Nyɛkɛ Woji ni Etsu lɛ Hu Atsũa Nii!
1 Esoro Buu-Mɔɔ Asafo lɛ kwraa yɛ woji ni tsɔɔ Biblia lɛ mli ni amɛkálaa lɛ mli. Mɛi babaoo yɛ Yehowa gbɛjianɔtoo lɛ mli ŋmɛnɛ ni amɛbatsɔmɔ Odasefoi kɛtsɔ nɛkɛ Biblia kasemɔ he woji nɛɛ akasemɔ nɔ. Eka shi faŋŋ akɛ, mɛi pii kɛ amɛhe baabɔ Yehowa webii ahe yɛ wɔsɛɛ be mli yɛ be mli ni ayaa nɔ akɛ woji nɛɛ tsuɔ nii lolo yɛ shiɛmɔ mli lɛ.
2 Yɛ be mli ni akala woji ni tamɔ nɛkɛ lɛ ekomɛi yɛ woji kpakpai anɔ lɛ, akala ekrokomɛi hu yɛ woji ni hiɛ tsuɔ nɔ. Bɔ fɛɛ bɔ ni wolo lɛ su ji ha lɛ, sane kome too lɛ nɔŋŋ yɔɔ mli, ejaakɛ ejɛɔ Nyɔŋmɔ Wiemɔ lɛ mli. (2 Tim. 3:16, 17) No hewɔ lɛ sane nɛɛ miitswa gbɛjianɔtoo krɛdɛɛ ko he adafi yɛ woji fɛɛ ni etsu lɛ ahe, ni ji akɛ, woji ni amɛsu etsake yɛ wolo pɔtɛɛ ni akala yɛ nɔ hewɔ lɛ. Mɛni ji nɛkɛ gbɛjianɔtoo krɛdɛɛ nɛɛ?
3 Wɔkɛ woji fɛɛ ni etsu lɛ baaha amrɔ nɔŋŋ kɛ jara ni waaa ni bɔ ni amɛtsɛ yɛ woji atoohe lɛ amɛha kɔɔɔ he eko. Ato nyɔji komɛi ama shi kɛha tafaa krɛdɛɛ koni akɛ woji ni etsu nɛɛ atsu nii yɛ nyɔji fioo ko ni eho lɛ amli. Shi, amrɔ nɛɛ, akɛ tafaa lɛ tsuŋ nii kɛhaŋ nyɔji pɔtɛɛ komɛi pɛ shi moŋ akɛbaatsu nii yɛ afi muu lɛ fɛɛ mli kɛyashi be mli ni wɔɔnyɛ wɔkɛ woji ni etsu lɛ fɛɛ ni yɔɔ asafo lɛ mli kɛ nitsumɔ he nine lɛ woji atoohei lɛ fɛɛ aha ni eta.
4 Shiɛlɔ fɛɛ shiɛlɔ baanyɛ ahe woji fɛɛ ni etsu ni hiɛ baafai 416 loo 384 loo 192 lɛ kɛ jara ni ji ₵350 ni nakai jara lɛ nɔŋŋ akɛbaaha maŋbii. Daa gbɛgbalɔi baahe woji lɛ yɛ jara ni ji ₵180 ekome.
5 Yɛ nɛkɛ be nɛɛ mli lɛ ehe ebahiaŋ ni asafoi lɛ kɛ woji ni etsu lɛ he inventory amaje nitsumɔ he nine lɛ dɔŋŋ. Akɛ inventory ni tamɔ nakai lɛ efata wolo SH September 25, 1991 ni wɔŋma kɛyaha asafoi fɛɛ lɛ he momo. Aakpa onukpai afai akɛ amɛkwɛ wolo SH January 13, 1992 ni wɔŋma kɛyaha onukpai akui fɛɛ lɛ mli, akɛ nɔ ni akɛmaa enɛ nɔ mi. Kɛ onukpai lɛ kwɛ amɛ woji amli ni amɛ asafo lɛ kɛ inventory ni esa akɛ amɛkɛmaje yɛ 1991 mli ni kɔɔ woji ni etsu lɛ ahe lɛ emajeko lɛ, amɛbaanyɛ amɛfee nakai bianɛ, koni ajaje shika akɔntaabuu lɛ jogbaŋŋ. SH January 13, 1992 wolo lɛ tsɔɔ woji ni abaanyɛ aŋmala ashwie shi kɛ nɔ ni esaaa akɛ aŋmalaa ashwieɔ shi. Enɛ kɔɔ asafoi ni kɛ inventory ni awie he lɛ emajeee yɛ 1991 mli lɛ pɛ he. Enɛ he miihia waa diɛŋtsɛ.
6 Akɛni anyɛ akɛ woji lɛ ha yɛ jara ni baa shi naa yɛ 1991 mli hewɔ lɛ, asafoi pii yɛ ni amɛwoji ahe akɔntaabuu lɛ baatsɔɔ akɛ woji ahe shika ni amɛyɔɔ lɛ efa fe nyɔmɔ ni amɛhiɛ lɛ yɛ jara ni baa shi ni atsɔɔ ni akɛ woji etsu lɛ aha yɛ naa bianɛ lɛ hewɔ. Enɛ baasaa asafoi ni hiɛ nyɔmɔ yɛ woji amli lɛ akɔntaabuu lɛ. Kɛha asafoi ni amɛ woji ahe akɔntaabuu lɛ yɔɔ pɛpɛɛpɛ lɛ, kɛ shika ni amɛna lɛ bafa saŋŋ lɛ, amɛbaasusu he po akɛ amɛkɛ shika ni eteke nɔ lɛ aaake Asafo lɛ koni amɛkɛba shika ni amɛbua lɛ shi. Asafoi lɛ akabi nyɔmɔ nɔtsemɔ kɛ gbɛgbalɔi kɛ shiɛlɔi he woji ni etsu lɛ kɛjɛ amɛ woji atoohe lɛ. Nɔ hewɔ lɛ ji akɛ, kɛ abiii ni nyɔmɔ nɔtsemɔ po lɛ, shika lɛ eko baaba abagbe nɔ ni amɛyɔɔ lɛ yi trukaa yɛ jara ni baa shi ni atsɔɔ ni ji ₵350 kɛha shiɛlɔi kɛ ₵180 kɛha gbɛgbalɔi lɛ hewɔ.
7 Nyɛhaa wɔteŋ mɔ fɛɛ mɔ kɛ hegbɛ krɛdɛɛ ni wɔna akɛ wɔkɛ woji ni etsu ni atse nɔ koni wɔkɛye wɔbua mɛi pii kɛba wala gbɛ lɛ nɔ lɛ atsua nii.—Jaj. 11:6.