Mɛi Ahiɛ Tseɔ Bo!
1 Yɛ be kɛ bei amli lɛ, ekolɛ wɔbaafo asafoŋ kpee kome loo babaoo mli, ni wɔbaanu he akɛ ‘mɔ ko mɔ ko hiɛ tseŋ mi; amɛyɔseŋ po akɛ mibɛ jɛmɛ.’ No jeee anɔkwale! Taakɛ bɔ ni wɔgbɔmɔtso lɛ he nii lɛ eko fɛɛ eko ji lɛ, wɔteŋ mɔ fɛɛ mɔ tsuɔ gbɛnaa nii ni he hiaa he nii yɛ asafo lɛ nɔyaa mli. (1 Kor. 12:12) Otsi lɛ mli kpee ni wɔɔfo mli lɛ baanyɛ asa mɛi krokomɛi ni baa lɛ amumɔŋ hilɛ-kɛhamɔ he. Kɛ obɛ jɛmɛ lɛ, ná nɔmimaa akɛ—mɛi ahiɛ tseɔ bo!
2 Nɔ Titri ni Otsuɔ he Nii: Paulo shwe akɛ ekɛ enyɛmimɛi lɛ aaabɔ. Romabii 1:11, 12 (NW) tsɔɔ nɔ hewɔ: “Koni manyɛ ni mikɛ mumɔŋ nikeenii ko aha nyɛ . . . koni nyɛnyɛ ni nyɛna hewalɛwoo tsakemɔ yɛ nyɛteŋ, mɔ fɛɛ mɔ kɛtsɔ mɔ kroko lɛ hemɔkɛyeli nɔ, nyɛnɔ lɛ kɛ minɔ lɛ fɛɛ.” Nakai nɔŋŋ kɛtsɔ wɔsaji ahetoohamɔ, kpee lɛ mli nifeemɔi ni wɔtsuɔ he nii, kɛ jɛmɛ diɛŋtsɛ ni wɔyɔɔ lɛ nɔ lɛ, wɔnyɛɔ wɔtswaa wɔteŋ mɔ fɛɛ mɔ wɔmaa shi koni eya nɔ yɛ anɔkwa gbɛ ni enyiɛ nɔ lɛ mli.—1 Tes. 5:11.
3 Ani okwɛɛɛ gbɛ akɛ ooona mɛi krokomɛi yɛ asafoŋ kpeei ashishi? Obuɔ amɛsaji ahetoohamɔ lɛ toi jogbaŋŋ, ni ohiɛ sɔɔ amɛhemɔkɛyeli he wiemɔi lɛ. Amɛmumɔŋ nikeenii lɛ tswaa bo emaa shi. Eji amɛbɛ kpee lɛ shishi kulɛ, obaanu he akɛ nɔ ko ni he hiaa elaaje. Onyɛmimɛi hii kɛ yei lɛ nuɔ he nakai nɔŋŋ amɛhaa bo kɛji obɛ jɛmɛ.
4 Titri ni Kpeei Tsuɔ he Nii: Gbi ko lɛ, Buu-Mɔɔ lɛ wie bɔ ni kpeei lɛ ahe hiaa kɛha wɔmumɔŋ yibaamɔ lɛ he, ni ekɛɛ akɛ: “Kristofoi asafo lɛ ji mumɔŋ abobaa he diɛŋtsɛ yɛ jeŋ ni béi kɛ jeŋba shara eyi mli obɔ nɛɛ mli . . . , toiŋjɔlɛ kɛ suɔmɔ hejɔɔmɔhe. No hewɔ lɛ, feemɔ mɔ ni yaa emli kpeei lɛ fɛɛ ashishi daa.” (w-GA 93 8/15 11) Gbi fɛɛ gbi lɛ, wɔkɛ shihilɛi ni haa etɔɔ wɔ yɛ mumɔŋ lɛ kpeɔ. Kɛ wɔkwɛɛɛ wɔhe nɔ jogbaŋŋ lɛ, wɔbaanyɛ wɔkɛ wɔhe awo wɔ diɛŋtsɛ wɔyeyeeyefeemɔi amli vii aahu akɛ ekolɛ wɔbaajie wɔjwɛŋmɔ yɛ mumɔŋ nibii ni he hiaa titrii lɛ anɔ. Wɔ fɛɛ wɔhiɛ kã wɔteŋ mɔ fɛɛ mɔ nɔ kɛha hewalɛwoo ni he hiaa wɔ lɛ, bɔni afee ni wɔya nɔ wɔfee ekome kɛ ekãa yɛ Nyɔŋmɔ sɔɔmɔ lɛ mli.—Heb. 10:24, 25.
5 Kpeei ni wɔɔya lɛ he miihia. Bei komɛi lɛ, hela loo nibii ni baa trukaa ni aleee lɛ baanyɛ atsi wɔnaa. Kɛ jeee nakai lɛ, nyɛhaa wɔtswaa wɔfai shi akɛ aaakane wɔ ashi asafo yuu ni kɛ yijiemɔ haa Yehowa lɛ he lɛ nɔ daa!—Lala 26:12.