Shiɛmɔ ni Ayaaa Daa Nyɔŋ Nɔ Beni Ayaa Skul Iɛ ni Aaaye nɔ Kunim
1 Skulyaa he miihia ni asumɔɔ hu waa diɛŋtsɛ. Yɛ Odasefoi ni yaa skul lɛ ateŋ mɛi pii agbɛfaŋ lɛ, skul nitsumɔi ni aaaha ekɛ sɔɔmɔ nitsumɔi krokomɛi tamɔ shiɛmɔyaa nɛkɛ, aŋmɛ pɛpɛɛpɛ lɛ bafeɔ kaa kɛhaa amɛ. Mɛni amɛbaanyɛ amɛfee ni amɛtsu nii daa yɛ sanekpakpa lɛ Jajemɔ mli?
2 Klɛŋklɛŋ kwraa lɛ ehe miihia ni nikaselɔ fɛɛ nikaselɔ akai akɛ enikasemɔ lɛ ji gbɛ ni atsɔɔ nɔ akɛshɛɔ nɔ ko feemɔ he kɛkɛ. Yehowa sɔɔmɔ yɛ anɔkwayeli mli, kɛ enɔkpɛlɛmɔ namɔ kɛha naanɔ wala ni ka wɔhiɛ lɛ he yɛ sɛɛnamɔ kwraa fe enɛ. Yɛ Filipibii 1:10 kɛ nitsumɔ naa, akɛ ‘wɔyoo nii ni hi titri lɛ,’ sɔɔlɔi obalaŋtai ni yaa skul lɛ kɛ nilee tseɔ be ni amɛkɛtsuɔ skul kpamɔ sɛɛ nifeemɔi tamɔ kpɔiaŋgbɔlemɔ, drama kui kɛ nibii krokomɛi ahe nii lɛ nɔ.
3 Bɔ ni Be he Gbɛjianɔtoo he Hiaa Ha: Be he gbɛjianɔtoo kpakpa yeɔ ebuaa ni aŋmɛɔ pɛpɛɛpɛ yɛ skul nitsumɔi ni akɛba shia kɛ hesaamɔ kɛha klas nikasemɔ, akɛ nɔ kome, kɛ agbɛnɛ teokrase nifeemɔi hu ákɛ nɔ kroko hu lɛ mli, yɛ otsi lɛ mli aloo yɛ otsii lɛ anaagbee.
4 Shikpɔŋkuku Krɛdɛɛ Ko: Kɛ skul ni awɔɔ jɛmɛ lɛ eko oyaa lɛ, mɛni hewɔ oŋɔɔɔ oskul lɛ akɛ shikpɔŋkuku krɛdɛɛ ko? Esa akɛ skulbii fɛɛ ni ji Odasefoi abɔ mɔdɛŋ ni amɛjie jeŋba kpakpa kpo. (1 Pet. 2:12) Bei pii lɛ ehaa onyɛɔ onaa hegbɛi okɛjieɔ ohe kpo akɛ Yehowa Odasefonyo, ni be babaoo lɛ ehaa onanemɛi tsiɔ bɛŋkɛɔ bo ni amɛbiɔ bo Biblia mli saji. Bo diɛŋtsɛ hu obaanyɛ oŋɔ hegbɛ lɛ ni okɛye amɛ odase trukaa koni otsɔ nakai feemɔ nɔ okɛ ohe awo shiɛmɔ nitsumɔ lɛ mli babaoo. Aawo mɛi fɛɛ hewalɛ ni amɛsaa amɛti sane ni yitso ji “Bo hu, Obaanyɛ Oye Omanye yɛ Trukaa Odaseyeli Mli,” ni yɔɔ June 1990 Wɔ Maŋtsɛyeli Sɔɔmɔ lɛ baafa 3 lɛ mli kɛha ŋaawoo ni anyɛɔ akɛtsuɔ nii.
5 Fɔlɔi, nyɛyea nyɛbuaa nyɛbii ni yaa skul lɛ ni amɛhiɛa be he gbɛjianɔtoo kpakpa ni haa skul nitsumɔi kɛ teokrase nifeemɔi ŋmɛɔ pɛpɛɛpɛ mli. Nyɛfataa amɛhe yɛ shiɛmɔ nitsumɔ lɛ mli ni nyɛwoa amɛ hewalɛ. Nyɛmaa bɔ ni ehe hiaa ni amɛbu shiɛmɔ nitsumɔ he akɔntaa oya yɛ nyɔŋ lɛ naagbee nɔ mi nyɛhaa amɛ, kɛ nɔ ni fe fɛɛ lɛ, ni amɛkɛ amɛsusuma fɛɛ atsu nii yɛ sɔɔmɔ krɔŋŋ mli.