Kpee ni Wɔɔya Daa—Ehe Miihia Kɛha Wɔ Shidaamɔ ni Yɔɔ Shiŋŋ
1 Bɔfo Paulo wo wɔ hewalɛ ni wɔya nɔ wɔhe “awa yɛ hemɔkɛyeli lɛ mli.” (Tito 1:9, 13) Wɔsusuɔ nibii kpakpai ahe yɛ asafoŋ kpeei ashishi ni atsɔɔ wɔ bɔ ni wɔɔfee ni wɔkɛ mumɔŋ tawuu nii awula wɔhe koni wɔnyɛ ‘Abonsam ŋaatsɔɔi lɛ anaa wɔdamɔ.’—Efes. 6:11; Fil. 4:8.
2 Kpeei Kɛ Nɔ ni He Hiaa Wɔ lɛ Hãa Wɔ: Asafoŋ kpeei ni wɔɔya daa lɛ he miihia kɛha wɔ shidaamɔ ni yɔɔ shiŋŋ. (1 Kor. 16:13) Asɔleɔ yɛ kpeei ashishi koni akɛda Nyɔŋmɔ shi ni akɛjie eyi, koni agbɛnɛ adamɔ asafo lɛ najiaŋ abi hiamɔ nii. (Fil. 4:6, 7) Ní wɔɔfata he kɛla Maŋtsɛyeli lalai lɛ kanyaa wɔ ni ehaa wɔjieɔ wɔ nifeemɔi kɛ henumɔi akpo yɛ be mli ni wɔjaa Yehowa lɛ. (Efes. 5:19, 20) Wɔ naanyobɔɔ kutuu ni yaa nɔ yɛ Maŋtsɛyeli Asa lɛ nɔ dani ajeɔ kpeei ashishi kɛ beni akpa lɛ woɔ wɔ hewalɛ, etswaa wɔ emaa shi, ni ehaa wɔ hewalɛ hee.—1 Tes. 5:11.
3 Wiemɔ krɛdɛɛ ni ji, “Apasa Jamɔ Naagbee Ebɛŋkɛ” ni aha yɛ April mli lɛ, kɛ ekãa ma bɔ ni ehe hiaa ni afee he nɔ ko amrɔ nɔŋŋ koni aje Babilon Kpeteŋkpele lɛ mli lɛ nɔ mi ewo mɛi ni sumɔɔ anɔkwale lɛ ajwɛŋmɔ mli. (Kpoj. 18:4) Kwɛ bɔ ni ekanyaa mɔ ehaa akɛ wɔɔkase Buu-Mɔɔ mli nikasemɔi etɛ ni kɔɔ la-kpɛmɔi ni kpɛɔ jalɔ gbɛ nɔ lɛ he sane yɛ June kɛ July mli lɛ! (Abɛi 4:18) Eji wɔku wɔhiɛ wɔshwie nakai kpeei lɛ ni wɔɔya lɛ nɔ kulɛ, susumɔ nɔ ni wɔɔlaaje lɛ he okwɛ.
4 Abaama bɔ ni ehe hiaa ni ana tsɔsemɔ ni baaha wɔ sɔɔmɔ lɛ aya hiɛ lɛ nɔ mi yɛ wɔ “Miishɛɛ Yijielɔi” Kpokpaa Wulu nɔ Kpeei ni baa lɛ mli. Taakɛ Organized to Accomplish Our Ministry lɛ tsɔɔ yɛ baafa 72 lɛ, Teokrase Sɔɔmɔ Skul lɛ ji gbɛjianɔ ni ato kɛha asafo muu lɛ fɛɛ tsɔsemɔ. Amrɔ nɛɛ, nifeemɔ lɛ fa ko yeɔ ebuaa wɔ ni wɔle gbɛjianɔtoo lɛ he ŋmɛnɛŋmɛnɛ yinɔsane lɛ jogbaŋŋ kɛtsɔ Proclaimers wolo lɛ kɛ nitsumɔ nɔ. Wɔnyɛŋ wɔha tsɔsemɔ ni wɔnine aaashɛ nɔ nɛɛ aŋmɛɛ wɔ.
5 Wɔ Sɔɔmɔ Kpee lɛ wajeɔ wɔ koni wɔhe asa waa yɛ sɔɔmɔ nitsumɔ lɛ mli. Afee enɛ he nɔkwɛmɔ nɔ yɛ kpee kɛha Maŋtsɛyeli Sane No. 34 lɛ jaa babaoo ni wɔkɛ wɔhe aaawo mli lɛ ni wɔnine shɛ ehe nitsɔɔmɔi anɔ lɛ mli. Yehowa jɔɔmɔi ni ba nitsumɔ nɛɛ nɔ lɛ fa babaoo, taakɛ wɔnaa yɛ nibii kpakpai ni jɛ mli ba yɛ jeŋ fɛɛ lɛ mli lɛ. (Okɛto 2 Korintobii 9:6, 7 he.) Awo mɛi ni yaa kpeei daa lɛ hewalɛ, ni amɛye amɛbua ni aha tafaa lɛ sɛɛ ni afi lɛ tee hiɛ.
6 Aha hiamɔ henumɔ ni wɔyɔɔ lɛ etee hiɛ kɛtsɔ nɔ ni wɔkaseɔ kɛjɛɔ Nyɔŋmɔ Wiemɔ lɛ, kɛ Kpojiemɔ Naagbee wolo lɛ yelikɛbuamɔ yɛ Asafo Woloŋ Nikasemɔ lɛ mli lɛ nɔ. Akɛni nibii miiya nɔ oyayaayai yɛ je lɛŋ hewɔ lɛ, ehe miihia ni wɔnu Kpojiemɔ gbalɛi ni mli kwɔlɔ lɛ amlibaa shishi.
7 Okɛ Kpee ni Oooya Daa lɛ Aye Klɛŋklɛŋ Gbɛhe: Wɔ nyɛmimɛi ni naa kaai amli amanehulu yɛ shikpɔji babaoo nɔ lɛ, naa bɔ ni ehe hiaa lolo akɛ amɛaakpe kutuu daa otsi. Akɛ nɔkwɛmɔ nɔ lɛ, mɛi heei babaoo yaa kpeei yɛ Burundi, Rwanda, Liberia, kɛ Bosnia kɛ Herzegovina, ni amɛyi faa fe shiɛlɔi lɛ ayibɔ toi enyɔ loo etɛ po. Yɛ nɛkɛ gbɛ nɔ lɛ Yehowa yeɔ ebuaa nyɛmimɛi lɛ ni amɛdamɔɔ shi shiŋŋ yɛ mumɔ kome mli.—Fil. 1:27; Heb. 10:23-25.
8 Esa akɛ mɔ fɛɛ mɔ ni ekolɛ ekuɔ ehiɛ efɔɔ kpee ni eeeya daa lɛ nɔ lɛ abɔ he mɔdɛŋ amrɔ nɔŋŋ koni ekɛjaje nɛkɛ subaŋ nɛɛ. (Jaj. 4:9-12) Bɔni afee ni wɔdamɔ shi shiŋŋ lɛ, ehe miihia ni wɔkɛ mɛi ni edara yɛ mumɔŋ lɛ agba sane, taakɛ akɛhaa kɛtsɔɔ kpee ni ayaa daa lɛ nɔ lɛ.—Rom. 1:11.