Okɛ Wɔ Maŋ Nɛɛŋ Wiemɔ Awake! lɛ Atsu Nii
1 Wɔ Maŋtsɛyeli Sɔɔmɔ ni je kpo yɛ November 1993 lɛ wie Twi kɛ Ewe Awake! lɛ he. Etsɔɔ mli akɛ mɛi ni kaneɔ nɛkɛ woji nɛɛ ayifalɛ lɛ nɔ miigbɔ, ni etsɔɔ mli akɛ shika he naagbai ni yɔɔ maŋ nɛɛ mli lɛ ji nɔ titri ni kɛ enɛ ba. No mli lɛ ekomekomei ni ajaraa lɛ ji 3,400 kɛha Twi kɛ 3,900 kɛha Ewe (Ghana kɛ Togo). Akɛ hewalɛwoo ni baaha ahe babaoo lɛ ha. Kɛjɛ no nɔ kɛbaa nɛɛ Twi Awake! lɛ ekomekomei lɛ kalamɔ etee hiɛ kɛyashɛ 3,900. Shi kɛlɛ, kɛjɛ no nɔ kɛbaa nɛɛ Ewe nɔ̃ ekomekomei ni ajaraa yɛ Ghana lɛ nɔ egbɔ kwraa kɛbashɛ 911. Mɛni wɔbaanyɛ wɔfee akɛ aŋkroaŋkroi, wekui, kɛ asafoi bɔni afee ni wɔkaha afɔ̃ɔ woji ni yɔɔ ebe naa pɛpɛɛpɛ nɛɛ akalamɔ kwraa?
2 Yiŋtoi Ahewɔ ni Efalɛ lɛ Eba Shi: Áyɔse akɛ yɛ be mli ni mɛi ni heɔ lɛ ayifalɛ ni nɔ gbɔɔ lɛ eko jɛ shika mli naagbai lɛ, asafoi babaoo eshɛɛɛ, ni amɛmuɔ sane naa akɛ nyɛmimɛi lɛ heŋ ni amɛkane ni amɛkɛya shiɛmɔ. No hewɔ lɛ awieee woji nɛɛ ahe yɛ shiɛmɔ nitsumɔ lɛ mli, ni kɛtsɔ enɛ nɔ lɛ, amɛhaaa mɛi ni yɔɔ wiemɔ lɛ he miishɛɛ ni nyɛɛɛ akane Blɔfo lɛ aná mumɔŋ niyenii ni haa mɔ hewalɛ lɛ. (Okɛto Abɛi 3:27 he.) Yɛ asafoi 667 ni feɔ kpeei yɛ Twi loo Ewe wiemɔ mli lɛ, asafoi 470 pɛ heɔ Awake! ni yɔɔ wɔ maŋ nɛɛŋ wiemɔ mli lɛ. Ani nyɛ asafo lɛ baanyɛ ashɛ eko agbɛnɛ? Ani obaanyɛ oshɛ eko loo ni oshɛ oha oweku lɛ mli bii?
3 Obaanyɛ Owo Mɛi Krokomɛi Ahewalɛ ni Amɛkane: Bɔni afee ni akala babaoo lɛ, Wɔ Maŋtsɛyeli Sɔɔmɔ ni je kpo yɛ November 1993 lɛ wo ŋaa koni wɔjie woji tɛtrɛbii nɛɛ akpo wɔtsɔɔ wɔ Biblia mli nikaselɔi kɛ jwɛŋmɔ lɛ akɛ wɔmiije shishi ni wɔkɛ woji tɛtrɛbii lɛ aha amɛ daa. Mɛni hewɔ oshɛɛɛ onɔ̃ lɛ kɛtsɔɔɔ sɔɔlɔ ni kwɛɔ woji tɛtrɛbii anɔ lɛ nɔ? Wɔbaanyɛ wɔkɛfee oti ni ma wɔhiɛ akɛ wɔbaaná mɛi ni wɔbaaha amɛ woji tɛtrɛbii daa, loo wɔha tsɔɔlɔi, nikaselɔi, kɛ mɛi krokomɛi ni yɔɔ wɔ shikpɔŋkuku lɛ mli ni le Twi loo Ewe kanemɔ lɛ ashɛ.
4 Wɔ wiemɔ shishitsɔɔmɔ nitsumɔ kuu lɛ kɛ ŋmɛlɛtswai babaoo tsuɔ nii ni amɛkɛtsɔɔ Awake! lɛ mli saji ashishi. Fioo pɛ ni akalaa lɛ haa Asafo lɛ bɔɔ nyɔmɔ waa. No hewɔ lɛ, wɔmiiwo mɔ fɛɛ mɔ hewalɛ ni amɛkane koni amɛfɔ mɛi krokomɛi hu nine koni amɛbana mumɔŋ niyenii kpakpa ni jɛɔ Yehowa dɛŋ kɛbaa nɛɛ mli ŋɔɔmɔ.—Lala 145:16.