Sanebimɔ He
◼ Mɛɛ be ebaafee be ni sa ákɛ akɛ shiatsɛ ko aaasɔle yɛ shia kɛ shia sɔɔmɔ lɛ mli?
Akɛ ŋaawoo ha yɛ October 1994 Wɔ Maŋtsɛyeli Sɔɔmɔ lɛ mli Sanebimɔ He lɛ mli yɛ nɔ ni esa akɛ awie beni shiatsɛ ko ebi ni wɔsɔle dani wɔje wɔshiɛmɔ lɛ shishi lɛ he. Abaanyɛ ni akɛ Obaanyɛ Ohi Shi wolo lɛ baafa 230 kɛ Reasoning wolo lɛ baafa 295 atsu nii ni sɛɛnamɔ aba he. Wɔbaanyɛ wɔsusu ŋmalɛi tamɔ Mateo 10:7, 12; 1 Timoteo 2:8, 11, 12, kɛ 1 Korintobii 14:34, 35 he yɛ shihilɛi ni tamɔ nɛkɛ he nitsumɔ mli.
Nɔ titri ni esa akɛ akadi ji akɛ, wɔyaaa gbɔ ko shia ni wɔyaje sɔlemɔ shishi, kɛ́ shiatsɛ lɛ ebi enɛ—ni ekolɛ shiatsɛ lɛ sɔlemɔ yɛ lɛ diɛŋtsɛ egbɛ nɔ nyiɛ sɛɛ—koni no sɛɛ lɛ wɔkɛ wɔshiɛmɔ wiemɔ lɛ aha. Kɛ shiɛlɔ lɛ yoo akɛ shiatsɛ lɛ miisumɔ kɛkɛ ni mɛi ale nɔ ni yaa nɔ lɛ loo eebɔ mɔdɛŋ ni egbala lɛ (shiɛlɔ lɛ) ewo futufutu jamɔ nifeemɔ ko mli lɛ, no lɛ ebaafee nɔ ni sa akɛ eeekpoo sɔlemɔ ni ekɛ mɔ ni tamɔ nɛkɛ aaasɔle, yɛ nɔ ni atsɔɔ yɛ Mateo 6:5, 6 kɛ 2 Korintobii 6:14-18 lɛ kɛ gbeekpamɔ naa.
Shi, nɔ ni atsɔɔ nɛɛ etsɔɔɔ akɛ esaaa akɛ wɔkɛ mɔ aŋkro ko ni wɔkɛ lɛ kpeɔ yɛ shia kɛ shia sɔɔmɔ lɛ mli lɛ sɔleɔ kwraa. Kɛji akɛ wɔtsɔɔ nɔ ni Biblia lɛ kɛɔ yɛ sɔlemɔ he lɛ mli lɛ sɛɛ, ni shiatsɛ lɛ bi ni wɔsɔle yɛ nɔ ni wɔwie he lɛ kɛ gbeekpamɔ naa lɛ, no lɛ ateee shi awooo enɛ ni wɔɔfee. Wɔsɔleee kɛ yiŋtoo akɛ wɔmiifee wɔtsɔɔ mɛi, shi kɛji akɛ nɔ ni wɔshiɛɔ yɛ Yehowa he lɛ kanya mɛi ni wɔshiɛɔ wɔhaa amɛ lɛ, ni amɛbi ni wɔsɔle yɛ amɛgbɛfaŋ wɔha Yehowa lɛ, ebaafee nɔ ni sa akɛ afee.
Nɔ ni fata Salomo sɔlemɔ yɛ be mli ni ajɔɔ sɔlemɔtsu lɛ nɔ lɛ he ji nibimɔ akɛ, kɛ gbɔi nu Yehowa gbɛi kɛ enitsumɔi ahe, ni amɛtsɔ amɛhiɛ amɛha ewe lɛ yɛ sɔlemɔ mli lɛ, E-bo amɛ faikpamɔi atoi. (2 Kron. 6:32, 33) Yɛ anɔkwale mli lɛ, mɔ ni ehao waa ni nuɔ he akɛ Nyɔŋmɔ yelikɛbuamɔ he miihia lɛ waa lɛ baleŋ bɔ ni eeefee esɔle. Kɛ shiɛlɔ lɛ na odaseyeli ni fa ni tsɔɔ miishɛɛ diɛŋtsɛ ni shiatsɛ lɛ yɔɔ kɛ bɔ ni esumɔɔ akɛ eeesa Nyɔŋmɔ hiɛ lɛ, no lɛ ateŋ shi awoŋ nɔ ni ebiɔ akɛ asɔle aha lɛ lɛ.
Yɛ be mli ni wɔkpoɔ kponɔgbɛ nifeemɔ kɛ mɔ krɔŋkrɔŋ ni abuɔ he loo futufutu hemɔkɛyeli mli ni akɛ he woɔ lɛ, wɔkuuu wɔhiɛ wɔshwieee sɔlemɔ ni wɔkɛaaha Nyɔŋmɔ yɛ mɛi ni yɔɔ tsuijurɔ ni taoɔ Nyɔŋmɔ gbɛtsɔɔmɔ kɛ yelikɛbuamɔ yɛ anɔkwayeli mli diɛŋtsɛ lɛ agbɛfaŋ lɛ nɔ.—Yes. 66:2.