Sanekpakpa Lɛ Kɛhamɔ Kɛ Gbekɛbii Akɛ Shiɛlɔi
1 July 1991 Wɔ Maŋtsɛyeli Sɔɔmɔ lɛ wo hewalɛ yɛ afa gbɛ nɛɛ akɛ aye abua gbekɛbii ni amɛtsɔmɔ shiɛlɔi. Awo fɔlɔi ahewalɛ ni amɛkɛ amɛbii aya shiɛmɔ, fe ni amɛaashi amɛ yɛ shia; kɛ aafee shia Biblia mli nikasemɔ lɛ, abaanyɛ afɔ sanebimɔi ni waaa lɛ aha gbekɛbii lɛ ni amɛha hetoo; abaanyɛ atsɔɔ gbekɛbii lɛ gbɛ ni atsɔɔ nɔ akɛ dɛhiɛmɔ woji kɛ woji tɛtrɛbii haa yɛ shiɛmɔ mli, ni abaanyɛ adamɔ afii ni amɛye lɛ nɔ atsɔɔ amɛ ŋmalɛ kome kɛyashi etɛ shiɛmɔ wiemɔi. Awo hewalɛ ni akase enɛ yɛ shia koni ana hekɛnɔfɔɔ yɛ mli. Agbɛnɛ awo hewalɛ ni atsɔɔ gbekɛbii lɛ ni amɛkane wiemɔ ni awieɔ yɛ shikpɔŋkuku loo maŋ ni amɛyɔɔ mli lɛ, kɛ Biblia lɛ yɛ nakai wiemɔ lɛ mli. Enɛ baaha gbekɛbii lɛ diɛŋtsɛ akane ŋmalɛi ni amɛkɛfi amɛshiɛmɔ wiemɔ lɛ sɛɛ.
2 Kɛjɛ be mli ni akɛ ŋaawoo ni yɔɔ yiteŋgbɛ nɛɛ ha lɛ, nyɔji enumɔ eho momo. Mɛɛ mɔdɛŋ obii lɛ bɔɔ yɛ sɔɔmɔ nitsumɔ lɛ mli? Nakai ŋaawoo lɛ ahe nitsumɔ ekpeko sɛɛ kɛ nɔ ko fioo pɛ afee loo afeko nɔ ko kwraa yɛ he. Gbekɛbii lɛ miidara yɛ gbɔmɔtsoŋ jwɛŋmɔŋ, kɛ henumɔŋ, shi nɔ ni he hiaa fe fɛɛ ni asumɔɔ jogbaŋŋ ji mumɔŋ nɔ, ni shiɛmɔ fata enɛ he. No hewɔ lɛ esa akɛ aye abua gbekɛbii lɛ beni amɛdarako lɛ ni amɛjie wɔ Bɔlɔ Kpeteŋkpele Yehowa Nyɔŋmɔ yi. (Mat. 21:16) Kɛji akɛ agbeleko Congregation’s Publisher Record wolo ahako obi lɛ po lɛ, kɛlɛ esa akɛ aye abua lɛ ni ekɛ ehe awo sɔɔmɔ nitsumɔ lɛ mli. Akɛ nɔkwɛmɔ nɔ lɛ, ewaaa akɛ bibii kwraa lɛ aaakase bɔ ni akɛ dɛhiɛmɔ woji kɛ woji tɛtrɛbii haa. Suɔmɔ mli ni fɔlɔi aaajɛ asusu amɛbii bibii lɛ ahe nɛkɛ lɛ haa gbekɛbii lɛ amiishɛɛ yɛ sɔɔmɔ nitsumɔ lɛ he lɛ yaa hiɛ.
