Okɛ Nibii ni He Hiaa Babaoo lɛ Aye Klɛŋklɛŋ Gbɛhe
1 Mɛni ji nibii ni he hiaa ni he miihia kɛha wɔmumɔŋ hilɛ-kɛ-hamɔ lɛ ateŋ ekomɛi? Nɔ ni fata enɛmɛi ahe ji teemɔŋ nikasemɔ, kpeeiyaa, sɔlemɔ daa, naanyobɔɔ kpakpa, kɛ Kristofoi asɔɔmɔ lɛ. Wɔnyɛŋ wɔná mumɔŋ hewalɛ kpakpa kɛji wɔkɛ nibii ni he hiaa babaoo lɛ yeee klɛŋklɛŋ gbɛhe yɛ wɔ shihilɛi amli.
2 Shi kɛlɛ, wɔ fɛɛ wɔyɛ ta ko ni wɔkɛ wɔ heloo akɔnɔi lɛ wuɔ, ni ehe miihia ni wɔná tsɔsemɔ. (Gal. 5:17) Esaaa akɛ wɔnuɔ he kɔkɔɔkɔ akɛ kɛji akɛ wɔtiu pɛsɛmkunya nibii asɛɛ lɛ wɔbaana he sɛɛ babaoo. (Yer. 17:9) No hewɔ lɛ, kɛji akɛ wɔɔbu wɔtsui he ni wɔkaha aashishiu wɔ lɛ, no lɛ he kaa-kɛ-kwɛmɔ daa he miihia.—Abɛi 4:23; 2 Kor. 13:5.
3 Pɛimɔ Bo Diɛŋtsɛ Otsui Mli Okwɛ: Obaanyɛ ofee enɛ kɛtsɔ sanebimɔi komɛi ni yɔɔ faŋŋ ni ooobi ohe lɛ nɔ: Ani miishwe akɛ makane Nyɔŋmɔ Wiemɔ lɛ? (1 Pet. 2:2) Ani mihiɛ sɔɔ hiamɔ ni yɔɔ asafoŋ kpeei fɛɛ ni maya lɛ he? (Heb. 10:24, 25) Ani mihiɛɔ sɔlemɔ mli daa? (Rom. 12:12) Ani misumɔɔ gbɔmɛi ni jwɛŋɔ mumɔŋ nibii ahe lɛ kɛ naanyobɔɔ? (Rom. 1:11, 12) Ani minuɔ he akɛ gbɛnaa nii kã minɔ akɛ mijaje sanekpakpa lɛ? (1 Kor. 9:16) Sane hetoo ni ja ni okɛaaha sanebimɔi nɛɛ baatsɔɔ akɛ oosumɔ ni okɛ nibii ni he hiaa babaoo lɛ ayɛ klɛŋklɛŋ gbɛhe.
4 Pɛimɔ Odaa Gbi Shihilɛ Mli Nitsumɔ Mli Okwɛ: Ehe miihia ni odi otsuiŋ akɔnɔi amlipɛimɔ lɛ sɛɛ kɛtsɔ be kɛ nitsumɔ ni he hiaa lɛ he gbɛjianɔtoo nɔ. Nɔ ni fata enɛ he ji ni oooto be kɛha Biblia lɛ kɛ Buu-Mɔɔ kɛ Awake! lɛ eko fɛɛ eko ni baa lɛ kanemɔ daa, kɛ agbɛnɛ ni ooosaa ohe kɛha kpeei. Esa akɛ oto be oha weku lɛ hu kɛha nikasemɔ kɛ sɔlemɔ kutuu. Jee husu owo be ni afiteɔ akɛkwɛɔ TV loo akɛtsuɔ kɔmpiuta nɔ nibii lɛ ahe. Tswaa ofai shi akɛ obaaya asafoŋ kpeei fɛɛ, ni oto nibii krokomɛi ni eshwɛ lɛ ahe gbɛjianɔ obɔle lɛ. Too gbɛjianɔ oha weku lɛ mli bii fɛɛ koni amɛkɛ amɛhe awo shiɛmɔ nitsumɔ lɛ mli daa otsi.
5 Ŋwanejee ko bɛ he akɛ ni wɔɔha nibii ni he hiaa lɛ aba klɛŋklɛŋ yɛ wɔshihilɛ mli lɛ baaha wɔná miishɛɛ.