Mankind’s Search For God Wolo lɛ Kɛhamɔ
1 Mɛi pii nuɔ he ŋmɛnɛ akɛ jamɔ ni amɛbaahala lɛ ji amɛ diɛŋtsɛ amɛsane. Enɛ hewɔ lɛ, eeenyɛ efee kaa diɛŋtsɛ akɛ wɔkɛ wɔkuuŋbii baawie sane nɛɛ he. Shi amrɔ nɛɛ wɔyɛ Mankind’s Search for God wolo lɛ, ni eji yelikɛbuamɔ nɔ̃ ni he yɔɔ sɛɛnamɔ waa yɛ shiɛmɔ ni wɔɔshiɛ wɔtsɔɔ mɛi krokomɛi ni jɛ jamɔi sɔrɔtoi amli lɛ mli.
2 Mɛni obaakɛɛ ni okɛtee shiatsɛ lɛ miishɛɛ shi ni ekane wolo nɛɛ? Mɛɛ otii loo emli saji obaamamɔ nɔ mi ni mɛi ni tsɛɔ amɛhe Kristofoi lɛ ana he miishɛɛ? Mɛi ni bɛ Kristofoi ahemɔkɛyeli lɛ hu? Ni mɛi ni bɛ hemɔkɛyeli ko kwraa lɛ hu? Ŋaawoi ni nyiɛ sɛɛ nɛɛ baaye abua wɔ ni wɔsaa wɔhe ni wɔtsɔɔ wɔkuuŋbii hiamɔ ni ehe hiaa ni ‘amɛtao Yehowa,’ ni ‘amɛtsɛ lɛ yɛ be mli ni ebɛŋkɛ nɛɛ.’ (Yes. 55:6) Abaanyɛ atsake ŋaawoi nɛɛ amli kɛha shihilɛ ni nyɛyɔɔ mli lɛ.
3 Mɛni Hewɔ Esa akɛ Opɛi nɔ ni Wɔyɔɔ Kɛɛmɔ lɛ Mli Lɛ?: Akɛni mɛi pii kɛɔ akɛ amɛmiisumɔ jamɔ ni amɛyɔɔ mli lɛ nɔŋŋ, ni amɛsumɔɔɔ ni amɛtsake hewɔ lɛ, ekolɛ ehe baahia ni wɔsaa wɔhiɛkpamɔ wiemɔ lɛ ni eye ebua shiatsɛ lɛ ni ekɛ jwɛŋmɔ ni mli ka shi apɛi nɔ ni wɔyɔɔ kɛɛmɔ lɛ mli.
4 Beni oŋa lɛ jogbaŋŋ sɛɛ lɛ, obaanyɛ okɛɛ akɛ:
“Wɔna beni wɔkɛ wɔkuuŋbii gbaa sane lɛ akɛ mɛi pii miisumɔ jamɔ ni amɛyɔɔ mli lɛ ni amɛsumɔɔɔ ni amɛtsake. Shi kɛji gbɔmɛi ŋɔ be ni amɛkɛtao mɛi krokomɛi ahemɔkɛyelii amli lɛ, ani osusuɔ akɛ enɛ kɛ shishinumɔ kpakpa baaba, ni ebaaha hetsɛ ni yɔɔ je lɛŋ lɛ nɔ agbɔ? [Ŋmɛɛ shiatsɛ lɛ gbɛ ni ejie naa.] Kwɛmɔ nɔ ni Biblia lɛ kɛɔ yɛ mɛi ni sumɔɔ Nyɔŋmɔ lɛ kɛ bɔ ni esa akɛ amɛnu he amɛha mɛi krokomɛi lɛ he.” Kɛji okane Bɔfoi lɛ Asaji 17:26, 27 ogbe naa lɛ, gbalamɔ ejwɛŋmɔ kɛya Mankind’s Search for God wolo lɛ baafa 10, kukuji 15 kɛ 16 nɔ.
5 Mɛi pii ena akɛ kɛji amɛgbele yitso ni wieɔ shiatsɛ lɛ jamɔ he yɛ wolo lɛ mli lɛ, egbalaa ejwɛŋmɔ. Kadimɔ bɔ ni abaanyɛ afee enɛ aha.