3 Mra Tsɔsemɔ He Hiaa: Biblia lɛ woɔ ŋaa yɛ Abɛi 22:6 akɛ: “Tsɔɔmɔ gbekɛ gbɛ ni sa akɛ etsɔ nɔ, ni kɛ egbɔ hu lɛ, ejeŋ nɔ.” Shishitoo mla nɛɛ ji anɔkwale yɛ shiai ni jamɔ egbala amɛmli lɛ po mli. Timoteo da yɛ shia ni tamɔ nɛkɛ mli, shi shishitoo mla nɛɛ ni enyɛ kɛ enaa kɛtsu nii lɛ he ba sɛɛnamɔ babaoo kɛha lɛ. (2 Tim. 3:15) Ani eyɛ naakpɛɛ mɔ akɛ Timoteo da ni ebatsɔ sanekpakpa lɛ he sɔɔlɔ ni bɔɔ mɔdɛŋ waa nakai lɛ? Anaa nɔ ni yeɔ enyɛmɔ akɛ sɔɔlɔ lɛ he odase yɛ nɔ ni Paulo wie yɛ ehe etsɔɔ Filipibii asafo lɛ mli: “Ejaakɛ mibɛ mɔ ko ni ejwɛŋmɔ kɛ mijwɛŋmɔ yeɔ egbɔ ni nyɛsane dɔɔ lɛ krɔŋŋ tamɔ lɛ. . . . Shi nyɛle etɛ naa, akɛ ekɛ mi sɔmɔɔ yɛ sanekpakpa lɛ hewɔ tamɔ bi kɛ etsɛ.”—Filip. 2:20-22.
4 Taakɛ bɔ ni Paulo kɛ Timoteo tsu nii yɛ ekomefeemɔ mli ni nɔ ni jɛ mli ba ji Timoteo kase gbɛi ni Paulo tsɔɔ nɔ lɛ, nakai nɔŋŋ fɔlɔi baanyɛ ato gbɛjianɔ ni amɛkɛ amɛweku lɛ mlibii lɛ aya shiɛmɔ daa. Kɛ gbekɛbii lɛ fa lɛ, wu kɛ ŋa lɛ baanyɛ ato gbɛjianɔ ni amɛto naa amɛkɛ amɛ aya shiɛmɔ. (Okɛto Filipibii 4:9 he.) Yɛ miishɛɛ ni gbɛjianɔtoo nɛɛ haa mɛi enyɔ lɛ fɛɛ naa yɛ shiɛmɔ mli lɛ sɛɛ lɛ, etsiɔ sane ni agbaaa lɛ hu naa.
5 Nuŋtsɔ Yesu Kristo kɛɛ: “Nɔ ni eyi tsui eteke nɔ lɛ, no [e]naabu wieɔ.” (Luka 6:45) No hewɔ lɛ kɛji akɛ obii aaana sɔɔmɔ nitsumɔ lɛ he miishɛɛ lɛ, belɛ esa akɛ akɛ Nyɔŋmɔ Wiemɔ lɛ awo amɛtsuii amli obɔbɔ. No hewɔ lɛ, too gbɛjianɔ ni ona daa otsi weku nikasemɔ. Kɛ amɛnyɛɔ amɛkaneɔ nii lɛ, mɛni hewɔ okɛ amɛ fataaa daa otsi Biblia kanemɔ ni ato he gbɛjianɔ lɛ he? Wo amɛ hewalɛ ni amɛsumɔ akɛ amɛaakane Asafo lɛ woji lɛ, kɛ Awake! lɛ mli sane kɛha obalaŋtai ni ji ‘Obalaŋtai Biɔ Akɛ’ lɛ hu.
6 Sɛɛnamɔ ni hi fe fɛɛ ni fɔlɔi baanyɛ ana yɛ amɛbii ahe ji ni amɛye amɛbua amɛ bianɛ ni amɛkɛ amɛhe awo anɔkwale lɛ mli kwraa ni amɛfee anɔkwale lɛ amɛ diɛŋtsɛ amɛnɔ. Enɛ baaha amɛkɛ miishɛɛ akwɛ bɔ ni amɛdaraa yɛ mumɔŋ amɛhaa lɛ, ni fɔlɔi atsuii aaanyɔ amɛmli taakɛ bɔfo Yohane jaje lɛ: “Mibɛ miishɛɛ ni fa fe enɛ akɛ manu akɛ mibii lɛ nyiɛɔ anɔkwale lɛ mli.”—3 Yoh. 4.