Okɛ Hiɛtserɛjiemɔ Be Atsu Nii kɛ Sɛɛnamɔ
1 Asumɔɔ hiɛtserɛjiemɔ, ejaakɛ ekɛ tsakemɔ ni haa mɔ he jɔɔ lɛ yɛ gbɔmɔtsoŋ kɛ jwɛŋmɔŋ baa. Hiɛtserɛjiemɔ kpakpa kanyaa mɔ loo ehaa mɔ naa miishɛɛ. Nɔ ni ehii ji akɛ hiɛtserɛjiemɔ baanyɛ afee nɔ ni fiteɔ nii ni sɛɛnamɔ baŋ enɛ he.
2 Akɛ nɔkwɛmɔ nɔ lɛ, ani ebaafee nɔ ni kɛ shishinumɔ ni yɔɔ Yohane 13:35 lɛ kɛ Yesaia 2:4 kpaa gbee kɛ Kristofonyo ko kase karate, judo kɛ abɔtirifɔ̃ɔ mli awuiyeli nitsumɔi, ni ekɛ ehe wo enɛ mli akɛ nɔ ni ekɛjieɔ ehiɛtserɛ? Agbɛnɛ ani ebaasa Yehowa ni “hiŋmɛi yɔɔ krɔŋŋ tsɔ bɔ ni [e]kaakwɛ nɔ fɔŋ” lɛ hiɛ, kɛ Kristofonyo lɛ fite be ekɛkwɛ mpleshii ni akɛyeɔ awui, tamɔ abɔtirifɔ̃ɔ kɛ atswɛrɛnɔmɔ, yɛ Video kɛ televishin nɔ?—Heb. 1:13.
3 Eji anɔkwale akɛ, nɔ ni wɔkɛ wɔhiŋmɛii naa ni yaa wɔjwɛŋmɔ mli lɛ baanyɛ asa wɔhe kɛha ekpakpa loo efɔŋ. (Mat,. 5:28) No hewɔ lɛ ehe miihia ni wɔ hiɛtserɛjiemɔ lɛ afee nɔ ni hi ni kɛ Filipibii 4:8 kpaa gbee. Yɛ ŋmalɛ nɛɛ hewɔ lɛ, wɔnyɛŋ wɔtsɛ mpleshii ni akɛyeɔ awui, tamɔ abɔtirifɔɔ, karate, kɛ atswɛrɛnɔmɔ akɛ nɔ ni hi, ni no hewɔ lɛ sɛɛnamɔ bɛ he akɛ Kristofonyo kɛ ehe aaawo enɛ mli loo ekwɛmɔ mli.(Lala 11:5; 97:10) Kwɛmɔ The Watchtower, February 15, 1983, baafa 27, yɛ ‘Ansɔ lɛ Yii’ shishi kɛha emlitsɔɔmɔ lolo.