Hiɛaŋkwɛmɔ ni Wɔkɛtsuŋ Nii yɛ Wɔ Sɔɔmɔ Nitsumɔ Iɛ Mli
1 “Nyɔŋmɔ jeee mɛi ahiɛaŋkwɛlɔ,” Petro kɛɛ, shi “mɔ ni sheɔ lɛ gbeyei ni etsuɔ jalɛ nii lɛ, lɛ ji mɔ ni saa ehiɛ.” (Bɔf. 10:34, 35) Wɔtsuɔ wɔ sɔɔmɔ nitsumɔ lɛ he nii ŋmɛnɛ yɛ nakai anɔkwale ni ajaje faŋŋ lɛ nɔkpɛlɛmɔ mli. No hewɔ lɛ, ehe miihia ni wɔbɔ mɔdɛŋ fɛɛ ni wɔɔnyɛ ni wɔye gbɛtsii nii ni baatsi wɔnaa koni wɔkaha sanekpakpa lɛ miishɛ mɔ fɛɛ mɔ ŋɔɔ lɛ nɔ.
2 Kɛ wɔmiishiɛ yɛ shia kɛ shia yɛ hei komɛi lɛ, efɔɔ kaa akɛ wɔkɛ mɛi kpeɔ ni amɛwieee loo amɛnuuu wiemɔ ni wɔkɛtsuɔ nii yɛ wɔ asafo lɛ mli lɛ. Wiemɔ he naagba lɛ tsiɔ mɛi komɛi anaa ni ehaaa amɛna Maŋtsɛyeli shɛɛ sane ni wɔshiɛɔ lɛ he sɛɛ jogbaŋŋ kɛmɔ shi. Mɛni wɔbaanyɛ wɔfee ni naagba ni haaa wɔnyɛ wɔkɛ sanekpakpa lɛ ashɛ gbɔmɛi lɛ aŋɔɔ kɛmɔ shi lɛ nɔ?
3 Kɛ okɛ mɔ ko kpe yɛ oshikpɔŋkuku lɛ mli ni enuuu wiemɔ ni owieɔ lɛ, no lɛ esa akɛ oto gbɛjianɔ ni okɛ shiɛlɔ ko ni jɛ nyɛ asafo lɛ mli aloo asafo ni bɛŋkɛ nyɛ lɛ mli, ni nuɔ shiatsɛ lɛ wiemɔ lɛ aku sɛɛ aya jɛmɛ ekoŋŋ. Gbɛ kroko hu ji ni okɛ eshia adrɛs aloo ehe saji krokomɛi ni he hiaa lɛ aha onukpai lɛ, ni otsɔɔ wiemɔ ni enuɔ, ni onukpai lɛ baato gbɛjianɔ ni mɔ ko aya eŋɔɔ. Esa akɛ afee enɛ kɛji mɔ lɛ ejieko miishɛɛ kpo yɛ anɔkwale lɛ he po. Kɛji oleee asafo ko ni bɛŋkɛ nyɛ ni awieɔ nakai wiemɔ lɛ yɛ mli po lɛ, kɛlɛ obaanyɛ okɛɛ onukpai lɛ bɔni afee ni woloŋmalɔ lɛ aŋma wolo kɛyaha asafo loo kuu ni bɛŋkɛ nyɛ ni tsuɔ gbɔmɛi ni wieɔ nakai wiemɔ lɛ ahe nii lɛ.—Kwɛmɔ Sanebimɔ He yɛ November 1990 Wɔ Maŋtsɛyeli Sɔɔmɔ lɛ mli; agbɛnɛ hu September 1984 nɔ lɛ baafa 4.
4 Yɛ shihilɛi komɛi amli lɛ, ekolɛ enɛ he ebahiaŋ. Akɛ nɔkwɛmɔ nɔ lɛ, yɛ hei komɛi lɛ, ekolɛ gbɔmɛi ni wieɔ wiemɔ pɔtɛɛ ko lɛ ayi fa saŋŋ yɛ akutso kome ko mli yɛ shikpɔŋkuku lɛ mli. Yɛ gbɛ kroko nɔ lɛ, ekolɛ gbɔmɛi ni wieɔ wiemɔ pɔtɛɛ ko lɛ egbɛ eshwa babaoo. Ekolɛ ebaabi ni asafo loo kuu ni kɛ nakai wiemɔ lɛ tsuɔ nii lɛ atsu shikpɔŋkuku agbo mli nii koni amɛshɛ amɛŋɔɔ, ni no hewɔ lɛ amɛhiɛ baasɔ yelikɛbuamɔ ni akɛaaha amɛ koni amɛle mɛi ni amɛbaanyɛ amɛye amɛbua amɛ lɛ waa.
5 Kɛji asafo loo kuu ko bɛ nakai shikpɔŋkuku lɛ mli fɛɛ ni baanyɛ aye odase yɛ wiemɔ ni ataoɔ nɛɛ mli lɛ, ekolɛ shiɛlɔ ko yɛ nakai maŋ lɛ mli asafoi lɛ ekome mli ni nuɔ nakai wiemɔ lɛ, ni ebaanyɛ eya mɔ lɛ ŋɔɔ. Eyɛ mli akɛ ekolɛ enɛ efɔɔɔ baa moŋ, shi kɛ anaaa mɔ ko ni wieɔ nakai wiemɔ lɛ, yɛ be mli ni abi maŋtiase nɔkwɛlɔ lɛ hu sɛɛ lɛ, no lɛ esa akɛ nakai asafo lɛ mli nyɛmimɛi lɛ abɔ mɔdɛŋ bɔ ni amɛaanyɛ ni amɛye mɔ lɛ odase kɛ. Na Wala Mli Ŋɔɔmɔ Kɛya Naanɔ yɛ Shikpɔŋ Nɔ! wolo lɛ nyɛɔ eyeɔ ebuaa waa yɛ shihilɛi ni tamɔ nɛkɛ mli.
6 Esa akɛ shiɛlɔ fɛɛ shiɛlɔ hiɛ ahi ehe nɔ ni ekɛ asafoi ni wieɔ wiemɔi sɔrɔtoi yɛ eshikpɔŋkuku lɛ mli lɛ afee ekome kɛye ebua gbɔmɛi ni ekɛkpeɔ yɛ shiɛmɔ mli lɛ ni amɛnu yiwalaheremɔ sane lɛ. Kɛ wɔbɔ mɔdɛŋ waa akɛ wɔkɛ sanekpakpa lɛ aaashɛ gbɔmɛi fɛɛ ŋɔɔ, ni amɛwiemɔ kɔɔɔ he eko lɛ, no lɛ wɔmiijie wɔ-Nyɔŋmɔ, Yehowa, “mɔ ni sumɔɔ akɛ ehere gbɔmɛi fɛɛ yiwala, koni amɛshɛ anɔkwalɛ lɛ lee mli” lɛ suɔmɔ lɛ kpo.—1 Tim. 2:4.
7 Mɛɛ hegbɛ bei amli wɔyɔɔ nɛkɛ! Eba akɛ wɔɔtswa wɔfai shi daa akɛ wɔɔha ‘mɔ ni sumɔɔ lɛ abayɛ wala nu lɛ yaka,’ ni maŋ nɔ wiemɔ ni ewieɔ kɔɔɔ he eko.—Kpoj. 22:17.