Nyɛfea Nɔ Fɛɛ Nɔ ni Nyɛkɛwoa Nyɔŋmɔ Hiɛ Nyam
1 Kwɛ bɔ ni wɔhe jɔɔ wɔ akɛ wɔkɛ wɔ nyɛmimɛi hii kɛ yei ni wɔsumɔɔ amɛ lɛ aaabɔ! (1 Kor. 16:17, 18) Wɔfeɔ enɛ yɛ asafoŋ kpeei ashishi, yɛ kpokpaa bibii anɔ kpeei ashishi, yɛ kpokpaa wulu nɔ kpeei ashishi, kɛ shiɛmɔ nitsumɔ lɛ mli. Wɔkɛ wɔhe bɔɔ naanyo hu yɛ be mli ni wɔtoko gbɛjianɔ krɛdɛɛ ko kɛhako nakai, tamɔ beni wɔna gbɔi yɛ wɔshia. Wɔtsɔɔ enɛ feemɔ nɔ wɔjieɔ gbɔfeemɔ kpo ni wɔkɛwoɔ wɔteŋ mɔ fɛɛ mɔ hewalɛ. (Rom. 12:13; 1 Pet. 4:9) Be mli ni otoɔ yookpeemɔ shishi hiɛtserɛjiemɔi ahe gbɛjianɔ lɛ, ha ŋaawoo kpakpa ni yɔɔ October 1, 1984 Buu-Mɔɔ lɛ mli lɛ ahi ojwɛŋmɔ mli.
2 Henaabuamɔ Mli Nifeemɔi ni Ato He Gbɛjianɔ: Kɛ ‘nii wɔyeɔ jio, nii wɔnuɔ jio, aloo nɔ kroko wɔfeɔ jio lɛ,’ esa akɛ ‘wɔfee fɛɛ ni wɔkɛwo Nyɔŋmɔ hiɛ nyam.’ (1 Kor. 10:31-33) Mɛi komɛi kɛ ŋaawoo nɛɛ tsuuu nii, ni naagbai kãa he eyaa nɔ yɛ henaabuamɔi ni afeɔ ni mɛi fa yɛ mli babaoo tsɔ fe bɔ ni aaanyɛ akwɛ nɔ jogbaŋŋ lɛ hewɔ. Yɛ shihilɛi komɛi amli lɛ, afɔɔ nine akɛtsɛɔ mɛi ohai abɔ kɛbaa henaabuamɔi wuji ni ato he gbɛjianɔ kɛteke nɔ ní je lɛŋ hiɛtserɛjiemɔ yaa nɔ yɛ jɛmɛ lɛ ashishi. Yɛ bei komɛi amli lɛ abiɔ ni mɛi ni yaa jɛmɛ lɛ awo jɛmɛ yaa he nyɔmɔ loo nibii krokomɛi ahe nyɔmɔ. Henaabuamɔi ni tamɔ nakai lɛ feɔ tamɔ je lɛŋ nifeemɔi, ní amɛsu kɛ nii ni yɔɔ fɛo kɛ Biblia shishitoo mlai kpaaa gbee lɛ pɛpɛɛpɛ.—Rom. 13:13, 14; Efes. 5:15-20.
3 Abɔɔ amaniɛ akɛ Odasefoi ni fa yabuaa amɛhe naa yɛ tsũi komɛi ni ayahai ni hiɛtserɛjiemɔ ni esaaa ni eji je lɛŋ nifeemɔ ni akwɛɛɛ henaabuamɔ lɛ nɔ jogbaŋŋ lɛ yaa nɔ yɛ jɛmɛ lɛ amli. Aha nifeemɔi ni tamɔ enɛɛmɛi eko ni awo lɛ gbɛi akɛ “Yehowa Odasefonyo” otsi naagbee lɛ etee nɔ yɛ gbɔiatoohe tsũi loo hiɛtserɛjiemɔ hei. Akɛni ewa akɛ aaakwɛ henaabuamɔi wuji ni tamɔ nɛkɛ nɔ jogbaŋŋ hewɔ lɛ, ekɛ naagbai eba. Hoofeemɔ, dãatɔɔ, kɛ jeŋba shara po ejɛ mli kɛba yɛ bei komɛi amli. (Efes. 5:3, 4) Eka shi faŋŋ akɛ henaabuamɔi ni tamɔ nɛkɛ lɛ wooo Yehowa hiɛ nyam. Shi moŋ, amɛkɛ ahorabɔɔ baa asafo lɛ gbɛi kpakpa lɛ nɔ, ni etɔ̃tɔ̃ɔ mɛi krokomɛi anane.—1 Kor. 10:23, 24, 29.
