Fi Nyɛ Asafo lɛ Maŋshiɛmɔ Gbɛjianɔtoo lɛ Sɛɛ Kɛmɔ Shi

¹ Be ko lɛ, obalanyo ko na dɛhiɛmɔ wolo ko ni miitswa asafo ni yɔɔ maŋ lɛ mli lɛ kpeei ahe adafi. Akɛni eetao anɔkwale lɛ hewɔ lɛ, ekpɛ eyiŋ akɛ ebaaya eyabo Maŋshiɛmɔ ni abaaha enɔ Hɔgbaa lɛ toi, ni eyashɛ asa lɛ nɔ mra. Shiɛlɔ ko kɛ miishɛɛ ŋa lɛ, ni beni ekɛ lɛ gbaa sane lɛ, ekɛɛ lɛ akɛ ebaasumɔ ni ekɛ lɛ akase Biblia lɛ, shi nuu lɛ ekpɛlɛɛɛ. Shi, ena maŋshiɛmɔ ni wielɔ lɛ saa ehe jogbaŋŋ ni ebaha lɛ he miishɛɛ aahu akɛ no ha etsake ejwɛŋmɔ, ni beni akpa kpee lɛ, ekpɛlɛ nikasemɔ lɛ nɔ. Nɛkɛ obalanyo nɛɛ tee nɔ oyayaayai ni abap­tisi lɛ yɛ nyɔji komɛi asɛɛ. Kɛ hoo lɛ, wɔbaanyɛ wɔkase nibii etɛ ni yeɔ ebuaa waa kɛjɛ niiashikpamɔ nɛɛ mli.

² Klɛŋklɛŋ kwraa lɛ, atswa Maŋshiɛmɔ lɛ he adafi. Ani owieɔ nyɛ asafo lɛ kpeei ahe ni okɛtswaa he adafi? Beni sɛinɔtalɔ lɛ tswaa maŋshiɛmɔ ni abaaha yɛ otsi ni baanyiɛ sɛɛ lɛ mli lɛ he adafi lɛ, susumɔ mɛi ni yɔɔ oshikpɔŋkuku lɛ mli ni ekolɛ amɛbaana nakai sane lɛ he miishɛɛ waa lɛ ahe, kɛji amɛbɔi wɔ woji lɛ kanemɔ aloo amɛkaneee po. Mɛi komɛi sumɔɔɔ nikanemɔ, aloo nikanemɔ wa waa kɛha amɛ, shi ekolɛ amɛbaasumɔ ni amɛbo wiemɔ ni abaaha ni kɔɔ Ŋmalɛ mli saneyitso ko he lɛ toi.

³ Nɔ ni ji enyɔ lɛ, akɛ miishɛɛ here mɔ hee lɛ hiɛmɛɛ. Kɛ oto gbɛjianɔ koni oshɛ asa lɛ nɔ mra bɔ ni ooonyɛ lɛ, obaanyɛ oŋa onyɛ­mi­mɛi hii kɛ yei lɛ, kɛ mɛi heei ni eba kpee lɛ hu. (Heb. 10:24) Kɛ́ no ji klɛŋklɛŋ kwraa ni mɔ hee ko baa kpee lɛ, no lɛ ekolɛ eleŋ nɔ ni ebaakpa gbɛ. Gbalamɔ mli otsɔɔ lɛ akɛ wɔkpeei lɛ jeɔ shishi kɛ lala kɛ sɔlemɔ, koni otsɔɔ lɛ bɔ ni abaafee kpee lɛ aha. Kɛ́ esa lɛ, fɔ̃ɔ lɛ nine ni ebata omasɛi koni onyɛ okɛ lɛ akwɛ o-Biblia kɛ olala wolo lɛ mli. Kɛɛmɔ lɛ koni kɛ eyɛ saji komɛi ni ebaasumɔ ni ebi lɛ, ni ebi bo ni oha lɛ hetoo kɛji akpa kpee lɛ.

⁴ Nɔ ni ji etɛ lɛ, aha wiemɔ lɛ jogbaŋŋ. Mɛi ni naa hegbɛ akɛ amɛaadamɔ asafo lɛ najiaŋ akɛ mɛi ni haa maŋshiɛmɔ lɛ fiteɔ ŋmɛlɛ­tswai babaoo ni amɛkɛsaa amɛhe ni amɛtĩɔ wiemɔ lɛ mli bɔni afee ni ekanya toibolɔi lɛ kɛha suɔmɔ babaoo kɛ nitsumɔi kpakpai hu. Wɔteŋ mɔ fɛɛ mɔ yɛ nɔnyɛɛ shishi ŋmɛnɛ, ni Nyɔŋmɔ Wiemɔ lɛ mli anɔkwalei ni haa mɔ hejɔɔmɔ lɛ ji nɔ ni he hiaa wɔ koni wɔnyɛ wɔŋmɛ wɔtsui shi. Shi, bɔ fɛɛ bɔ ni nikasemɔ yɔɔ maŋshiɛmɔ lɛ mli eha po lɛ, kɛ wɔbooo nɔ ni awieɔ lɛ toi jogbaŋŋ lɛ, no lɛ ehe sɛɛnamɔ bibioo ko pɛ wɔɔnyɛ wɔna. Ani bei komɛi lɛ ewaa kɛhaa bo akɛ oooha ojwɛŋmɔ anyiɛ wiemɔ lɛ sɛɛ? Ekolɛ eeeye ebua bo kɛji oŋmala otii kukuji ko­mɛi, tamɔ bɔ ni wɔfɔɔ feemɔ yɛ kpeei wuji ashishi lɛ. Kwɛmɔ ni onyiɛ Ŋmalɛi fɛɛ ni atsɛɔ lɛ kanemɔ sɛɛ yɛ o-Biblia lɛ mli beni akaneɔ ni agbalaa mli lɛ.

⁵ Asafo lɛ kɛ maŋshiɛmɔi ni kɔɔ Biblia mli saji sɔrɔtoi ahe eha. Onukpai akuu lɛ tsuɔ nii kɛtsɔɔ onukpai asɛinɔtalɔ lɛ aloo nyɛmi nuu ko ni ehala lɛ lɛ nɔ ni amɛkɛtoɔ asafo lɛ Maŋshiɛmɔ he gbɛjianɔ. Amɛhalaa saneyitsei ni Asafo lɛ kɛha lɛ ekomɛi koni etsu asafo lɛ hiamɔi ni yɔɔ amrɔ lɛ ahe nii. Kaaha nɛkɛ saji ni he hiaa nɛɛ eko miiŋmɛɛ bo, ni ofi nyɛ asafo lɛ daa otsi Maŋshiɛmɔ gbɛjianɔtoo lɛ sɛɛ kɛmɔ shi.