Sanebimɔ He
◼ Mɛni esa akɛ afee kɛ́ oshara ko ba, ni esa wɔnyɛmimɛi lɛ ahe tɛ̃ɛ?
Kɛ Oshara Ba He ni Oyɔɔ Lɛ: Otsui akafa. Ye ohenumɔi anɔ, ni osusu nɔ ni jara wa diɛŋtsɛ lɛ he—wala, jeee nibii ni ayɔɔ. Tsu nibii ni he hiaa oweku lɛ fe fɛɛ lɛ he nii oha. No sɛɛ lɛ, ha onukpai lɛ ale bɔ ni oshihilɛ yɔɔ ha, kɛ he ni oyɔɔ yɛ nakai beaŋ.
Onukpai kɛ asafoŋ sɔɔlɔi lɛ tsuɔ nii ni he hiaa waa yɛ yelikɛbuamɔ nibii ni akɛhaa lɛ mli. Kɛ akɛ oshara ko ni baaba he kɔkɔbɔɔ hã, taakɛ eji yɛ ahum wuji komɛi ahe lɛ, esa akɛ nyɛmimɛi hii nɛɛ akwɛ koni mɔ fɛɛ mɔ ahi he ni yɔɔ shweshweeshwe, ni kɛ́ be yɛ lɛ, amɛtao nibii ni he baahia lɛ ni amɛjara amɛha.
Yɛ sɛɛ mli lɛ, esa akɛ asafo woloŋ nikasemɔ nɔkwɛlɔi lɛ ale hei ni weku fɛɛ weku yɔɔ, ni amɛle bɔ ni amɛyaa nɔ amɛhaa. Esa akɛ aha onukpai asɛinɔtalɔ lɛ loo onukpa kroko ale shia fɛɛ shia mli bii lɛ ashihilɛ, kɛ́ amɛyɛ jogbaŋŋ po. Kɛji akɛ mɔ ko epila lɛ, onukpai lɛ baabɔ mɔdɛŋ ni amɛto tsofafeemɔ he gbɛjianɔ. Amɛkɛ heloonaa nibii fɛɛ, tamɔ niyenii, atade, wɔɔhe, loo shia mli nibii ni he hiaa lɛ hu baaha. (Yoh. 13:35; Gal. 6:10) Asafoŋ onukpai lɛ baafi asafo lɛ sɛɛ yɛ mumɔŋ kɛ henumɔŋ, ni amɛbaato gbɛjianɔ mra, koni aje asafoŋ kpeei ashishi ekoŋŋ. Esa akɛ onukpa ko adamɔ onukpai akuu lɛ anajiaŋ, beni atao sane lɛ mli jogbaŋŋ agbe naa, koni ebɔ kpokpaa nɔkwɛlɔ lɛ pilamɔi, Maŋtsɛyeli Asa ni fite loo nyɛmimɛi ashiai ni fite, kɛ agbɛnɛ hu nibii ni he hiaa titri lɛ he amaniɛ. Kɛkɛ lɛ, kpokpaa nɔkwɛlɔ lɛ baatswa nitsumɔ he nine lɛ tɛlifon ni ekɛ shihilɛ lɛ he amaniɛbɔɔ aha. Nitsumɔ he nine lɛ baatsu yelikɛbuamɔ he nibii babaoo ni he baahia lɛ fɛɛ he nii.
Kɛ Oshara Ba He Kroko: Kaimɔ nyɛmimɛi hii kɛ nyɛmimɛi yei lɛ yɛ osɔlemɔi amli. (2 Kor. 1:8-11) Kɛ oosumɔ ni okɛ shika aye abua lɛ, obaanyɛ okɛ nibii ni okɛbaaye obua lɛ ayaha Asafo lɛ, he ni ato yelikɛbuamɔ he fotro he gbɛjianɔ aha enɛ yɛ lɛ. Adrɛs lɛ ji: Watch Tower, P. O. Box 760, Accra. (Bɔf. 2:44, 45; 1 Kor. 16:1-3; 2 Kor. 9:5-7; kwɛmɔ December 1, 1985, Blɔfo Buu-Mɔɔ, baafai 20-2.) Okɛ nibii akayaha yɛ he ni oshara lɛ eba yɛ lɛ, ja nyɛmimɛi ni kwɛɔ nɔ lɛ eha hegbɛ dã. Enɛ baaha nine ashɛ yelikɛbuamɔ nibii lɛ anɔ yɛ gbɛjianɔtoo kpakpa naa, ni ajara nibii lɛ jogbaŋŋ. (1 Kor. 14:40) Ofainɛ kaatswa Asafo lɛ tɛlifon bɔ ni esaaa, akɛni enɛ baanyɛ atsĩ tɛlifon gbɛi sɔrɔtoi ni he hiaa ni akɛbaatsu tɛlifon ni atswaa kɛjɛɔ he ni oshara lɛ eba yɛ lɛ he nii lɛ naa lɛ hewɔ.
Beni ábu nibii lɛ anaa jogbaŋŋ agbe naa lɛ, Asafo lɛ baakpɛ eyiŋ kɛji esa akɛ ato yelikɛbuamɔ ajinafoi akuu he gbɛjianɔ. Abaaha nyɛmimɛi hii ni he hiaa lɛ ale. Esa akɛ mɔ fɛɛ mɔ kɛ onukpai ni nyiɛɔ hiɛ lɛ afee ekome, koni nine anyɛ ashɛ nyɛmimɛi lɛ fɛɛ ahiamɔ nii anɔ bɔ ni sa.—Kwɛmɔ Jehovah’s Witnesses—Proclaimers of God’s Kingdom wolo lɛ baafai 310-15.