Gbekɛbii ni Aaaye Abua Amɛ koni Amɛshiɛ—Mɛɛ Gbɛ nɔ Mɛi Krokomɛi Aaanyɛ Aye Abua?

¹ Kojomɔ nifeemɔi ni jɛɔ Yehowa ŋɔɔ lɛ saa mɛi fɛɛ he—gbekɛbii kɛ onukpai. (Ezek. 9:5, 6; 1 Mose 7:22, 23.) No hewɔ lɛ gbɛnaa nii ka anɔkwa Kristofoi anɔ akɛ amɛye amɛbua gbɔmɛi sɔrɔtoi fɛɛ ni amɛna Nyɔŋmɔ hiɛ duromɔ dani emlifu gbi kpeteŋkpele lɛ ashɛ.—Zef. 2:2, 3.

² Yɛ saji enyɔ ni tsɔ hiɛ lɛ mli lɛ, asusu fɔlɔi agbɛnaa nii akɛ amɛye amɛbua ni amɛbii ashiɛ kɛ gbɛnaa nii ni ka gbekɛbii anɔ akɛ amɛtsu tsɔsemɔ ni tamɔ nakai lɛ he nii lɛ he. Wɔyɛ hekɛnɔfɔɔ akɛ fɔlɔi kɛ gbekɛbii fɛɛ miiya hiɛ fɛfɛo yɛ nakai otii lɛ kɛ nitsumɔ mli. Yɛ be mli ni eji fɔlɔi anitsumɔ titri akɛ amɛtsɔse amɛbii lɛ, mɛɛ gbɛ nɔ shiɛlɔi krokomɛi baanyɛ aye abua yɛ, koni nine ashɛ oti ni tsɔɔ akɛ aye abua gbekɛbii fɛɛ ni yɔɔ asafo lɛ mli koni amɛbatsɔmɔ shiɛlɔi lɛ nɔ?

³ Nɔ ni yijiemɔ kpakpa kɛbaa: Nibii ni jeɔ mɔ nijiaŋ wui eyi shihilɛ mli obɔ. Esaa gbekɛbii hu he. (Rom. 8:20) No hewɔ lɛ kwɛ bɔ ni wɔ fɛɛ wɔhiɛ sɔɔ yijiemɔ! Kɛ mɔ fɛɛ mɔ ni eda lɛ jie gbekɛ yi yɛ esui kpakpai tamɔ hetsemɔ, jeŋba kpakpa, kpee ni eyaa daa/loo saji ahetoohamɔ, mɔdɛŋ ni ebɔɔ yɛ Maŋtsɛyeli Asa lɛ mli saamɔ he, kɛ nibii krokomɛi ahe lɛ, etsɔɔ akɛ, amɛmiijie hiɛsɔɔ kpo yɛ mɔdɛŋ fɛfɛo ni ebɔɔ lɛ he, yɛ be mli ni awoɔ lɛ ŋaa ni etsu babaoo yɛ nakai beaŋ nɔŋŋ.

⁴ Shiɛlɔi ni edara lɛ baanyɛ ato gbɛjianɔ ni amɛkɛ gbekɛbii aya shiɛmɔ, kɛ amɛfɔlɔi anɔkpɛlɛmɔ, akɛ nɔkwɛmɔ nɔ lɛ, koni ayaja woji tɛtrɛbii kɛ dɛhiɛmɔ woji. Jiemɔ gbekɛ fɛɛ gbekɛ yi yɛ emɔdɛŋbɔɔ kɛ shihilɛ mli ni eyɔɔ lɛ naa. (1 Kor. 12:4-7) Feemɔ mɔ ni yɔɔ suɔmɔ ni tswaa mɔ maa shi, yɛ nɔ fɛɛ nɔ ni ofeɔ ni okɛɔ lɛ mli yɛ bɔ ni okɛ gbekɛbii yeɔ haa lɛ he.

⁵ Onukpai ayelikɛbuamɔ: Onukpai baanyɛ akadi gbekɛbii ni haa saji ahetoo ni kaneɔ ŋmalɛi yɛ kpeei ashishi lɛ, ni amɛkɛ miishɛɛ ajie amɛyi, ni be mli ni amɛbi gbɛ kɛjɛ amɛ fɔlɔi aŋɔɔ sɛɛ lɛ, amɛwo amɛ hewalɛ ni amɛha akɛ amɛ gbɛi awo Teokrase Sɔɔmɔ Skul lɛ mli. Enɛ baaye abua amɛ ni amɛhe asa yɛ shiɛmɔ mli. Kɛ gbekɛ ko tsɔɔ akɛ eesumɔ ni ebɔi shiɛmɔ lɛ, esa akɛ efɔlɔi kɛ onukpai lɛ hu atsu enibimɔ lɛ he nii amrɔ nɔŋŋ. (om bf. 99-100; w88 11/15 bf. 17) Asafo woloŋ nikasemɔ nɔkwɛlɔi baanyɛ akwɛ gbekɛbii ni yɔɔ kuu lɛ mli lɛ anɔyaa, ni amɛkwɛ kɛji akɛ amɛteŋ mɔ fɛɛ mɔ eto Biblia mli nikasemɔ he gbɛjianɔ ni yaa nɔ, koni amɛye amɛbua yɛ suɔmɔ mli.—Abɛi 27:23.

⁶ Ekolɛ amɛteŋ mɛi ni eho afii nyɔŋma kɛ enumɔ he fioo ni amɛkase anɔkwale lɛ kɛjɛ amɛ gbekɛbiiashi lɛ yɛ amɛ diɛŋtsɛ amɛ naagbai ni miigbala amɛsɛɛ kɛmiijɛ amɛ henɔjɔɔmɔ mli, shi kpee ni amɛyaa daa lɛ tsɔɔ akɛ anɔkwale lɛ he miishɛɛ ni amɛyɔɔ lɛ mli wa lolo. Onukpai asuɔmɔ kɛha Yehowa kɛ etooi lɛ ni amɛsusuɔ amɛhe oya lɛ baatsirɛ amɛ ni amɛye amɛbua gbekɛbii ni tamɔ nɛkɛ lɛ, ni amɛjaje naagbai fɛɛ ni amɛyɔɔ lɛ koni amɛya hiɛ.

⁷ Mɔ fɛɛ mɔ baanyɛ aye abua: Nɔ ni fe fɛɛ lɛ, shiɛlɔi ni edara lɛ anɔkwɛmɔ nii kpakpai, ekãa ni amɛjieɔ lɛ kpo yɛ shiɛmɔ mli, kɛ saji ahetoo kpakpai lɛ baafee yelikɛbuamɔ kɛha gbekɛbii ni yɔɔ asafo lɛ mli lɛ, koni amɛna shɛɛ sane ni hi fe fɛɛ kɛha adesai, ni kɔɔ Nyɔŋmɔ Maŋtsɛyeli lɛ he lɛ ni ashiɛɔ lɛ mli miishɛɛ ni anaa lɛ mli gbɛfaŋnɔ.—Luka 6:45; Fil. 3:17.