Sanebimɔ He

◼ Ani esa akɛ wɔtswa Asafo lɛ tɛlifon ni wɔkɛtao Biblia mli sanebimɔi ahetoi aloo ni wɔkɛbi ŋaawoo ni he hiaa wɔ diɛŋtsɛ?

Gbɔmɛi babaoo kɛ tɛlifon tsuɔ amɛnibii ahe nii oya, shi bei pii lɛ, jeee saji he nitsumɔ oya kɛkɛ yɔɔ enɛ mli. Afɔɔ namɔ yɛ je lɛŋ akɛ mɛi kɛ nɔ ni hi ha amɛ lɛ feemɔ yeɔ klɛŋklɛŋ gbɛhe; gbɔmɛi sumɔɔɔ ni amɛkɛ hiɛmiamɔ tsuɔ nibii ahe nii.

Kwɛ bɔ ni esoro ŋaawoo ni Nyɔŋmɔ kɛhaa wɔ lɛ kwraa! Ewoɔ wɔ hewalɛ ni wɔtao nilee sɛɛ gbɛ tamɔ jwetri ni aŋɔtee, ni tsɔɔ akɛ esa akɛ wɔsumɔ akɛ wɔɔmia wɔhiɛ. Niiashikpamɔ tsɔɔ hu akɛ nakai ni wɔɔfee lɛ baaha wɔna miishɛɛ ni hiɔ shi daa.​—Abɛi 2:​1-4.

Nɛkɛ mɔdɛŋbɔɔ nɛɛ sa kɛji sanebimɔ ko te shi beni wɔsaa wɔhe kɛhaa kpeei mli gbɛfaŋnɔ namɔ aloo beni wɔ diɛŋtsɛ wɔkɛ naagba ko ekpe. Ni wɔɔtswa Asafo lɛ telifon oya nɔŋŋ moŋ lɛ, wɔɔna he sɛɛ waa kɛ wɔ diɛŋtsɛ wɔtao saji amli yɛ Biblia lɛ kɛ wɔwoji lɛ amli, titri lɛ Watch Tower Publications Index lɛ kɛ emli Ŋmalɛi kɛ saji ataomɔ hei ni he yɔɔ sɛɛnamɔ lɛ.

Yɛ be mli ni ‘wɔtao jwetri ni aŋɔtee’ nɛɛ sɛɛ lɛ, wɔbaanyɛ wɔya wɔ asafo lɛ mli onukpai lɛ ateŋ mɔ ko ŋɔɔ kɛji yelikɛbuamɔ he miihia wɔ lolo. Onukpai lɛ yɛ Biblia mli nilee kɛ niiashikpamɔ babaoo kɛha saji amlitaomɔ. Amɛ yelikɛbuamɔ ni ŋmɛɔ pɛpɛɛpɛ lɛ he baaba sɛɛnamɔ, titri lɛ kɛ wɔmiitao ŋawoo yɛ wɔ diɛŋtsɛ wɔ naagba loo yiŋkpɛɛ ko he ejaakɛ amɛji mɛi ni bɛŋkɛ wɔ kpaakpa ni amɛle wɔshihilɛ hu.​—Okɛto Bɔfoi 8:​31, 31 he.

Kɛ etamɔ nɔ ni saji babaoo he miihia lolo kɛjɛ Asafo lɛ ŋɔɔ tɛɛ lɛ, no lɛ bei pii lɛ ehi akɛ aaaŋma wolo. (Kwɛmɔ kmGA February 1975, Sanebimɔ He.) Onukpai lɛ baanyɛ amɛye amɛbua yɛ enɛ hu he nitsumɔ mli. Wolo ni tamɔ nɛkɛ baaha ana be kɛha ehetoo-hamɔ ni damɔ nii amlitaomɔ ni sa kɛ sane lɛ hesusumɔ nɔ, nɔ̃ ni bei pii lɛ ehiii feemɔ kɛ atswa tɛlifon lɛ.