Sanebimɔ He
◼ Ani eji tɔmɔ akɛ nuu kɛ yoo ni amɛjeee wekumɛi ni bɛŋkɛ kpaakpa loo amɛjeee mɔ ko kɛ eŋa lɛ aaahi tsũ ko mli yɛ be mli ni aŋa shinaa lɛ?
Amaniɛbɔi ni Asafo lɛ nine shɛɔ nɔ lɛ tsɔɔ akɛ, nyɛmimɛi hii kɛ nyɛmimɛi yei komɛi kɛmiifee amɛsubaŋ akɛ, ákɛ nuu lɛ ekɛ yoo, loo ákɛ yoo lɛ, ekɛ nuu ni jeee egbalashihilɛ mli hefatalɔ, loo ejeee ewekunyo ni bɛŋkɛ kpaakpa tamɔ fɔlɔ, heloonaa nyɛmi nuu loo nyɛmi yoo pɛ aaahi tsũ ko mli yɛ be mli ni aŋa shinaa. Mɛi komɛi susuɔ sane he akɛ, kɛ nɔ fɔŋ ko baŋ lɛ, no lɛ ejeee tɔmɔ akɛ mɛi enyɔ lɛ pɛ aaahi tsũ ko mli yɛ be mli ni aŋa shinaa. Ani jwɛŋmɔ ni tamɔ nɛkɛ ja?
Ní nuu kɛ yoo ni jeee egbalashihilɛ mli hefatalɔ, loo ejeee ewekunyo ni bɛŋkɛ kpaakpa lɛ pɛ aaahi tsũ kome too lɛ nɔŋŋ mli beni aŋa shinaa lɛ ji nɔ ko ni nilee bɛ mli kwraa, akɛni ebaanyɛ ekɛ muji nitsumɔ loo jeŋba shara aba lɛ hewɔ, titri lɛ, kɛha mɛi ni kɛ amɛhe miiwo nyiɛmɔ ni tsɔɔ gbalashihilɛ hiɛ lɛ mli lɛ. Ebaanyɛ eha mɛi ni naa enɛ lɛ hu aje emuuyeli mli ni Odasefoi hiɛ lɛ he ŋwane, loo ebaanyɛ etɔ̃tɔ̃ mɛi komɛi anane po. Ní nuu kɛ yoo aaahi he ko kɛyashi jetsɛremɔ yɛ shihilɛi ni esaaa ni tamɔ nɛkɛ mli lɛ baanyɛ afee jeŋba gbonyo ni hiɛdɔɔ yɔɔ mli ni baabi ni onukpai lɛ atsu he nii kɛtsɔ saneyeli nɔ.—Abɛi 22:3; Gal. 5:19; Mat. 18:6, 7.
Ani abaanyɛ akwa shihilɛ ni tamɔ nɛkɛ? Hɛɛ. Mɛi komɛi, ni ji hii kɛ yei boteɔ naagbai amli yɛ gbɛ ni tamɔ nɛkɛ nɔ, kɛ amɛku amɛhiɛ amɛshwie kɔkɔbɔi ni nyɛmimɛi ni naa enɛ lɛ tsɔɔ hiɛ amɛkɛhaa lɛ nɔ lɛ. (1 Kor. 6:18; Abɛi 18:12) Mɛi komɛi eŋmɛ gbɛ ni hekɛnɔfɔɔ ni amɛyɔɔ yɛ amɛmli tsɔ̃ lɛ kɛ amale shweshweeshwe feemɔ etsɔ amɛ tsɔne. (Okɛto Abɛi 6:27 he.) Mɛi komɛi elaaje amɛ henɔyeli ni etsɔ amɛ tsɔne beni dãa ni wa numɔ náa amɛnɔ hewalɛ lɛ. No hewɔ lɛ, kwɛ bɔ ni sɛɛnamɔ yɔɔ he akɛ aaabo ŋaawoo ni yɔɔ Hoshea 4:11 lɛ toi akɛ: “Ajwamaŋbɔɔ kɛ wein kɛ wein hee fiteɔ mɔ jwɛŋmɔ.”
Awoɔ Kristofoi aŋaa shii abɔ ‘koni amɛhiɛ ahi amɛhe nɔ ni amɛsara’ yɛ be mli ni nuu kɛ yoo kɛ amɛhe yeɔ sharamɔ lɛ, bɔni afee ni Satan nine akashɛ amɛnɔ. (1 Pet. 5:8) Enɛ biɔ ni akwɛ jogbaŋŋ be fɛɛ be. Akɛ nɔkwɛmɔ nɔ lɛ, mla ko ni yɔɔ Betel lɛ biɔ koni Betel nitsulɔi agbele shinaa lɛ amɛfɔ kwraa yɛ be mli ni kɛ eji nuu lɛ, ekɛ yoo loo kɛ yoo lɛ ekɛ nuu ni jeee egbalashihilɛ mli hefatalɔ loo wekunyo ni bɛŋkɛ kpaakpa yɔɔ tsũ mli lɛ. Enɛ tsuɔ nii akɛ hebuu nɔ̃ eshiɔ kaa. (Mat. 6:13) Kaa lɛ mli bawaa waa kɛ mɛi enyɔ ni ekpaŋ akɛ amɛbaabote gbalashihilɛ mli lɛ kwɛɛɛ amɛhe nɔ jogbaŋŋ yɛ hei ni etse ehe banee lɛ. (1 Kor. 10:12) Yɛ mɛi ni kɛ amɛhe woɔ nyiɛmɔ ni tsɔɔ gbalashihilɛ hiɛ lɛ agbɛfaŋ lɛ, ŋaa ni awoɔ daa ji ni aha mɔ kroko afata he loo akpe yɛ kui amli. (Abɛi 28:26) Yɛ be mli ni je nɛɛ yaa nɔ efiteɔ yɛ jeŋba gbɛfaŋ lɛ, eba akɛ wɔteŋ mɔ fɛɛ mɔ aaahiɛ jeŋba ni he tse mli kɛwo wɔ Tsɛ Krɔŋkrɔŋ ni ji Yehowa hiɛ nyam.—Mat. 5:14-16; 1 Pet. 2:12.