Na Teokrase Sɔɔmɔ Skul Kɛha 1996 lɛ He Sɛɛ—Fa 2
1 Beni aje Teokrase Sɔɔmɔ Skul lɛ feemɔ shishi yɛ 1943 lɛ, etsɛɛɛ kwraa ni Asafo lɛ nitsumɔ he niji lɛ eko bɔ amaniɛ akɛ: “Gbɛjianɔtoo ni hi jogbaŋŋ nɛɛ ye omanye yɛ be fioo ko sɛɛ, ni eye ebua nyɛmimɛi babaoo ni susu pɛŋ akɛ amɛnyɛŋ amɛtsɔmɔ maŋ wielɔi kɔkɔɔkɔ lɛ koni amɛhe asa waa yɛ wiemɔ kpoku nɔ, ni amɛhe asa jogbaŋŋ yɛ shiɛmɔ mli.” Skul lɛ yaa nɔ ekɛ tsɔsemɔ ni hi jogbaŋŋ ni he hiaa haa wɔ fɛɛ.
2 Biblia Kanemɔ: Jeee mɛi ni akɛ wiemɔ lɛ fai komɛi woɔ amɛ dɛŋ lɛ pɛ naa skul lɛ he sɛɛ. Yɛ anɔkwale mli lɛ, wɔ fɛɛ wɔyɛ nifeemɔ—daa otsi Biblia kanemɔ. Skul gbɛjianɔtoo wolo lɛ tsɔɔ Biblia mli yitsei ni sa akɛ akane daa otsi. Kaimɔi babaoo ni damɔ Ŋmalɛ nɔ lɛ maa bɔ ni ehe hiaa ni akane Biblia lɛ gbi fɛɛ gbi lɛ nɔ mi. (Yosh. 1:8; Lala 1:2; Bɔf. 17:11) Biblia kanemɔ he baa sɛɛnamɔ kɛhaa mumɔŋ hewalɛnamɔ kpakpa; eji niyenii kɛha jwɛŋmɔ kɛ tsui lɛ. Kɛ hoo lɛ, kɛ wɔkɛ minitii enumɔ kane Biblia lɛ daa gbi lɛ, wɔbaanyɛ wɔkɛ ehe gbɛjianɔ ni ato yɛ wolo nɔ lɛ anyiɛ pɛpɛɛpɛ. Beni aaashɛ afi lɛ naagbee lɛ, no mli lɛ wɔkane Nyɔŋmɔ Wiemɔ lɛ mli yitsei fe 150. Kɛ wɔhaa Biblia hiɔ wɔmasɛi daa lɛ, esa akɛ wɔnyɛ wɔkane efa ko daa gbi.
3 Tsɔsemɔ Wiemɔ: Bɔni afee ni akanya nyɛmimɛi lɛ ni amɛkɛ amɛhe awo sɔɔmɔ lɛ mli yɛ ekaafeemɔ kɛ anɔkwayeli mli lɛ, ehe miihia ni wielɔ ni kɛ tsɔsemɔ wiemɔ lɛ haa lɛ kɛ nitsɔɔmɔ gbɛ̀i kpakpai atsu nii koni ekɛha anu shishi, ni etswa hiɛsɔɔ ni abaana yɛ Yehowa, e-Wiemɔ, kɛ egbɛjianɔtoo lɛ mli lɛ ema shi. Onukpai kɛ asafoŋ sɔɔlɔi baanyɛ afee enɛ kɛtsɔ hesaamɔ jogbaŋŋ nɔ, ni amɛtswa amɛwiemɔ lɛ amɛma saneyitso lɛ nɔ, ni amɛwiemɔ lɛ akɔne mɔ yiŋ, ni amɛha sane lɛ aŋɔɔ. (Heb. 4:12) Ehe miihia ni wielɔ lɛ aye be ni akɛha lɛ lɛ nɔ. “All Scripture” wolo lɛ eyi obɔ kɛ Biblia mli ŋmalɛi, ni ekɛ Ŋmalɛ mli sane ni ato naa ni kanyaa mɔ, ni ehe baanyɛ aba sɛɛnamɔ aha wɔ yɛ mumɔŋ lɛ haa. Yehowa ŋmɛnɛŋmɛnɛ beaŋ gbɛjianɔtoo ni anaa lɛ yinɔsane yɛ Proclaimers wolo lɛ mli, ni egbaa gbɔmɛi diɛŋtsɛ ni jie hemɔkɛyeli, ekaa, hetuu-kɛhamɔ, kɛ suɔmɔ kpo lɛ ashihilɛi ahe sane. Nibii babaoo yɛ ni abaakase ni kɔɔ wɔ teokrase gboshinii lɛ he kɛ gbɛ ni Yehowa etsɔ nɔ ejɔɔ ewebii yɛ ŋmɛnɛŋmɛnɛ beaŋ lɛ.
4 Biblia Hiɛkpamɔ Wiemɔi: Esa akɛ nyɛmimɛi hii ni akɛ nifeemɔ nɛɛ haa amɛ lɛ ahala kukuji pɔtɛɛ komɛi ni abaanyɛ akɛtsu nii yɛ shihilɛ mli kɛha asafo lɛ sɛɛnamɔ. Enɛ biɔ ni akane yitsei ni akɛha lɛ, ni ajwɛŋ nɔ, ni akɛ kukuji ni ahala lɛ atao saji amli koni akɛna otii ni baaha nakai ŋmalɛi lɛ ashishitsɔɔmɔ afee faŋŋ. “Scripture Index” ni he baaba sɛɛnamɔ yɛ Biblia mli kukuji pɔtɛɛi ahe saji ataomɔ mli lɛ yɛ Watch Tower Publications Index lɛ sɛɛ. Esa akɛ nyɛmimɛi hii ni baatsu fa nɛɛ he nii lɛ kɛ sanesɛɛkɔmɔ atsu nii ni amɛkwa saji ni he ehiaaa ni amɛkɛaawo mli lɛ. Esaaa akɛ amɛkɛ saji babaoo saa amɛhe fe bɔ ni amɛaanyɛ amɛtsu he nii yɛ minitii ekpaa mli.
5 Wɔ fɛɛ wɔbaanyɛ wɔna Teokrase Sɔɔmɔ Skul lɛ he sɛɛ. Ebaanyɛ eye ebua ni wɔya hiɛ yɛ wɔ nyɛmɔ yɛ wiemɔ kɛ nitsɔɔmɔ mli. Eka shi faŋŋ akɛ gbɛjianɔtoo nɛɛ he sɛɛ ni aaana kɛmɔ shi lɛ baaye abua ni wɔha ‘wɔshweremɔ afee faŋŋ yɛ mɛi fɛɛ hiɛ.’—1 Tim. 4:15.