Wolo Ni Wɔkɛhaa Yɛ August Lɛ Ni Wɔkɛaatsu Nii Kɛmɔ Shi
1 Asafo lɛ kɛ mlihilɛ efee woji sɔrɔtoi babaoo eha wɔ bɔni afee ni ekɛha kaselɔfeemɔ nitsumɔ lɛ aya hiɛ waa. Amɛteŋ ekomɛi ji woji ni anyɛɔ akɛwoɔ kotoku mli aloo nɔ ni hiɛ baafai 192, ni wieɔ saneyitsei pɔtɛɛ ahe, tamɔ Nyɔŋmɔ yiŋtoo kɛha shikpɔŋ lɛ, miishɛɛ weku shihilɛ, bɔ ni aaafee asaa ana anɔkwa toiŋjɔlɛ ekoŋŋ, bɔ ni aaafee atsu obalaŋtaiaŋ naagbai ahe nii, kɛ nɔdaamɔ nɔ ni wɔkɛkpɛlɛɔ Biblia lɛ nɔ akɛ Nyɔŋmɔ Wiemɔ lɛ nɛkɛ. Yɛ August mli lɛ, wɔkɛ Happiness—How to Find It kɛ Making Your Family Life Happy woji lɛ baatsu nii ni wɔkɛye wɔbua mɛi yɛ wɔshikpɔŋkuku lɛ mli. Mɛɛ gbɛ nɔ wɔɔtsɔ wɔfee enɛ ni emɔ shi?
2 Happiness—How to Find It wolo lɛ kɛ nɔdaamɔ haa kɛha miishɛɛ namɔ, yɛ je nɛŋ jaramɔ shihilɛi nɛɛ amli. Mɛɛ gbɛ nɔ wɔɔtsɔ wɔwie he? Eyɛ mli akɛ mɛi pii buɔ niyenii kɛ atadei babaoo ni ayɔɔ, gbɔmɔtsoŋ hewalɛ kpakpa, shia kpakpa kɛ naanyobɔɔ ni ŋɔɔ akɛ hiamɔ nii moŋ, shi babaoo he miihia kɛha anɔkwa miishɛɛ namɔ. Wolo lɛ klɛŋklɛŋ yitso lɛ gbalaa jwɛŋmɔ kɛyaa enɛ nɔ.
3 Beni otsɔɔ mɔ ni oji sɛɛ lɛ, obaanyɛ okɛɛ nɔ ko tamɔ nɛkɛ:
◼ “Mɛni obaakɛɛ akɛ no ji nɔdaamɔ nɔ kɛha naanɔ miishɛɛ namɔ?” Ŋmɛɛ gbɛ ni eha hetoo. Kanemɔ Jajelɔ 2:22, 23. No sɛɛ lɛ gbelemɔ Happiness wolo lɛ baafa 7 ni nyɛsusu kuku 9 lɛ klɛŋklɛŋ fa lɛ he kuku, kɛ agbɛnɛ kuku 13 yɛ baafai 8 kɛ 9. No sɛɛ lɛ, gbalamɔ ejwɛŋmɔ kɛya baafa ni atsɔɔ emli saji yɛ he ni atsɔɔ naagbai komɛi ahetoo ni Biblia lɛ kɛhaa lɛ yɛ wolo lɛ mli lɛ, ni okɛ miishɛɛ aha lɛ hegbɛ kɛha shia Biblia mli nikasemɔ feemɔ. Kɛ eheee wolo lɛ, mɛni hewɔ ohaaa lɛ dɛhiɛmɔ wolo, tamɔ Miishɛjemɔ Kɛha Mɛi ni Ehao Lɛ aloo Shihilɛ yɛ Toiŋjɔlɛ Jeŋ Hee ko Mli, ni oto gbɛjianɔ ni oyasara lɛ kɛha sanegbaa?
4 Weku shihilɛ miifite kwraa yɛ wɔbe nɛɛ mli. Anɔkwa ni gbalashihilɛ mli hefatalɔi yeee, shaahii kɛ shaayei ni kɛ amɛhe woɔ amɛbii agbalashihilɛ mli saji amli, bii atoigbele, shika gbɛfaŋ naagbai, gbekɛbii ni kɔɔ jeŋba shara kɛ hɔ-jiemɔ, tsofai fɔji kɛ nitsumɔ ni miiya hiɛ, kɛ wɔɔhei ni ehiii bɔ ni sa fata naagbai ni eha miishɛɛ weku shihilɛ namɔ ewa waa lɛ ahe. Family Life wolo lɛ kɛ ŋaawoo ni yeɔ ebuaa, ni jɛ Nyɔŋmɔ Wiemɔ lɛ mli haa, koni eye ebua ni akɛye nɛkɛ naagbai wuji nɛɛ anɔ kunim. Ekolɛ abaana hiɛkpamɔ wiemɔi ni nyiɛ sɛɛ nɛɛ ahe miishɛɛ.
5 Obaanyɛ okɛɛ akɛ:
◼ “Mɛi pii biɔ akɛ, ‘Ani abaanyɛ ana miishɛɛ weku shihilɛ ni ekomefeemɔ yɔɔ mli lɛ mli ŋɔɔmɔ ŋmɛnɛ?’ Ani bo hu osusu enɛ he da? Ŋmɛɛ gbɛ ni eha hetoo, koni otsa nɔ akɛ: “Kadimɔ akɛ Efesobii 3:14 kɛ 15 wieɔ Nyɔŋmɔ he akɛ weku shihilɛ Shishitolɔ. Ele adesai ataomɔ nii ni eesumɔ ni wɔna miishɛɛ, no hewɔ lɛ ewoɔ wɔ ŋaa yɛ weku shihilɛ he.” Kɛ okane ŋmalɛ lɛ ogbe naa lɛ, gbalamɔ ejwɛŋmɔ kɛya Family Life wolo lɛ baafai 9 kɛ 10 ni nyɛkane kuku 14. Enɛ baanyɛ atsa nɔ kɛya kukuji ni tsara nɔ yɛ nakai yitso lɛ mli lɛ he sanegbaa kuku nɔ. Okɛ wolo lɛ aha lɛ ni oha ehala yitso ko kɛha ehesusumɔ be kroko ni obaaba obasara lɛ. Kɛ shiatsɛ lɛ heee wolo ko lɛ, obaanyɛ okɛ Na Weku Shihilɛ Mli Ŋɔɔmɔ dɛhiɛmɔ wolo lɛ aha lɛ.
6 Woji ni eba yɛ ebe naa ni wɔkɛaatsɔɔ mɛi ni tamɔ gwantɛŋi lɛ sanekpakpa lɛ ji nɔ ko ni wɔteŋ mɔ fɛɛ mɔ baanyɛ afee. Wɔbaanyɛ wɔye wɔbua gbɔmɛi ni jɛ shihilɛi sɔrɔtoi fɛɛ mli ni amɛkɛ amɛhe abɔ Nyɔŋmɔ gbɛjianɔtoo lɛ he koni hetooi ni Biblia lɛ kɛhaa yɛ ŋmɛnɛ naagbai ahe lɛ he aba sɛɛnamɔ aha amɛ. Eji hegbɛ ni wɔna akɛ wɔkɛ wɔhe aaawo shiɛmɔ nitsumɔ lɛ mli, beni wɔkɛ woji enyɔ ni akɛhaa yɛ August mli lɛ tsuɔ nii kɛmɔɔ shi lɛ.