Sanebimɔ He

◼ Mɛɛ nifeemɔ gbɛ esa akɛ atsɔ nɔ kɛ akɛ yiŋkpɛi miifɔ asafo lɛ hiɛ ni amɛsusu he?

Yiŋtoo he miihia kɛji esa akɛ akpɛ yiŋ yɛ saji ni he hiaa waa ahe, tamɔ nɔ ko ni abaahe, Maŋtsɛyeli Asa lɛ saamɔ aloo emaa, tooyeli krɛdɛɛ ni akɛbaamaje Asafo lɛ, aloo shika ni akɛbaatsu kpokpaa nɔkwɛlɔ lɛ kwɛmɔ he nii. Bei pii lɛ, ehi jogbaŋŋ akɛ akɛ yiŋkpɛɛ lɛ afɔ asafo lɛ hiɛ kɛha amɛnɔkpɛlɛmɔ be fɛɛ be ni akɛ asafo lɛ shika baafee nɔ ko.

Ekolɛ be pɛ ni afeŋ nakai ji shihilɛi komɛi ni tsɔɔ hiamɔ nii krɛdɛɛi ni kɔɔ saji loo nitsumɔi komɛi ni he hiaa lɛ ahe. Akɛ nɔkwɛmɔ nɔ lɛ, ekolɛ asafo lɛ baakpɛ eyiŋ shikome akɛ ekɛ shika pɔtɛɛ ko baamaje Asafo lɛ daa nyɔŋ nɔ ni ekɛfi Maŋtsɛyeli sɔɔmɔ lɛ sɛɛ. Agbɛnɛ, shikai komɛi ni awoɔ daa yɛ Maŋtsɛyeli Asa lɛ he, tamɔ nu kɛ srawa hewalɛ kɛ nibii ni akɛsaa jɛmɛ lɛ ahe ehiaaa yiŋkpɛɛ feemɔ.

Kɛ hiamɔ ko je kpo faŋŋ lɛ, esa akɛ onukpai akuu lɛ asusu sane lɛ he jogbaŋŋ. Kɛji amɛteŋ mɛi ni fa kpɛlɛ nɔ akɛ ehe miihia ni afee nɔ ko yɛ he lɛ, no lɛ esa akɛ onukpai lɛ ateŋ mɔ kome, eko­lɛ Asafo Sɔɔmɔ Ajinafoi lɛ ateŋ mɔ ko aŋma yiŋkpɛɛ lɛ awo wolo nɔ ni akɛfɔ asafo lɛ hiɛ yɛ Sɔɔmɔ Kpee lɛ mli.

Esa akɛ onukpa ni kwɛɔ nɔ akɛ sɛinɔtalɔ lɛ agbala hiamɔ ni yɔɔ lɛ mli kuku ni emli aka shi faŋŋ, kɛ bɔ ni onukpai akuu lɛ susuɔ akɛ abaanyɛ atsu he nii aha. No sɛɛ lɛ abaaha asafo lɛ hegbɛ ni amɛbibii saji ni he hiaa yɛ he. Kɛji sane lɛ yɛ haŋ­tsii lɛ, ebaahi ni amɛ kɛyashi Sɔɔmɔ Kpee kroko ni baanyiɛ sɛɛ lɛ dani afɔ oshiki kɛhala emli nɔ ni asumɔɔ, koni mɔ fɛɛ mɔ ana be ni ekɛsusu he. Abaafɔ oshiki lɛ kɛtsɔ niji anɔholemɔ nɔ kɛkɛ.

Asafo lɛ mli bii ni ejɔɔ amɛhe nɔ ni abaptisi amɛ pɛ yɔɔ hegbɛ akɛ amɛfɔɔ oshiki yɛ yiŋkpɛɛ ko he. Efeŋ nɔ ni sa akɛ saralɔi ni jɛ asafoi krokomɛi amli kɛ amɛhe aaawo mli.

Kɛ akpɛlɛ yiŋkpɛɛ lɛ nɔ agbe naa lɛ, esa akɛ aŋma date yɛ nɔ, ni onukpai ni tsu he nii lɛ kɛ amɛnine awo shishi, ni akɛto asafo lɛ woji amli.