Shiɛmɔ ni Ayaaa Daa Nyɔŋ nɔ ni Aaaye nɔ Kunim
1 Lalatsɛ lɛ wie kɛkɔ Yehowa he akɛ: “Majie oyi gbi fɛɛ gbi.” (Lala 145:2a) Be ni eshwɛ kɛha yiwalɛ nibii agbɛjianɔtoo fɔŋ nɛɛ faaa kwraa. No hewɔ lɛ, akɛ Yehowa tsuji ni wɔjɔɔ wɔhe nɔ lɛ, wɔ gbɛnaa nii ji ni wɔkɛ “yijiemɔ afɔle” fɛfɛo aha Lɛ “gbi fɛɛ gbi,” kɛtsɔ sɔɔmɔ nitsumɔ lɛ mli ni wɔkɛ wɔhe aaawo daa nɔ. (Heb. 13:15) Ani oofee nakai?
2 Anɔkwa Kristofonyo ko bɛ ni baakpoo hegbɛ ni ji sanekpakpa lɛ shiɛmɔ lɛ yɛ gbɛ ni ja nɔ. Akɛni ‘Kristofoi ji je lɛ la’ hewɔ lɛ, esa akɛ mɔ fɛɛ mɔ ato gbɛjianɔ ni ekɛ ehe awo asafo lɛ sɔɔmɔ nitsumɔ he gbɛjianɔtoo lɛ mli daa. (Mat. 5:14) Mɛi ni tsuɔ amɛ diɛŋtsɛ amɛnitsumɔ lɛ baanyɛ ato gbɛjianɔ ni amɛkɛ gbi kome ama shi kɛha shiɛmɔ yɛ otsi lɛ mli. Agbɛnɛ kɛ afee tsakemɔi fioo yɛ be mli lɛ, mɛi pii baana be amɛha sɛɛsaramɔi kɛ Biblia kasemɔi yɛ gbɛkɛnaashi. Weku lɛ mlibii baanyɛ asaa amɛhe daa, ni amɛtsu nii kutuu yɛ sɔɔmɔ lɛ mli yɛ be kɛ bei amli (Abɛi 27:17; Jaj. 4:9, 10) Ehe miihia ni wumɛi aye abua amɛŋamɛi kɛ amɛbii ni amɛkɛ amɛhe awo sɔɔmɔ lɛ mli daa ni amɛbu akɔntaa amrɔ daa nyɔŋ nɔ.—Okɛto 1 Timoteo 3:4, 12 he.
3 Kɛ amɛsaa amɛhe jogbaŋŋ kɛ su ni sa hu lɛ, mɛi ni he yeɔ lɛ kɛ biianyɛmɛi ni amɛfɔ ehee lɛ po baanyɛ aye mɛi ni basaraa amɛ lɛ odase trukaa. (Lala 113:1-3; Okɛto Luka 21:2-4 he.) Ha Biblia lɛ, dɛhiɛmɔ woji, kɛ woji tɛtrɛbii ahi omasɛi kpaakpa koni okɛ ŋaa atsake sanegbaa lɛ kɛya Maŋtsɛyeli lɛ nɔ. Buu nɔ fɛɛ nɔ ni ooonyɛ otsu yɛ nyɔŋ lɛ miilɛ he akɔntaa amrɔ nɔŋŋ. Kɛ obaafa gbɛ dani nyɔŋ lɛ agbo hu lɛ, no lɛ okɛ okɔntaabuu lɛ ashi dani oya. Kɛ oofa gbɛ lɛ, hiɛmɔ dɛhiɛmɔ woji kɛ woji tɛtrɛbii ni okɛtsu nii yɛ trukaa odaseyeli mli. Bɔɔ mɔdɛŋ ni oya kpeei ni okɛ ohe awo sɔɔmɔ nitsumɔ lɛ mli kɛ nyɛmimɛi lɛ yɛ he fɛɛ he ni ooofa gbɛ kɛaaya.
4 Esa akɛ nɔkwɛlɔi lɛ kɛfee oti ni ma amɛhiɛ akɛ amɛ diɛŋtsɛ amɛaaye amɛbua nyɛmimɛi lɛ yɛ sɔɔmɔ nitsumɔ lɛ mli. Ehe baahia ni amɛnyiɛ hiɛ yɛ kutuu odaseyeli mli. Kɛ nɔkwɛlɔi lɛ kɛ shiɛlɔi lɛ ye sharamɔ yɛ nɛkɛ gbɛ nɔ lɛ, amɛbaanyɛ amɛyɔse naagbai ni mɛi ni he waaa lɛ kɛkpeɔ lɛ koni amɛyɛ amɛbua amɛ ni amɛkatsɔmɔ mɛi ni eyaaa shiɛmɔ yɛ daa nyɔŋ nɔ. Akɛ nɔ ni baaye abua enɛ lɛ, esa akɛ ama gbɛjianɔtoo akɛ mɛi enyɔ kɛ amɛhe abɔ kɛba shiɛmɔyaa daa lɛ nɔ mi. Abaanyɛ abi ni shiɛlɔi ni he esa lɛ kɛ gbɛgbalɔi aye abua mɛi ni egbɔjɔ lɛ yɛ sɔɔmɔ nitsumɔ lɛ mli. Nikasemɔ nɔkwɛlɔi baanyɛ akai nyɛmimɛi lɛ ni amɛbu sɔɔmɔ nitsumɔ lɛ he akɔntaa amrɔ nɔŋŋ dani nyɔŋ lɛ agbo kwraa. Esa akɛ woloŋmalɔ lɛ akwɛ akɔntaabuu ni akɛba lɛ mli amrɔ nɔŋŋ koni edi mɛi ni ebuko amɛ akɔntaa lɛ asɛɛ—mɛi komɛi ahiɛ baakpa nɔ eyɛ mli akɛ ekolɛ amɛkɛ amɛhe ewo sɔɔmɔ nitsumɔ lɛ mli.
5 Onukpai, asafoŋ sɔɔlɔi, gbɛgbalɔi kɛ shiɛlɔi ni yɔɔ ekãa lɛ he afee oya yɛ mɛi ni eyaaa shiɛmɔ yɛ daa nyɔŋ nɔ lɛ ayelikɛbuamɔ mli. Nyɛhaa wɔfeɔ babaoo yɛ Kristofoi asɔɔmɔ nitsumɔ lɛ mli, ni wɔfɔse yijiemɔ wɔshwie shi wɔha Yehowa, wɔ-Nyɔŋmɔ ni mli hi lɛ, “gbɛkɛ kɛ leebi kɛ shwane!”—Lala 55:18; 1 Kor. 15:58.