Okɛ Ekãafeemɔ Atao Biblia Mli Nikasemɔi
1 Odaseyelii babaoo ni yaa hiɛ tsɔɔ akɛ be ni jeŋ momo nɛɛ yɔɔ lɛ miitã. (2 Tim. 3:1-5) Te enɛ tsɔɔ tɛŋŋ? No tsɔɔ akɛ gbɔmɛi awala he eba oshara. Shi kɛlɛ, eyɛ wɔ hewalɛ mli akɛ wɔɔye wɔbua ni ahere mɛi komɛi ayiwala. (Abɛi 3:27) Yɛ enɛ hewɔ lɛ esa akɛ wɔkɛ ekãafeemɔ abɔ mɔdɛŋ ni wɔje Biblia mli nikasemɔi ashishi koni wɔkwɛ ni eya nɔ.
2 Wɔ Biblia kasemɔ he woji ni wɔkɛhaa lɛ ahe eba sɛɛnamɔ waa. Shi nɔ ni he hiaa mɛi fe fɛɛ ji ni aaaye abua amɛ kɛtsɔ daa shia Biblia mli nikasemɔ nɔ. Te wɔbaafee tɛŋŋ wɔye wɔbua ni amɛyɔse lɛ nakai?
3 Wɔbaanyɛ wɔtee sanebimɔi ni kɔɔ mɛi babaoo he lɛ ashi. Sanebimɔi ni tamɔ nɛkɛ baanyɛ agbala jwɛŋmɔ kɛya nɔ hewɔ ni jeŋba ekpɔtɔ kwraa, nɔ hewɔ ni weku shihilɛ nyɛɛɛ afi shi kwraa, nɔ hewɔ ni basabasa-feemɔ kɛ awuiyeli woɔ mɔ he gbeyei nakai, nɔ hewɔ ni Nyɔŋmɔ ni yɔɔ suɔmɔ lɛ ŋmɛɔ ŋmɛnɛŋmɛnɛ shihilɛi lɛ agbɛ, kɛ ekrokomɛi lɛ anɔ. Ha ohiɛ ahi ohe nɔ yɛ saji kɛ nibii ni yaa nɔ lɛ ni kɔɔ mɛi ni yɔɔ akutso ni oyɔɔ mli lɛ ahe waa diɛŋtsɛ lɛ he. Tsɔɔmɔ Biblia mli hetooi ni yɔɔ faŋŋ ni kɔɔ sanebimɔi nɛɛ ahe lɛ. Tsɔɔmɔ bɔ ni woji ni wɔkɛhaa lɛ baanyɛ aye abua koni amɛkase nɔ ni Biblia lɛ yɔɔ kɛɛmɔ yɛ enɛɛmɛi kɛ saji krokomɛi ni he hiaa ni saa wɔ fɛɛ wɔhe lɛ ahe.
4 Ehe miihia ni oha shiatsɛ lɛ kɛ ehe awo sanegbaa lɛ mli. Ohiɛ ahi ohe nɔ ni onyɛ ona nɔ ni kɔɔ ehe. Ha osanegbaa lɛ akɔ nɔ ni esumɔɔ loo enaagbai ahe. Gbalamɔ jwɛŋmɔ kɛya saji ni yɔɔ wolo, wolo bibioo, wolo tɛtrɛɛ, loo dɛhiɛmɔ wolo ko ni tsɔɔ adesai anaagbai anaa tsabaa ni yɔɔ Biblia mli lɛ anɔ. Teemɔ sanebimɔ kome loo enyɔ ni oheɔ oyeɔ akɛ no baaha ekpa gbɛ akɛ oooba ekoŋŋ lɛ shi, dani oya. Kɛ oba ekoŋŋ lɛ, kwɛmɔ ni okai lɛ yɛ sanebimɔi nɛɛ ahe, koni no sɛɛ lɛ okɛ wolo lɛ aye abua lɛ kɛtao hetooi ni jɛ Biblia lɛ mli.
5 Nikasemɔi ni wɔɔje shishi ni wɔkwɛ ni eya nɔ daa lɛ baanyɛ atsake gbɔmɛi ashihilɛi. Ehe miihia ni wɔtsɔɔ akɛ wɔyɛ he miishɛɛ yɛ anɔkwayeli mli akɛ wɔɔle nɔ ni gbaa mɛi ni wɔkɛkpeɔ yɛ shiɛmɔ loo yɛ trukaa odaseyeli mli lɛ anaa lɛ. Ebiɔ hesaamɔ kpakpa koni akɛtee amɛ miishɛɛ lɛ shi fiofio. Ebiɔ tsuishitoo dani onyɛ oyasara amɛ daa kɛyashi beni oooha amɛná mumɔŋ niyenii ni baa daa. Ebiɔ ni ana mɛi lɛ ahe anɔkwa miishɛɛ diɛŋtsɛ. Esa akɛ wɔkɛ anɔkwayeli aye abua amɛ koni ahere amɛyiwala kɛjɛ hiɛkpatamɔ ni bɛŋkɛɔ lɛ mli. Esa akɛ wɔsɔle daa kɛ ekãa yɛ wɔ Biblia mli nikasemɔ nitsumɔ lɛ he.—1 Tes. 5:17.
6 Eji hewalɛwoo babaoo diɛŋtsɛ akɛ aaana akɛ abaptisi mɛi aaashɛ akpekpei kome yɛ afii etɛ ni ho lɛ mli. (Mat. 28:19, 20) Amrɔ nɛɛ wɔmiifee Biblia mli nikasemɔi ni fa fe akpekpei ejwɛ kɛ fã daa nyɔŋ nɔ, ni enɛ tsɔɔ bɔ ni wɔsusuɔ mɛi krokomɛi awala he waa wɔhaa. Ni bo hu? Ani okɛ ekãafeemɔ miibɔ mɔdɛŋ koni okɛ ohe awo shia Biblia mli nikasemɔ nitsumɔ lɛ mli? Kaimɔ akɛ, wɔwala kɛ mɛi krokomɛi anɔ̃ damɔ anɔkwa ni wɔyeɔ yɛ enɛ gbɛfaŋ lɛ nɔ.—Ezek. 3:17-19.