Ní Aaajaje Anɔkwale lɛ Daa Gbi Kɛtsɔ Yesu Kasemɔ Nɔ
1 Yesu yɛ nitsumɔ pɔtɛɛ ko ni ebaatsu beni eba shikpɔŋ nɔ lɛ. Ewaaa kwraa: ‘Koni eye anɔkwale lɛ he odase.’ (Yoh. 18:37) Ejaje e-Tsɛ lɛ sui kɛ yiŋtoi ni yɔɔ naakpɛɛ lɛ ahe anɔkwale lɛ etsɔɔ. Nitsumɔ nɛɛ tamɔ niyenii kɛha lɛ; eshihilɛ fɛɛ damɔ nɔ. (Yoh. 4:34) Luka bɔ amaniɛ akɛ Yesu tee nɔ ‘etsɔɔ nii daa nɛɛ yɛ sɔlemɔwe lɛ.’ (Luka 19:47) Yesu kɛ be ni yɔɔ lɛ tsu nii jogbaŋŋ kɛmɔ shi. (Yoh. 9:4) Beni eshwɛ fioo ni ebaagbo lɛ, enyɛ ejaje etsɔɔ e-Tsɛ akɛ: “Mi lɛ miwo ohiɛ nyam yɛ shikpɔŋ lɛ nɔ, akɛni nitsumɔ lɛ ni oŋɔha mi tsumɔ lɛ, migbe naa lɛ.”—Yoh. 17:4.
2 Kɛ hiɛsɔɔ ni wɔyɔɔ kɛha nɔ fɛɛ nɔ ni Yehowa efee lɛ yimɔ wɔtsuii amli obɔbɔ lɛ, wɔ hu wɔnuɔ he akɛ ekã wɔnɔ akɛ wɔwie ehe daa gbi. Wɔtsɔɔ tamɔ Yesu kaselɔi lɛ pɛpɛɛpɛ, mɛi ni kɛ ekãa jaje akɛ: “Wɔnyɛŋ akɛ ja wɔwie nii ni wɔna kɛ nii ni wɔnu lɛ.” (Bɔf. 4:20) Yehowa he ni amɛwieɔ lɛ tee nɔ daa, ejaakɛ nɔ ni aŋma afɔ shi lɛ kɛɔ akɛ ‘amɛfɔ̃ɔɔ . . . be fɛɛ be.’ (Bɔf. 5:42) Esa akɛ wɔbi wɔhe akɛ, ‘Ani mikaseɔ mi-Tsɔɔlɔ, Yesu lɛ?’
3 Ní akɛ Hiamɔ Aaashiɛ: Yesu gba efɔ shi akɛ, kɛ ajaje Maŋtsɛyeli he shɛɛ sane lɛ agbe naa yɛ shikpɔŋ nɔ fɛɛ lɛ, “no dani naagbee lɛ aaaba.” (Mat. 24:14) Esa akɛ enɛ aha bɔ ni wɔ nitsumɔ lɛ he hiaa ha ni hiamɔ eba he lɛ ana wɔnɔ hewalɛ. Akɛni mɛi akpekpei abɔ wala yɛ oshara mli hewɔ lɛ, nɔ ko kwraa bɛ sɛɛ dɔŋŋ ni he hiaa waa ni wɔbaafee loo ni he yɔɔ sɛɛnamɔ. Akɛni nibii agbɛjianɔtoo nɛɛ miiba enaagbee hewɔ lɛ, be ni eshwɛ ni akɛbaagbe nitsumɔ nɛɛ naa lɛ faaa!
4 Amaniɛbɔi tsɔɔ akɛ, Yehowa miiwo mɛi ni tamɔ tooi lɛ anaabuamɔ lɛ foi. (Yes. 60:22) Yɛ je lɛŋ hei babaoo lɛ, mɛi babaoo diɛŋtsɛ miike yuu kɛmiiba anɔkwale lɛ mli, ni amɛ hu amɛkɛ mlifilimɔ miijaje akɛ: “Wɔkɛ nyɛ aaatee; ejaakɛ wɔnu akɛ Nyɔŋmɔ kɛ nyɛ yɛ!” (Zak. 8:23) Yesu wiemɔi lɛ eba mli anɔkwale waa diɛŋtsɛ fe bei fɛɛ ni eho, beni ekɛɛ: “Nikpamɔ lɛ fa moŋ, shi nitsulɔi lɛ faaa. . . . Nyɛkpaa nikpamɔ nuntsɔ lɛ fai, koni ewo nitsulɔi agbɛ kɛba enikpamɔ lɛ mli!” (Mat. 9:37, 38) Ani no kanyaaa wɔ koni wɔfee ekãa tamɔ Yesu kaselɔi ni ‘yɔɔ sɔlemɔwe lɛ daa nɛɛ, ni amɛhiɛ Nyɔŋmɔ yijiemɔ kɛ lɛ jɔɔmɔ’ mli lɛ?—Luka 24:53.
5 Ha Ale Anɔkwale lɛ Daa Gbi: Daa nɛɛ, esa akɛ wɔtao gbɛi ni wɔɔtsɔ nɔ wɔkɛ anɔkwale lɛ aha mɛi krokomɛi. Hegbɛi yɛ ni wɔnine baanyɛ ashɛ nɔ. Ani obaanyɛ okɛ minitii fioo ko atswa naanyo ko loo mɔ ko ni ole lɛ ni osusuɔ akɛ eeehere nɔ lɛ tɛlifon? Ni mɔ ko ni onaaa lɛ yɛ shia ni oooŋma lɛ wolo hu? Ani osusu he akɛ okɛ dɛhiɛmɔ wolo ko baaha shwapo-tsɛ lɛ, beni oheɔ nii lɛ? Ekolɛ, obaanyɛ osusu hegbɛi krokomɛi babaoo ni oyɔɔ daa gbi akɛ obaagba ohiɛnɔkamɔ lɛ he sane otsɔɔ mɛi krokomɛi lɛ he. Kɛ obɔ mɔdɛŋ ni ona ekãa fioo lɛ, Yehowa baaye abua bo.—1 Tes. 2:2.
6 No hewɔ lɛ, be mli ni wɔjeɔ gbi fɛɛ gbi nitsumɔ shishi lɛ, esa akɛ wɔbi wɔhe akɛ, ‘Ani matsɔ hiɛ mikɛ mɔ ko agba hiɛnɔkamɔ ni miyɔɔ lɛ he sane, kɛ miná hegbɛ ŋmɛnɛ?’ Kasemɔ Yesu ni tsɔɔ nɔ hewɔ ni atsu lɛ kɛba shikpɔŋ nɔ lɛ subaŋ lɛ: ‘Esa akɛ miyajajeɔ Nyɔŋmɔ maŋtsɛyeli lɛ he sanekpakpa lɛ.’ (Luka 4:43) Kɛ wɔmiisumɔ ni wɔtamɔ wɔ-Tsɔɔlɔ lɛ, wɔbaafee nakai pɛpɛɛpɛ.—Luka 6:40.