Susumɔ Mɛi Krokomɛi Ahe—Fa 2
1 Wɔmiisumɔ ni wɔhiɛ wɔkɛ mɛi ni yɔɔ wɔ akutso lɛ mli lɛ ateŋ wekukpaa kpakpa mli, bɔ fɛɛ bɔ ni wɔɔnyɛ. Enɛ biɔ ni wɔjie bulɛ kpo wɔtsɔɔ hegbɛi ni amɛyɔɔ lɛ kɛ amɛhenumɔi hu.
2 Ale Yehowa Odasefoi yɛ jeŋba kpakpai ahewɔ. Bɔ ni wɔbaa wɔjeŋ yɛ akutso lɛ mli, yɛ skul, kɛ nitsumɔ he, kɛ wɔ kpeei ashishi hu lɛ, etsɔ sane ni awieɔ he ekpakpa.—Kwɛmɔ June 15, 1989 Buu-Mɔɔ lɛ baafa 20.
3 Nɔ ni fata jeŋba kpakpa he ji anɔkwayeli, mɔdɛŋbɔɔ kɛ hekamɔ, kɛ subaŋ kpakpa. Nɔ ni fata he hu ji ni wɔɔjie bulɛ kpo wɔtsɔɔ mɛi ni yɔɔ akutso lɛ mli yɛ hei ni yɔɔ wɔ Maŋtsɛyeli Asa lɛ masɛi lɛ. Abaanyɛ aku hiɛ afɔ wɔ Nyɔŋmɔjamɔ jeŋba yɛ gbɛi krokomɛi anɔ lɛ nɔ, kɛ wɔsusuuu wɔ akutsoŋbii ahe. Paulo wo wɔ hewalɛ koni ‘wɔba wɔjeŋ bɔ ni sa Kristo sanekpakpa lɛ.’—Fil. 1:27.
4 Nyɛmimɛi hii kɛ yei ni baa asafoŋ kpeei lɛ akwa henaabuamɔ yɛ nanegbɛ tsɔmɔ hei ni yɔɔ Maŋtsɛyeli Asa lɛ masɛi lɛ. Nyɛkwɛa jogbaŋŋ koni nyɛkabolɔa bɔ ni esaaa yɛ nyɛ sanegbaai amli, bɔ ni aaanyɛ anu he yɛ shiai ni bɛŋkɛ lɛ amli. Akaŋmɛ gbekɛbii agbɛ ni amɛmiijo foi kɛmiibote Maŋtsɛyeli Asa lɛ mli ni amɛmiijo foi kɛmiije kpo hu. Tsɔnei ashinaai ni aŋaa lɛ waa kɛ gbɛɛmɔ bɔ ni asusuuu he loo ni aaakpã tsɔnei amli blɛi lɛ baanyɛ agba akutsoŋbii anaa. Jeŋba ni tamɔ nɛkɛ ewieee asafo lɛ he ekpakpa. Agbɛnɛ hu, ehe miihia ni wɔfee toiboo wɔha tsɔne nyiɛmɔi ahe mlai fɛɛ, yɛ be mli ni wɔkudɔɔ tsɔne yɛ akutso lɛ mli lɛ.—Rom. 13:1, 2, 5.
5 Esaaa akɛ akɛ tsɔnei mamɔɔ mɛi ashikpɔŋ nɔ ni wɔbiii gbɛ loo ni akɛaamamɔ hei ni baatsimɔ tsɔnei lɛ agbɛ loo ni akɛaatsi tsɔnei anyiɛmɔ hei ni yaa shiai amli lɛ agbɛ. Yɛ hei ni asafoi etɛ loo ejwɛ kpeɔ yɛ Maŋtsɛyeli Asa kome mli lɛ, atoɔ kpeei ahe gbɛjianɔ gbi fɛɛ gbi yɛ otsi lɛ mli, ni enɛ biɔ ni ekomefeemɔ ni yɔɔ gbagbalii ahi onukpai akui lɛ ateŋ.—Kwɛmɔ October 1, 1988 Blɔfo Buu-Mɔɔ lɛ baafa 17 lɛ kuku 13.
6 Biblia lɛ woɔ wɔ hewalɛ ni ‘wɔfee nɔ fɛɛ nɔ ni wɔkɛwo Nyɔŋmɔ hiɛ nyam,’ ni mɛi ni yɔɔ sɛɛ lɛ ahesusumɔ fata he. (1 Kor. 10:31-33) Kɛ ‘wɔfó mɛi krokomɛi anɔ̃ mli lɛ,’ wɔgbaŋ amɛ toiŋjɔlɛ taomɔ naa yɛ gbɛ ni asusuuu he lɛ nɔ. (Fil. 2:4) Wɔbaakwa akutso lɛŋ jarayelɔi lɛ ajarayeli nifeemɔi ni wɔkɛ wɔhe aaawo mli lɛ hu.
7 Mɛi krokomɛi ahesusumɔ—yɛ asafo lɛ mli kɛ esɛɛ fɛɛ lɛ—ji bɔ ni wɔnuɔ he yɛ wɔtsuii amli lɛ kpojiemɔ yɛ kponɔgbɛ. Esa akɛ nɔ ni wɔfeɔ ni wɔkɛɔ lɛ atsɔɔ akɛ ‘wɔsumɔɔ wɔnanemɛi tamɔ bɔ ni wɔsumɔɔ wɔ diɛŋtsɛ wɔhe.’—Mat. 7:12; 22:39.