6 Beni otsɔɔ mɔ ni oji sɛɛ lɛ, obaanyɛ okɛɛ akɛ:
“Akɛni jamɔi efa babaoo ŋmɛnɛ hewɔ lɛ, ani osusu bɔ ni wɔɔfee ni wɔle kɛji Nyɔŋmɔ kpɛlɛɔ wɔjamɔ nɔ lɛ he da?” Kɛji shiatsɛ lɛ ha hetoo lɛ, gbalamɔ ejwɛŋmɔ kɛya akrabatsa ni yɔɔ baafa 377 yɛ Mankind’s Search for God wolo lɛ mli lɛ nɔ, he ni tsɔɔ gbɛ̀i nyɔŋma ni abaanyɛ atsɔ nɔ ayoo anɔkwa jamɔ lɛ, ni oha ekadi oti ni ji 7 lɛ jogbaŋŋ. Bi shiatsɛ lɛ kɛji ekpɛlɛɔ nɔ akɛ esa akɛ mɔ ko ni kɛ ehe woɔ anɔkwa jamɔ mli lɛ anu he nakai yɛ mɛi ni hiɛ hewolonɔ sui sɔrɔtoi aloo amɛjɛ maji sɔrɔtoi amli lɛ ahe. Kɛji be baaŋmɛ gbɛ lɛ, nyɛkanea ŋmalɛi etɛ ni atsɛ lɛ. No sɛɛ lɛ, ha ele akɛ yiŋtoi krokomɛi nɛɛhu ni akɛha lɛ hu fɛɛ yɛ Ŋmalɛ sɛɛfimɔ ni yɔɔ shiŋŋ, ni okɛmu owiemɔ lɛ naa.
7 Nibii Krokomɛi ni Yeɔ Buaa: Abaanyɛ akɛ wolo lɛ mli saji ataomɔ he ni yɔɔ sɛɛ lɛ hu atsu nii. Akɛ nɔkwɛmɔ nɔ lɛ, kɛji mɛi ni yɔɔ shikpɔŋkuku lɛ mli lɛ ateŋ mɛi pii nuɔ he akɛ jamɔi fɛɛ ji gbɛi sɔrɔtoi ni yaa Nyɔŋmɔ ŋɔɔ hu? No lɛ kwɛmɔ yitso ni ji ‘Nyɔŋmɔjamɔ’ shishi, he ni yitso bibioo ni ji “‘jamɔi fɛɛ yeɔ egbɔ’: 12” yɔɔ lɛ. Enɛ feɔ bɔ ni saji ataomɔ he lɛ baanyɛ aye abua wɔ ni wɔna saji kɛha sanegbaa lɛ he nɔkwɛmɔ nɔ. Kɛji okɛ mɛi ni heee Nyɔŋmɔ nɔ amɛyeee miigba sane lɛ, wɔbaanyɛ wɔkɛ kukuji 1 kɛ 2 ni yɔɔ baafa 329 lɛ atsɔɔ amɛ, he ni wieɔ ŋmɛnɛŋmɛnɛ beaŋ hemɔkɛyeli ni bɛ lɛ he lɛ. Mɛi ni biɔ sane yɛ Biblia lɛ he, kɛji etsɔɔ nɔ ni jamɔi pii shiɛɔ lɛ titri baana otii enumɔ, ni ji ‘Sanebimɔi ni Esa Akɛ Ana Hetoo Aha Amɛ,’ ni yɔɔ baafai 17-18 lɛ he miishɛɛ waa.
8 Kɛji wɔkɛ nɔtsamɔ gbɛi ni mɔɔ shi jogbaŋŋ tsu nii ni wɔkɛwie Mankind’s Search for God wolo lɛ he lɛ, no lɛ wɔbaanyɛ wɔye wɔbua gbɔmɛi ni wɔkɛwieɔ lɛ koni amɛtao anɔkwa Nyɔŋmɔ koome, ni ji Yehowa sɛɛ gbɛ.