Saamɔ Ohe ni Ona Asafoŋ Kpeei Amli Ŋɔɔmɔ

¹ Akɛ nyɛmimɛi ni kɛ amɛhe bɔɔ lɛ, wɔbuaa wɔhe naa daa yɛ nilee mli kɛhaa wɔ daa otsi kpeei. (1 Tim. 4:15, 16) Te wɔɔfee tɛŋŋ wɔna mli ŋɔɔmɔ ni wɔna he sɛɛ babaoo hu?

² Esa akɛ ato be kɛma shi daa koni wɔkɛsaa wɔhe kɛha kpeei. Mɛi komɛi baanyɛ amɛkɛ be babaoo asaa amɛhe fe bɔ ni mɛi krokomɛi baafee. Shi, yɛ dekã ni wɔbɛ lɛ fɛɛ sɛɛ lɛ, nilee yɛ mli akɛ wɔɔto be ni wɔkɛsaa wɔhe kɛha kpeei. Ni wɔɔsaa wɔhe kutuu akɛ weku lɛ he baa sɛɛnamɔ babaoo diɛŋtsɛ.—Efes. 5:15, 16.

³ Kɛha Teokrase Sɔɔmɔ Skul Lɛ: Bɔɔ mɔdɛŋ ni okɛ daa otsi Biblia kanemɔ he gbɛjianɔtoo lɛ atsu nii pɛpɛɛpɛ. (Yosh. 1:8) Tĩi sane ni abaakase lɛ mli, ni okɛ woji ni he hiaa lɛ aba koni onyɛ obo wielɔi lɛ atoi. Susumɔ gbɛi ni oootsɔ nɔ okɛ sane nɛɛ atsu nii yɛ osɔɔmɔ lɛ mli lɛ he.

⁴ Kɛha Sɔɔmɔ Kpee Lɛ: Kwɛmɔ gbɛjianɔ ni ato yɛ Wɔ Maŋtsɛyeli Sɔɔmɔ lɛ mli lɛ. Kanemɔ saji ni abaasusu he lɛ. Kɛ abaasusu Buu-Mɔɔ lɛ loo wolo kroko mli sane he lɛ, taomɔ enɛ ni okane hu. Kɛ abaafee shiɛmɔ nitsumɔ lɛ he shiɛmɔ wiemɔi ahe nɔkwɛmɔ nii lɛ, no lɛ tĩi enɛɛmɛi amli kɛtsɔ hiɛ koni onyɛ okɛtsu nii nɔŋŋ yɛ oshiɛmɔ nitsumɔ lɛ mli.

⁵ Kɛha Buu-Mɔɔ Nikasemɔ Lɛ: Kanemɔ sane lɛ kɛtsɔ hiɛ, ni okadi sanebimɔi lɛ ahetooi. Ŋmalɛi ni aŋmalako emli wiemɔi lɛ ni obaatao lɛ baaye ebua ni onu shishi jogbaŋŋ. Bɔ ni nikasemɔ lɛ kɛ nɔ ni ole momo lɛ kpaa gbee ehaa lɛ nɔ ni ooojwɛŋ lɛ baaha onilee afa. Too gbɛjianɔ ni okɛ ohe awo nikasemɔ lɛ mli kɛtsɔ nɔ ni shɛɔ kuku kome ko loo enyɔ he saji kuku ni okɛaasaa ohe lɛ nɔ. Gbɛ ni he hiaa ni oootsɔ nɔ ‘ojaje wɔhiɛnɔkamɔ’ lɛ otsɔɔ nɛ.—Heb. 10:23.

⁶ Kɛha Asafo Woloŋ Nikasemɔ Lɛ: Klɛŋklɛŋ lɛ, kwɛmɔ nikasemɔ lɛ mli; susumɔ saneyitso lɛ kɛ yitsei bibii lɛ ahe. No sɛɛ lɛ, be mli ni okaneɔ lɛ, kadimɔ saji otii ni he hiaa lɛ. Tĩi Biblia mli kukuji ni fiɔ sɛɛ lɛ mli. Bɔɔ mɔdɛŋ ni oha sanebimɔi lɛ ahetoo yɛ bo diɛŋtsɛ owiemɔi amli. Kɛ osaa ohe yɛ nikasemɔ lɛ mli ogbe naa lɛ, tĩi mli yɛ ojwɛŋmɔ mli. Bɔɔ mɔdɛŋ ni okai saji otii ni he hiaa lɛ kɛ nɔ hewɔ ni atsɔɔ saji amli nakai lɛ.—2 Tim. 2:15.

⁷ Na Kpeei lɛ Amli Ŋɔɔmɔ: Bɔni afee ni ona kpeei lɛ amli ŋɔɔmɔ kɛmɔ shi lɛ, ehe miihia ni oyashɛ mra koni ona sɔlemɔ ni akɛjeɔ shishi ni akɛbiɔ Yehowa mumɔ lɛ mli gbɛfaŋnɔ. Onaa Maŋtsɛyeli lalai ni haa mɔ he jɔɔ lɛ lɛ hu he sɛɛ. Kɛ obɛ bii bibii loo yiŋtoo kroko ni baabi ni oyata asa lɛ sɛɛgbɛ lɛ, ekolɛ obaana akɛ kɛ oyata hiɛgbɛ lɛ, nibii pii gbalaŋ ojwɛŋmɔ, ni obaaná gbɛjianɔ ni ato lɛ he sɛɛ babaoo. Fɔlɔi ni hiɛ bii bibii ni ekolɛ amɛbaasumɔ ni amɛkɛ amɛ aje kpo beni kpee lɛ yaa nɔ lɛ baanyɛ atara hei ni bɛŋkɛ he ni atsɔɔ kɛjeɔ kpo lɛ kɛ asa lɛ sɛɛgbɛ, koni amɛkɛha nibii ni baagbala mɛi ajwɛŋmɔ lɛ nɔ agbɔ.

⁸ Bɔɔ mɔdɛŋ ni ogbele ŋmalɛi ni akaneɔ lɛ. Enɛ baaye ebua ni okai nɔ ni oboɔ toi lɛ. Oweku lɛ kɛ nanemɛi ni okɛ amɛ aaawie nɔ ni okaseɔ lɛ he lɛ baaye abua ni sane lɛ ahi ojwɛŋmɔ mli jogbaŋŋ. Ŋaawoi nɛɛ kɛ nitsumɔ baaha kpeei lɛ he aba sɛɛnamɔ babaoo koni eŋɔɔ, ni ‘amɛbaakanya wɔ kɛwo suɔmɔ kɛ nitsumɔi kpakpai amli.’—Heb. 10:24, 25.