Hesaamɔ—Gbɛ ni Atsɔɔ nɔ Ayeɔ Omanye

¹ Hesaamɔ ni afeɔ kɛtsɔɔ hiɛ kɛha shiɛmɔ nitsumɔ lɛ baaye abua ni aye shishashaomɔi fɛɛ ni mɔ ko aaanu he yɛ shiɛmɔ nitsumɔ lɛ mli lɛ nɔ kunim. Be mli ni obɛŋkɛɔ shinaai lɛ anaa lɛ, obaale nɔ ni osumɔɔ ni okɛɛ shiatsɛmɛi lɛ. Esaaa akɛ ohaoɔ yɛ kaai ni ekolɛ okɛbaakpe lɛ hewɔ. Beni ojɛ shiɛmɔ oba shia lɛ, obaana hewalɛwoo, yɛ be mli ni oleɔ akɛ obɔ mɔdɛŋ jogbaŋŋ yɛ shiɛmɔ mli lɛ. Hɛɛ, hesaamɔ ni afeɔ lɛ jogbaŋŋ kɛmɔɔ shi lɛ ji gbɛ ni atsɔɔ nɔ ahaa shiɛmɔ kɛ nitsɔɔmɔ gbɛi mɔɔ shi jogbaŋŋ.

² Paulo ma hesaamɔ nɔ mi kɛtsɔ hewalɛ ni ewo ni ‘wɔkɛ hejɔlɛ sanekpakpa lɛ he saamɔ-kɛ-too awo wɔnaji’ lɛ nɔ. (Efes. 6:15) Nɔ ni fata enɛ he ji ni wɔɔsaa wɔjwɛŋmɔ kɛ tsui kɛ agbɛnɛ ni wɔɔkwɛ nii yɛ gbɛ ni ja nɔ ni wɔna su ni sumɔɔ nifeemɔ. Kɛ wɔsaa wɔhe akɛ wɔkɛ mɛi krokomɛi aaagba anɔkwale lɛ he sane lɛ, akɛ Maŋtsɛyeli yibiiwoo baawo wɔ nitsumɔ lɛ he nyɔmɔ, ni ebaaha wɔna miishɛɛ.—Bɔf. 20:35.

³ Bɔ ni Aaafee Asaa He Kɛha Shiɛmɔ Nitsumɔ Lɛ: Esa akɛ wɔhala shiɛmɔ wiemɔ ni wɔsusuɔ akɛ ekɛ nitsumɔ waŋ kɛhaŋ wɔ lɛ, ekolɛ kɛjɛ nɔ ni akɛha yɛ Reasoning wolo lɛ loo nɔ ni yɔɔ Wɔ Maŋtsɛyeli Sɔɔmɔ lɛ naagbee baafa lɛ mli lɛ mli. Susumɔ ŋmalɛ ni oto akɛ okɛaatsu nii lɛ he jogbaŋŋ, ni ole wiemɔi loo wiemɔi kukuji ni obaama nɔ mi lɛ koni okɛ oti lɛ ama shi faŋŋ. Ehe ehiaaa ni okase shiɛmɔ wiemɔ lɛ owo oyitsoŋ; shi moŋ, nɔ ni hi fe fɛɛ ji ni oha shishinumɔ lɛ ahi ojwɛŋmɔ mli, ni owie yɛ bo diɛŋtsɛ owiemɔ mli, ni owie lɛ yɛ gbɛ ni osusuɔ akɛ ebaaŋɔɔ otoibolɔ lɛ naa lɛ nɔ.

⁴ Kwɛmɔ wolo ni oto akɛ okɛbaatsu nii lɛ mli, ni ohala wiemɔ otii komɛi ni ŋɔɔ. Halamɔ sane ko ni osusuɔ akɛ mɛi ni yɔɔ oshikpɔŋkuku lɛ mli lɛ baana he miishɛɛ. Susumɔ bɔ ni ekolɛ obaatsake oshiɛmɔ wiemɔ lɛ mli oha shiatsɛmɛi sɔrɔtoi lɛ he—nuu, yoo, onukpa, loo gbekɛ.

⁵ Ani oka enɛɛmɛi ni obaafee lɛ okwɛ pɛŋ? Okɛ weku mli bii krokomɛi loo shiɛlɔi krokomɛi afee ekome koni nyɛtsɔɔ shiɛmɔ wiemɔi ni ekolɛ no baamɔ shi jogbaŋŋ lɛ, koni no sɛɛ lɛ nyɛka efeemɔ nyɛkwɛ kɛ gbee ni wa koni ehi mɔ fɛɛ mɔ jwɛŋmɔ mli ojogbaŋŋ. Bɔɔ mɔdɛŋ ni okɛ shihilɛ diɛŋtsɛ mli shitee-kɛ-woo he saji ni abaanyɛ akɛkpe yɛ shikpɔŋkuku lɛ mli lɛ atsu nii. Kaa-kɛ-kwɛmɔ ni tamɔ nɛkɛ baaha onaa atse yɛ wiemɔ mli, ni eha oshiɛmɔ amɔ shi jogbaŋŋ, ni eha ona hekɛnɔfɔɔ babaoo.

⁶ Kɛfata oshiɛmɔ wiemɔ lɛ ni ooofee ni oooka ekɛ nitsumɔ okwɛ lɛ he lɛ, esa akɛ obi ohe hu akɛ, ‘Ani atade ni mito akɛ mawo lɛ sa shiɛmɔ nitsumɔ lɛ? Ni mihesaamɔ hu? Ani nɔ ni he baahia mi lɛ kɛ woji hu ni mito gbɛjianɔ akɛ mikɛbaatsu nii lɛ yɛ miwoji abaagi lɛ mli? Ani ehi jogbaŋŋ? Ani mihiɛ mi Reasoning wolo, dɛhiɛmɔ woji, shia-kɛ-shia kadimɔ woji, kɛ pɛnsil loo pɛn?’ Nii ahe gbɛjianɔtoo ni asusu he jogbaŋŋ kɛtsɔ hiɛ lɛ baaha gbi lɛ afee nɔ ni woɔ yibii babaoo yɛ shiɛmɔ nitsumɔ lɛ mli.

⁷ Beni wɔfee bɔ fɛɛ bɔ ni wɔɔnyɛ ni wɔkɛsaa wɔhe sɛɛ lɛ, esa akɛ wɔsɔle kɛbi Yehowa mumɔ lɛ yelikɛbuamɔ koni wɔye omanye. (1 Yoh. 5:14, 15) Hesaamɔ ni wɔɔtsu he nii jogbaŋŋ lɛ baaha wɔna miishɛɛ babaoo yɛ wɔ nitsumɔ mli, yɛ be mli ni ‘wɔgbeɔ wɔsɔɔmɔ lɛ naa kwraa lɛ.’—2 Tim. 4:5.