4 Aawo Kristofoi ahewalɛ ni amɛjie gbɔfeemɔ kpo, shi nɔ ni esa akɛ ama nɔ mi ji jwɛŋmɔ ni aaagbala kɛaaba naanyobɔɔ lɛ nɔ. (Rom. 1:11, 12) Henaabuamɔi bibii ji nɔ ni hi fe fɛɛ yɛ bei pii amli. Our Ministry wolo lɛ kɛɛ yɛ baafai 135-6 lɛ akɛ: “Bei komɛi lɛ, ekolɛ abaafɔ nine akɛtsɛ wekui babaoo kɛba shia ko mli kɛha Kristofoi anaanyobɔɔ. . . . Nɔ ni nilee yɔɔ mli ji akɛ, esa akɛ mɛi ni feɔ mɛi gbɔ yɛ shihilɛi ni tamɔ nɛkɛ mli lɛ anu he akɛ amɛ diɛŋtsɛ amɛji mɛi ni nɔ ni yaa nɔ lɛ he sɔ̃ kã amɛnɔ. Akɛni enɛ yɛ amɛjwɛŋmɔ mli hewɔ lɛ, Kristofoi ni kɔɔ sane sɛɛ lɛ ena nilee ni yɔɔ mli akɛ amɛaaha mɛi fioo aba henaabuamɔi ni tamɔ nɛkɛ lɛ ashishi kɛ agbɛnɛ koni akɛ be kakadaŋŋ akafee.” Yesu tsɔɔ mli akɛ nibii ni akɛwoɔ he lɛ he ehiaaa kɛ́ oti ni ma wɔhiɛ ji ni wɔwo wɔnanemɛi ahewalɛ yɛ mumɔŋ.—Luka 10:40-42.
5 Eji nɔ ko kpakpa akɛ aaajie gbɔfeemɔ kpo atsɔɔ nanemɛi Kristofoi. Shi, sɔrɔtofeemɔ ni kã henaabuamɔ ni hiɛshikamɔ yɔɔ mli yɛ wɔ shia mli kɛ nifeemɔi ni aha eteke nɔ ni jieɔ je lɛŋ mumɔ lɛ kpo yɛ tsũ ko ni ahai mli lɛ teŋ lɛ da. Kɛ ofɔ nine otsɛ mɛi krokomɛi koni ofee amɛ gbɔ lɛ, esa akɛ okwɛ ni oha efee nɔ ni obaanyɛ otsu sɔ̃ ni jɛɔ nɔ ni yaa nɔ lɛ mli baa lɛ he nii kɛmɔ shi.—Kwɛmɔ August 15, 1992 Buu-Mɔɔ lɛ baafai 17-20.
6 Lɛlɛŋ, Yehowa kɛ nyɛmimɛi anaanyobɔɔ ko ni wɔnaa hewalɛwoo ni haa mɔ he jɔɔ lɛ kɛjɛɔ mli ni kanyaa wɔ ni wɔya nɔ wɔtsu nitsumɔi kpakpai ahe nii ejɔɔ wɔ. (Mat. 5:16; 1 Pet. 2:12) Kɛ wɔkɛ nii ni afeee kɛtekeee nɔ kɛ nilee tsu nii yɛ henaabuamɔi ashishi lɛ, no lɛ wɔbaawo wɔ Nyɔŋmɔ lɛ hiɛ nyam ni wɔtswa mɛi krokomɛi wɔma shi.—Rom. 15:2.