Nyiɛmɔ yɛ Hemɔkɛyeli Naa
1 Gbɔmɛi akpekpei abɔ gbalaa amɛjwɛŋmɔ kɛyaa amɛ heloonaa nibii anɔ titri yɛ amɛ shihilɛi amli, ni amɛkɛ amɛhiɛ fɔɔ ninamɔ he lakamɔ hewalɛ lɛ nɔ yɛ buulufeemɔ mli. (Mat. 13:22) Amɛkɛ amanehulu kaseɔ nii waa kɛjɛɔ mli kɛ́ nibii ni amɛna lɛ laaje, loo aju, loo efee nɔ ni he baaa sɛɛnamɔ tsɔ kɛhaaa amɛ lɛ. Aawo wɔ hewalɛ ni wɔtiu gbɛ ni nilee yɔɔ mli lɛ sɛɛ, ni wɔbɔ mɔdɛŋ wɔtiu mumɔŋ jwetrii asɛɛ. (Mat. 6:19, 20) Nɔ ni fata enɛ he ji ni ‘wɔnyiɛ yɛ hemɔkɛyeli naa.’—2 Kor. 5:7.
2 Atsɔɔ wiemɔ “hemɔkɛyeli” lɛ shishi kɛjɛ Hela wiemɔ ni hiɛ jwɛŋmɔ ni tsɔɔ nɔmimaa, hekɛnɔfɔɔ, nii ahe jwɛŋmɔ kɛ ehe nɔmimaa ni yɔɔ shiŋŋ mli. Hemɔkɛyeli ni aaanyiɛ yɛ naa lɛ tsɔɔ Nyɔŋmɔ mli hekɛnɔfɔɔ ni akɛaadamɔ shihilɛi ni mli wawai anaa, ni akɛ he afɔ̃ nyɛmɔ ni eyɔɔ akɛ eeejaje wɔnajifaamɔi, kɛ suɔmɔ ni eyɔɔ akɛ eeeha wɔ wɔhiamɔ nii lɛ nɔ. Yesu kɛ nɔkwɛmɔ nɔ ni yeɔ emuu ha; etee nɔ egbala ejwɛŋmɔ kɛtee nɔ ni he hiaa titri lɛ nɔ. (Heb. 12:2) Nakai nɔŋŋ ehe hiaa ni wɔkɛ wɔtsuii afɔ mumɔŋ nibii ni anaaa lɛ anɔ. (2 Kor. 4:18) Esa akɛ wɔha wɔhiɛ ahi wɔ ŋmɛnɛŋmɛnɛ shihilɛ ni anyɛŋ akɛ he afɔ nɔ lɛ nɔ, ni wɔkpɛlɛ wɔhe ni wɔkɛaafɔ Yehowa nɔ kwraa lɛ nɔ.
3 Esa akɛ wɔyiŋ atsɔ̃ jogbaŋŋ hu akɛ, Yehowa miinyiɛ wɔhiɛ kɛmiitsɔ egbɛjianɔtoo ni anaa lɛ nɔ yɛ “tsulɔ anɔkwafo kɛ nilelɔ” lɛ gbɛtsɔɔmɔ shishi. (Mat. 24:45-47) Wɔjieɔ wɔhemɔkɛyeli kpo wɔtsɔɔ kɛ́ “wɔbo mɛi ni nyiɛɔ hiɛ” yɛ asafo lɛ mli lɛ “atoi.” (Heb. 13:17, NW) Teokrase gbɛjianɔtoo lɛ ni wɔkɛaatsu nii yɛ heshibaa kɛ ekomefeemɔ mli lɛ jieɔ hekɛnɔfɔɔ ni wɔyɔɔ yɛ Yehowa mli lɛ kpo etsɔɔ. (1 Pet. 5:6) Esa akɛ nɔ ko atsirɛ wɔ ni wɔkɛ wɔtsui fɛɛ afĩ nitsumɔ ni gbɛjianɔtoo lɛ kɛwo wɔdɛŋ lɛ sɛɛ. Enɛ baagbala wɔ kɛbɛŋkɛ wɔnyɛmimɛi lɛ ahe kpaakpa yɛ suɔmɔ kɛ ekomefeemɔ kpãa ni wa mli.—1 Kor. 1:10.
4 Gbɛ ni Aaatsɔ nɔ Awo Hemɔkɛyeli Hewalɛ: Esaaa ni wɔhaa wɔhemɔkɛyeli lɛ maa he kome. Ehe miihia ni wɔwuu ta waa, koni wɔkɛha emli awa. Ní wɔɔkase nii, ni wɔsɔle daa kɛ kpeeyaa baaye abua ni wɔha wɔhemɔkɛyeli mli awa, koni wɔnyɛ wɔdamɔ kaa fɛɛ kaa naa kɛtsɔ Yehowa yelikɛbuamɔ nɔ. (Efe. 6:16) Ani oto gbɛjianɔ kpakpa kɛha Biblia kanemɔ daa kɛ hesaamɔ kɛha kpeei? Ani ofɔɔ nii ni okaseɔ lɛ anɔjwɛŋmɔ, ni obɛŋkɛɔ Yehowa yɛ sɔlemɔ mli? Ani eji osu akɛ oooya kpeei sɔrɔtoi lɛ fɛɛ, ni okɛ ohe awo mli beni onáa hegbɛ lɛ?—Heb. 10:23-25.
5 Nitsumɔi kpakpai ji nɔ ni tsɔɔ hemɔkɛyeli ni mli wa. (Yak. 2:26) Gbɛi ni hi fe fɛɛ ni wɔtsɔɔ nɔ wɔjieɔ wɔhemɔkɛyeli kpo wɔtsɔɔ lɛ ateŋ ekome ji ni wɔjaje wɔhiɛnɔkamɔ lɛ wɔtsɔɔ mɛi krokomɛi. Ani otaoɔ gbɛi ni oootsɔ nɔ ogba sanekpakpa lɛ he sane otsɔɔ? Ani obaanyɛ otsake oshihilɛi amli koni eha onyɛ otsu babaoo yɛ sɔɔmɔ nitsumɔ lɛ mli? Ani okɛ ŋaawoi ni wɔnine shɛɔ nɔ koni wɔha wɔshiɛmɔ nitsumɔ lɛ aya hiɛ loo emɔ shi jogbaŋŋ lɛ tsuɔ nii? Ani okɛ mumɔŋ otii maa ohiɛ ni omiaa ohiɛ koni onine ashɛ nɔ?
6 Yesu bɔ daa gbi shihilɛ mli nibii ni akɛ he woɔ mli vii, ní ahaa heloonaa nibii loo pɛsɛmkunya nibii hàa bɔ ni wɔkwɛɔ nii wɔhaa yɛ mumɔŋ lɛ nɔ lɛ he kɔkɔ. (Luka 21:34-36) Esa akɛ wɔkɛ hiɛdɔɔ akwɛ bɔ ni wɔnyiɛɔ wɔhaa lɛ jogbaŋŋ, koni wɔhiɛ akakpata yɛ wɔhemɔkɛyeli lɛ mli. (Efe. 5:15; 1 Tim. 1:19) Wɔ fɛɛ wɔhiɛ kã nɔ akɛ, yɛ naagbee lɛ, wɔbaanyɛ wɔjaje akɛ ‘wɔ́wuu ta kpakpa lɛ, wɔ́da foi lɛ wɔgbe naa, ni wɔhiɛ hemɔkɛyeli lɛ mli tswɛ.’—2 Tim. 4:7.