Sanebimɔ He
◼ Ani eji tɔmɔ akɛ Yehowa webii aaatse kuu ko ni amɛkɛwowoo amɛhe hewalɛ?
Akɛ miishɛɛ Nyɔŋmɔ lɛ, Yehowa sumɔɔ ni esɔɔlɔi, obalaŋtai kɛ onukpai fɛɛ anya yɛ esɔɔmɔ mli (1 Tim. 1:11; 3 Mose 23:40) Ale Nyɔŋmɔ sɔɔlɔi anɔkwafoi lɛ akɛ amɛkɛ amɛhe wo hiɛtserɛjiemɔ kpakpa mli ni no hu ha amɛna naanyobɔɔ ni woɔ mɔ hewalɛ (2 Mose 15:20; 5 Mose 16:11, 14; Luka 5:29, 30; Yoh. 2:1, 2) No hewɔ lɛ jwɛŋmɔ ni abaana yɛ kuu ni aaatse yɛ asafo lɛ mli ni wɔkɛwowoo wɔhe hewalɛ kɛtsɔ henaabuamɔ kɛha hiɛtserɛjiemɔ nɔ lɛ baafee tamɔ nɔ ni ehe baaba sɛɛnamɔ.
Akɛni Biblia lɛ tsɔɔ akɛ je nɛŋ nɔyelɔ ni ji Satan lɛ etswa efai shi akɛ eeelaka mɛi ni hiɛ bɛ amɛhe nɔ lɛ hewɔ lɛ, ehe miihia ni wɔkɛ ŋaa atsu nii yɛ biɛ. (1 Yoh. 5:19; 1 Pet. 5:8, 9) Sɔlemɔi babaoo ni yɔɔ Kristendom lɛ yɛ kui ni amɛtse ni haa amɛkɛ amɛhe woɔ hiɛtserɛjiemɔi sɔrɔtoi amli—shishɛramɔi, niyelii, jooi, nihɔɔmɔi, kpɔiaŋgbɔlemɔi kɛ hiɛtserɛjiemɔ nifeemɔi krokomɛi ni akɛ fɛɛ miitsu nii koni akɛha sɔlemɔ lɛ mli bii lɛ anya sɔlemɔ lɛ mli nifeemɔi sɔrɔtoi lɛ ahe. No hewɔ lɛ, enɛ gbalaa amɛjwɛŋmɔ kɛ heloonaa nibii kɛjɛɔ nɔ ni sa akɛ efee Kristofoi anitsumɔ krɛdɛɛ ni ji Nyɔŋmɔ Maŋtsɛyeli lɛ shiɛmɔ lɛ he.—Mat. 24:14; okɛto Romabii 10:2, 3 he.
Wɔsumɔɔɔ ni wɔtamɔ je nɛɛ kɛtsɔ nifeemɔ ko ni tamɔ nɔ ni yeee awui lɛ ni aaatsɔ wɔ tsɔne lɛ nɔ. (Yoh. 17:16; Rom. 12:2) Kɛ kuu ko ni aaatse kɛha hiɛtserɛjiemɔ lɛ he susumɔ te shi lɛ, ebaafee nɔ ni sa akɛ Kristofonyo lɛ aaajwɛŋ nɛkɛ sanebimɔi nɛɛ ahe ni ekɛpɛi lɛ diɛŋtsɛ emli ekwɛ: Enɛ kɛ mɛni baafata mimumɔŋ shidaamɔ he? Mɛɛ gbɛ nɔ eeetsɔ eha mihesaai akɛ sɔɔlɔ lɛ aya hiɛ? Mihenɔjɔɔmɔ lɛ mli be enyiɛ enɛ baahe? Ni mishika gbɛfaŋ hu? Yɛ henaabuamɔi lɛ amli lɛ, mɛɛ gbɔmɛi nɛkɛ mikɛ amɛ aaabɔ? Ani Kristofoi onukpai ni baafee nɔkwɛmɔ nɔ kpakpa baahi jɛmɔ aloo mitipɛŋfoi lɛ ji mɛi ni baafee nakai? Ani nifeemɔi ni baaya nɔ yɛ jɛmɛ lɛ kɛ woo baaha Yehowa kɛ egbɛjianɔtoo lɛ?
Kɛ jeŋba fɔŋ ko eyaaa nɔ yɛ kuu lɛ nifeemɔi amli po lɛ, ehe miihia ni wɔha Kristofoi asafo lɛ yiŋtoo krɛdɛɛ lɛ ahi wɔ jwɛŋmɔ mli—ni wɔye wɔbua mɛi fɛɛ ni yɔɔ tsuijurɔ lɛ ni amɛna anɔkwale lɛ he nilee kɛtsɔ Nyɔŋmɔ Mesia Maŋtsɛyeli lɛ he shiɛmɔ kɛ ehe nitsɔɔmɔ nɔ. (Mat. 28:19, 20) Yɛ be ni wɔyɔɔ mli nɛɛ hewɔ lɛ, ebiɔ ni wɔkɛ oyaiyeli agbala wɔ jwɛŋmɔ kɛya nitsumɔ nɛɛ nɔ. (1 Kor. 7:29a; okɛto Mateo 26:45 he.) No hewɔ lɛ esa akɛ Kristofonyo lɛ kɛ sɔlemɔ asusu sane nɛɛ he jogbaŋŋ ni ekpɛ yiŋ ni kɛ Ŋmalɛi lɛ kpaa gbee.—Rom. 14:16-18.
Kɛ yɛ bei komɛi amli lɛ mɛi komɛi to amɛyiŋ akɛ amɛaafɔ nine amɛtsɛ nanemɛi Kristofoi kɛba amɛshiai amli, akɛ nɔkwɛmɔ nɔ lɛ kɛha hiɛtserɛjiemɔ lɛ, belɛ ekã mɛi ni fɔɔ nine tsɛɔ mɛi lɛ anɔ akɛ amɛkwɛ ni akɛ Kristofoi ashishitoo mlai atsu nii, ni kɛ mɛi lɛ ayi faaa lɛ anyɛɔ akudɔɔ amɛ jogbaŋŋ. Henaabuamɔ ni tamɔ nɛkɛ lɛ sa jogbaŋŋ moŋ, shi esoro no yɛ kuu ni atsɛɔ ni ji nɔ tuuŋtu ni nikasemɔ nɛɛ wieɔ he lɛ he.
Yɛ be mli ni anɔkwa Kristofoi yɔseɔ bɔni ehe hiaa ni ajie hiɛtserɛ lɛ, amɛhaa ehiɔ amɛjwɛŋmɔ mli akɛ esa akɛ ‘amɛteke nɔ yɛ Nuŋtsɔ lɛ nitsumɔ lɛ mli’ dani nibii agbɛjianɔtoo nɛɛ aba naagbee. (1 Kor. 15:58) No hewɔ lɛ akɛ aŋkroaŋkroi kɛ kuu lɛ, esaaa ni wɔŋmɛɔ gbɛ koni hiɛtserɛjiemɔ nifeemɔi agbala wɔjwɛŋmɔ kɛjɛ mumɔŋ gbɛnaa nii ni he hiaa titri lɛ anɔ.—Mat. 6:24; Jaj. 11:9, 10.