatsii” lɛ kɛjɛ wɔnitsumɔ lɛ nɔ lɛ, te onu he oha tɛŋŋ? Wɔnu he tamɔ blema Israelbii lɛ nɔŋŋ, beni Yehowa kɛ amɛjamɔ mli heyeli ha amɛ ekoŋŋ lɛ. Lala 126:1, 2 kɛɔ akɛ: “Beni Yehowa kpala Zion nomii lɛ kɛba lɛ, efee wɔ tamɔ la wɔlaa. No mli lɛ wɔdaaŋ yimɔ obɔbɔ kɛ ŋmɔlɔ ni wɔlilɛi hu kɛ nyamɔ lala. “Nyɛbo teokrase gbɛtsɔɔmɔ toi ni eka shi faŋŋ akɛ Yehowa ebo wɔsɔlemɔi atoi ni ejɔɔ wɔ anɔkwayeli kɛ wɔtsuishiŋmɛɛ yɛ naatsii be lɛ mli lɛ nɔ. Akɛni wɔkase nii kɛjɛ enɛ mli hewɔ lɛ, eba akɛ wɔ fɛɛ wɔɔya nɔ wɔgbo deŋme yɛ anɔkwayeli mli ni wɔkɛ Yehowa gbɛjianɔtoo lɛ afee ekome kɛmɔ shi.—1 Kor. 4:2; 15:58.
2 Mɛi pii kpe yɛ nyɛmimɛi ashiai amli kɛha asafoŋ kpeei yɛ naatsii be lɛ mli, ni no hewɔ lɛ wɔbaanyɛ wɔye anɔkwale ni Yesu wiemɔi ni yɔɔ Mateo 18:20 lɛ ji lɛ he odase. Shi, amrɔ nɛɛ wɔnyɛɔ wɔfeɔ kpeei sɔrɔtoi ejwɛ yɛ Maŋtsɛyeli Asa lɛ nɔ shi wɔfeɔ Asafo Woloŋ Nikasemɔ lɛ yɛ nyɛmimɛi ashiai amli lolo. Ani onyɛɔ oyaa Woloŋ Nikasemɔ lɛ be fɛɛ be taakɛ oyaa asafoŋ kpeei krokomɛi lɛ daa yɛ nyɛmimɛi ashiai amli yɛ naatsii be lɛ mli lɛ?
3 Yɛ naatsii be lɛ mli lɛ, Yehowa tsɔ egbɛjianɔtoo lɛ nɔ ekɛ mumɔŋ niyenii ha wɔ be fɛ be ni eha efee wɔ naakpɛɛ po. Taakɛ Ester fee lɛ, nitsulɔi ni amɛjɔɔ amɛhe nɔ lɛ kɛ amɛhe wo osharai ni aaaha anyɛ amɔmɔ amɛ lɛ amli koni amɛkɛ mumɔŋ niyenii ni shɛjeɔ mɔ mii ni baa yɛ ebe naa pɛpɛɛpɛ lɛ abaha wɔ. (Ester 4:16b) Kwɛ bɔ ni wɔhiɛ sɔɔ enɛ ha! Shi ana akɛ, mɛi komɛi he woji yɛ naatsii be lɛ mli ni amɛwoko nyɔmɔ lolo. Mɛi krokomɛi hu shɛ woji tɛtrɛbii kɛ woji wuji yɛ nakai be lɛ mli, shi beni akɛ enɛɛmɛi ba lɛ, amɛyaheee ni amɛaawo nyɔmɔ, ni nɔ ni jɛ mli ba ji nyɔmɔ ni asafo lɛ bahiɛ yɛ Asafo yitso lɛ. Esa akɛ wɔ aŋkroaŋkroi lɛ fɛɛ abɔ mɔdɛŋ ni wɔhe woji ni ebatia babaoo lɛ, kɛ no baabi ni wɔhe woji tɛtrɛbii ni yɔɔ wɔmaŋ nɛɛ mli wiemɔi amli ni wɔkase wɔgbe naa momo po lɛ. Wɔhiɛ baasɔ gbee ni okɛ wɔ aaakpa yɛ enɛ mli lɛ waa.
4 Nyɛmiaa Nyɛhiɛ yɛ Sɔɔmɔ Nitsumɔ Iɛ Mli: Mɛɛ miishɛɛ eji akɛ wɔɔkane yɛ November Wɔ Maŋtsɛyeli Sɔɔmɔ lɛ mli akɛ mɛi ni yifalɛ shɛɔ 34,421 bu amɛsɔɔmɔ nitsumɔ he akɔntaa yɛ August ni ho nɛɛ mli! Shwɛ shiɛlɔi 138 kulɛ wɔnine shɛ shiɛlɔi ayifalɛ ni fe fɛɛ ni ji 34,559 ni wɔna yɛ 1989 April mli lɛ nɔ. Eji miishɛɛ sane kpele. Shi ayoo akɛ, mɛi komɛi eyaaa shiɛmɔ daa nyɔŋ nɔ yɛ naatsii be lɛ mli, mɛi komɛi fee nakai yɛ gbɔmɔ gbeyeishemɔ hewɔ ni mɛi komɛi hu gbɔjɔ amɛhe. Kɛha wɔ fɛɛ, ni nɔ ni ho nyɛsɛɛ nɛɛ lɛ kɔɔɔ he eko lɛ, ani jeee be ni esa akɛ wɔha wɔsɔɔmɔ nitsumɔ lɛ aya hiɛ nɛ? Naatsii lɛ eha gbɔmɛi pii ena wiemɔ lɛ he miishɛɛ bianɛ akɛ wɔŋmɔ lɛ “eyɛ futaa kɛha kpamɔ” diɛŋtsɛ.—Yoh. 4:35.
5 Ewoɔ wɔ hewalɛ kɛ wɔna bɔ ni mɛi pii kɛ amɛhe woɔ gbɛgbalɔi awamɔ sɔɔmɔ lɛ mli ni mɛi komɛi kɛ amɛhe haa daa gbɛgbamɔ sɔɔmɔ lɛ. Ani bo hu ooonyɛ ona gbɛgbamɔ sɔɔmɔ lɛ mli hegbɛ ni yɔɔ nyam lɛ mli gbɛfaŋnɔ? Kɛ hoo lɛ, mɛni hewɔ obɔɔɔ mɔdɛŋ akɛ ooofee sɔɔlɔ ni tsuɔ nii daa ni woɔ yibii?
6 Wɔmumɔŋ shidaamɔ ji nɔ ni haa wɔnaa wɔkɛ Yehowa teŋ wekukpaa ni bɛŋkɛ kpaakpa mli ŋɔɔmɔ. No hewɔ lɛ, ha ohiŋmɛi afee mlɛo, ni “nyɛtaoa maŋtsɛyeli lɛ kɛ ejalɛ lɛ tsutsu.” (Mat. 6:22, 33) Wɔsɛɛ be ni yɔɔ nyam miimɛ mɛi ni boɔ Yesu ŋaawoo lɛ toi lɛ. No hewɔ lɛ, nyɛhaa wɔ fɛɛ wɔjɛa wɔ nyɛsɛɛ yinɔsane nɛɛ mli wɔtswaa wɔfai shi akɛ ‘wɔbaapele nii ni yɔɔ wɔhiɛ gbɛ lɛ ahe,’ ni naanɔ wala yɛ Nyɔŋmɔ gbɛjianɔtoo hee lɛ mli ni wɔɔmɔ mli kpɛŋŋ lɛ hu fata he.—Fil. 3:13.