Nɔkwɛmɔ Nɔ Kpakpa He Miihia Gbekɛbii
1 Wɔmli filiɔ wɔ akɛ wɔyɛ obalaŋtai ni amɛyi faa daa ni ‘miijie Yehowa gbɛi lɛ yi.’ (Lala 148:12, 13) Amɛteŋ mɛi pii yɛ ni amɛdarako kwraa lolo yɛ afii amli. Tsɔsemɔ kɛ nɔkwɛmɔ nɔ ni amɛfɔlɔi kɛ onukpai krokomɛi ni yɔɔ asafo lɛ mli kɛhaa lɛ ji nɔ ni haa amɛyaa hiɛ babaoo. Shi kɛlɛ, nɔ ni esaaa akɛ akuɔ hiɛ ashwieɔ nɔ ji hewalɛ ni obalaŋtai krokomɛi naa yɛ amɛnɔ lɛ, titri lɛ mɛi ni eshwɛ fioo ni amɛaaye afii nyɔŋmai enyɔ kɛyaa lɛ loo mɛi ni eho nakai afii lɛ ahe fioo lɛ. Kɛ oye afii ni tamɔ enɛɛmɛi eko lɛ, saji nɛɛ he baaba sɛɛnamɔ aha bo.
2 Ewaaa akɛ obalaŋtai ni yeko afii nyɔŋma-kɛ-enyɔ kɛyaa lɛ aaakase obalaŋtai ni edara lɛ. Amɛyɛ adebɔɔ su ko akɛ amɛaatamɔ nanemɛi ni bɛŋkɛɔ amɛ kpaakpa ni amɛsumɔɔ amɛ sane lɛ. Amɛsumɔɔ ni amɛna obalaŋtai krokomɛi ni amɛdara fe amɛ fioo ni feɔ amɛ nii tamɔ amɛle nii ni amɛtee hiɛ saŋŋ fe amɛ lɛ ahe miishɛɛ. Nɔ ni jɛɔ mli baa ji, amɛbaakase nyɛwiemɔ kɛ jeŋba kɛ bɔ ni nyɛhiɛ sɔɔ mumɔŋ nibii nyɛhaa kɛ bɔ ni nyɛkɛ nyɛhe woɔ asafo lɛ nitsumɔi amli lɛ hu.
3 Akɛ obalaŋta ni miihe aye afii nyɔŋmai enyɔ lɛ, oyɛ hegbɛ kɛ gbɛnaa nii ni tsii hu ni ka onɔ. Amrɔ nɛɛ, etamɔ nɔ ni onɔkwɛmɔ nɔ lɛ miina hewalɛ yɛ onanemɛi bibii lɛ anɔ. Bi ohe akɛ, ‘Mɛɛ hewalɛ nɛkɛ minaa yɛ gbekɛbii lɛ anɔ? Ani mihiɛ dɔɔ, ni mikwaa kwashiaianifeemɔ kɛ “obalahiaŋ sɛɛdii” gbohii lɛ? Ani mijieɔ toiboo kɛ bulɛ kpo mitsɔɔ mifɔlɔi, asafoŋ onukpai, kɛ onukpai krokomɛi?’ (2 Tim. 2:22; Kol. 3:20) Nɔ ni okɛɔ ni ofeɔ lɛ baanyɛ afee nɔ titri ni náa gbekɛbii bibii ni kwɛɔ onifeemɔ nii lɛ amumɔŋ nɔyaa lɛ nɔ hewalɛ lɛ.
4 Maŋtsɛyeli shɛɛ sane lɛ shiɛmɔ ji asafo lɛ nitsumɔ titri. Ohe ni ooosumɔ ni okɛwo mli ni ooofee nakai daa lɛ baanyɛ awo onanemɛi lɛ ahewalɛ koni amɛfee ekãa babaoo. Kɛ onyɛ okɛ ohe wo gbɛgbamɔ sɔɔmɔ lɛ mli lɛ, ebaakanya onanemɛi lɛ yɛ gbɛ ni tamɔ nakai nɔŋŋ nɔ. Sane hetoo yɛ kpeei ashishi kɛ ohe ni okɛaaha ni oye obua ni atsu nitsumɔi ni he hiaa yɛ Maŋtsɛyeli Asa lɛ nɔ lɛ hu baanyɛ afee nɔkwɛmɔ nɔ kpakpa.
5 Eyɛ mli akɛ Timoteo eho afii nyɔŋma-kɛ-enyɔ kɛmiimɔ nyɔŋmai-enyɔ beni Paulo kɛ ŋaawoo ni nyiɛ sɛɛ nɛɛ ha lɛ lɛ moŋ, shi nyɛ obalaŋtai lɛ hu baanyɛ ni nyɛkɛtsu nii, ni ji akɛ: “Okɛ ohe ato okadi oha mɛi ni heɔ yeɔ lɛ, yɛ wiemɔ mli, yɛ jeŋba mli, yɛ suɔmɔ mli, . . . yɛ hemɔkɛyeli mli, yɛ hetsemɔ mli.” (1 Tim. 4:12) Ohe ni okɛwoɔ Yehowa sɔɔmɔ mli kɛ tsui muu fɛɛ hu lɛ baanyɛ akanya onanemɛi kɛ gbekɛbii ni naa bo lɛ yɛ gbɛ ni tswaa mɔ emaa shi lɛ nɔ, ni eye ebua amɛ ni amɛya hiɛ ni amɛtsɔmɔ hii ni edara jogbaŋŋ yɛ mumɔŋ. (Efes. 4:13) Obalaŋtai ni jɛ wekui ni kpaako amɛkaseɔ Biblia lɛ amlibii baanyɛ aba anɔkwale lɛ mli kɛtsɔ nɔ ni amɛnaa ni ofeɔ lɛ nɔ.
6 Nɔ ni he hiaa fe fɛɛ lɛ, ekãa ni ofeɔ yɛ Nyɔŋmɔ jamɔ sui ni ojieɔ lɛ kpo lɛ mli lɛ woɔ Yehowa kɛ egbɛjianɔtoo lɛ hiɛ nyam. (Abɛi 27:11) Mɛi ni hiɛ tsui kpakpa ni naa bo lɛ anaa baakpɛ amɛhe yɛ sɔrɔtofeemɔ agbo ni ka bo kɛ obalaŋtai krokomɛi ni yɔɔ je lɛŋ lɛ ateŋ lɛ. No hewɔ lɛ oyɛ hegbɛ ko ni ekaaa ni okɛaaye obua gbekɛbii bibii yɛ be mli ni otsuɔ nii babaoo kɛhaa Yehowa yijiemɔ lɛ.—Lala 71:17.