Nɔkwɛmɔ Nɔ ni Wɔɔnyiɛ Sɛɛ Kpaakpa

¹ Ŋwanejee ko bɛ he akɛ Yesu ji gbɔmɔ ni fe mɔ fɛɛ mɔ ni ehi shi pɛŋ. Efee nɔkwɛmɔ nɔ ni eye emuu efɔ shi eha ekaselɔi lɛ. Eyɛ mli akɛ wɔnyɛŋ wɔshɛ he ni eye emuu kɛyashɛ lɛ he pɛpɛɛpɛ moŋ, shi awoɔ wɔ hewalɛ ni ‘wɔnyiɛ enanemaa hei lɛ asɛɛ.’ (1 Pet. 2:21) Esa akɛ wɔsumɔ akɛ wɔɔtamɔ Yesu bɔ ni wɔɔnyɛ, ni wɔkɛ mɛi krokomɛi awie anɔkwale lɛ he kɛ ekaa.

² Yesu fe shiɛlɔ folo kɛkɛ; eji tsɔɔlɔ ni he esa fe mɔ fɛɛ mɔ. “Mɛi lɛ ahe jɔ̃ amɛhe yɛ enitsɔɔmɔ lɛ hewɔ.” (Mat. 7:28) Mɛni hewɔ enitsumɔ mɔ shi nakai lɛ? Ha wɔsusu “enitsɔɔmɔ” lɛ he jogbaŋŋ wɔkwɛ.

³ Bɔ ni Wɔbaanyɛ Wɔnyiɛ Yesu Sɛɛ Wɔha: Yesu Tsɛ etsɔɔ lɛ nii. (Yoh. 8:28) Oti ni ma ehiɛ ji ni ekɛ woo aha Yehowa ni ewo E-gbɛi lɛ hiɛ nyam. (Yoh. 17:​4, 26) Esa akɛ oti ni ma wɔhiɛ yɛ wɔ shiɛmɔ kɛ nitsɔɔmɔ lɛ mli ji ni wɔwo Yehowa hiɛ nyam, ni wɔkagbala jwɛŋmɔ kɛmiiba wɔnɔ.

⁴ Nɔ fɛɛ nɔ ni Yesu tsɔɔ lɛ damɔ Nyɔŋmɔ Wiemɔ lɛ nɔ. Etee nɔ etsɛ nɔ ni aŋma yɛ Ŋmalɛi ni jɛ mumɔŋ lɛ mli lɛ sɛɛ be fɛɛ be. (Mat. 4:​4, 7; 19:4; 22:31) Wɔmiitao wɔgbala wɔ toibolɔi ajwɛŋmɔ kɛ­ya Biblia lɛ nɔ; wɔkɛ nakai feemɔ baaha amɛna akɛ nɔ ni wɔshiɛɔ ni wɔtsɔɔ lɛ damɔ hegbɛ ni nɔ kwɔ fe fɛɛ nɔ.

⁵ Yesu kɛ wiemɔi kukuji ni anyɛɔ akɛtsuɔ nii, ni mli kã shi faŋŋ tsu nii. Akɛ nɔkwɛmɔ nɔ lɛ, beni etsɔɔ bɔ ni wɔɔfee wɔna Nyɔŋmɔ dɛŋ eshaifaa lɛ, ewo wɔ hewalɛ ni wɔ diɛŋtsɛ hu wɔkɛ sane ake mɛi kro­ko­mɛi. (Mat. 6:​14, 15) Esa akɛ wɔbɔ mɔdɛŋ ni wɔgbala Maŋtsɛyeli shɛɛ sane lɛ mli yɛ wiemɔi ni yɔɔ mlɛo, ni mli kã shi faŋŋ mli.

⁶ Yesu kɛ abɛbuai kɛ sanebimɔi tsu nii yɛ hesaa mli ni ekɛ­ka­nya mɛi krokomɛi asusumɔi. (Mat. 13:​34, 35; 22:​20-22) Nɔkwɛmɔ nii ni ji daa gbi shihilɛ mli saji ni mɛi fɛɛ le lɛ baanyɛ aye abua gbɔmɛi ni amɛnu Biblia tsɔɔmɔi ni bɛ mlɛo lɛ ashishi. Esa akɛ wɔbi saji ni baawo wɔ toibolɔi lɛ hewalɛ ni amɛsusu nɔ ni amɛnuɔ lɛ he. Sanebimɔi ni kanyaa niiahesusumɔ baanyɛ aye abua amɛ ni amɛshɛ sanenaamuu ni ja he.

⁷ Yesu ná be ni ekɛgbala saji ni mli wa lɛ amli eha mɛi ni taoɔ amɛle nibii babaoo lɛ. Mɛi ni yɔɔ he miishɛɛ lɛlɛŋ, tamɔ eka­se­lɔi lɛ, nyɛ amɛnu nɔ ni Yesu tsɔɔ lɛ shishi jogbaŋŋ. (Mat. 13:​36) Wɔ hu esa akɛ wɔye wɔbua gbɔmɛi lɛ, kɛ amɛmiibi saji yɛ anɔkwayeli mli. Kɛ wɔleee hetooi lɛ, wɔbaanyɛ wɔyatao sane lɛ mli koni wɔku sɛɛ wɔkɛ saji ni wɔyana yɛ he lɛ aya amɛŋɔɔ ekoŋŋ yɛ sɛɛ mli.

⁸ Yesu kɛ nɔkwɛmɔ nɔ feemɔ hu tsɔɔ nii. Enɛ he nɔkwɛmɔ nɔ ji ekaselɔi lɛ anaji ahe ni efɔ lɛ, eyɛ mli akɛ eji amɛ-Nuntsɔ. (Yoh. 13:​2-16) Kɛ wɔjie heshibaa mumɔ kpo lɛ, ebaakanya mɛi ni wɔtsɔɔ amɛ nii lɛ ni amɛkɛ nɔ ni amɛkaseɔ lɛ atsu nii.

⁹ Yesu shɛ gbɔmɛi atsuii kɛ suɔmɔ ni amɛyɔɔ kɛha jalɛ lɛ he. Wɔ hu wɔmiitao ni wɔshɛ tsuii ahe. Wɔbɔɔ mɔdɛŋ akɛ wɔɔshɛ suɔmɔ ni yɔɔ adesai fɛɛ mli akɛ amɛja mɔ ko ni nɔ kwɔ fe amɛ, ni amɛkɛ mɛi krokomɛi ahi shi yɛ toiŋjɔlɛ kɛ miishɛɛ mli lɛ he.

¹⁰ Yɛ December mli lɛ, wɔbaanyɛ wɔkɛ mɛi krokomɛi agba nibii ni wɔkase yɛ Yesu he lɛ ahe saji kɛtsɔ Gbɔmɔ ni Fe Mɔ Fɛɛ Mɔ ni Ehi Shi Pɛŋ wolo lɛ kɛhamɔ nɔ. Ekolɛ Yesu nitsɔɔmɔ mli hesaai lɛ ni wɔɔkase lɛ baakanya anɔkwafoi lɛ ni amɛbo toi beni wɔgbalaa nibii ni etsɔɔ lɛ amli lɛ.​—⁠Mat. 10:⁠40.