Kwɛ Bɔ ni Ehi akɛ Wɔɔya Daa Gbi!
1 Akɛ afii nyɔŋmai abɔ tsĩ wɔsuɔlɔi nyɛmimɛi ni yɔɔ Europa Bokagbɛ lɛ naa koni amɛkakpe yɛ faŋŋ mli. Susumɔ bɔ ni amɛbaaná miishɛɛ amɛha beni ajie naatsii lɛ, ni agbɛnɛ amɛnyɛɔ amɛyaa kpee kutuu yɛ heyeli mli lɛ he okwɛ!
2 Kpokpaa nɔkwɛlɔ ko ŋma kɛkɔ asafo ko ni tamɔ nakai ni eyasara lɛ he akɛ: “Jufɔ gbɛkɛ beni mije saramɔ lɛ shishi nɔŋŋ kɛkɛ ni tsɔne ni ásũ ni eha tsũ lɛ mli efee kulɔkulɔ lɛ gbo. Agbo lɛ naa ejɔ ŋanii diɛŋtsɛ, ni mligbɛ hu mlijɔlɛ lɛ shɛɔ Kɔɔyɔɔ Mlijɔlɛ Susumɔ 40. Nyɛmimɛi lɛ wo amɛkootui kɛtara shi, amɛfĩfĩi dukui, amɛkɛ nibii ewowoo amɛniji ahe, amɛbumɔ faii, ni amɛwowoo aspaatrei agboi. Mɔ ko mɔ ko nyɛɛɛ akane Biblia lɛ kɛnyiɛ sɛɛ, ejaakɛ baafai lɛ ehiii gbelemɔ. Midamɔ wiemɔ kpoku lɛ nɔ, ni mishɔ̃ kekree, ni be fɛɛ be ni mawie lɛ, minyɛɔ minaa lamɔ ni jɛɔ migugɔŋ lɛ. Shi nɔ ni sa mihiɛ waa ji akɛ, minuuu ni mɔ kome po miiwie huhuuhu. Nyɛmimɛi lɛ fɛɛ kɛɛ, kwɛ bɔ ni eji miishɛɛ ni ehi akɛ wɔba!” Nakai nyɛmimɛi lɛ susuuu po akɛ amɛaaha nakai kpee lɛ aho amɛhe!
3 Ani Wɔnuɔ He Nakai? Ani wɔkɛ hegbɛ ni wɔná akɛ wɔkpe yɛ heyeli mli yɛ wɔdaa otsi kpeei lɛ ashishi lɛ tsuɔ nii? Aloo kɛ shihilɛi lɛ hi lɛ wɔjieee hiɛsɔɔ kpo wɔtsɔɔɔ kpeei lɛ? Kpeei ni wɔɔya daa lɛ bɛ mlɛo, ni ekolɛ bei komɛi baashɛ ni wɔɔná yiŋtoo kpakpa ko hewɔ ni haŋ wɔya. Shi ohiɛ akakpa nɔ akɛ mɛi komɛi yɛ wɔteŋ ni yɛ gbɔlɛ, gbɔmɔtsoŋ hewalɛ naagbai ni mli wa, kpajee, nitsumɔ ni deka bɛ mli kwraa, kɛ sɔ̃i krokomɛi ni hiɛdɔɔ yɔɔ mli lɛ fɛɛ sɛɛ lɛ amɛnaa bɔ ni kpeei ahe hiaa ha, ni kɛ hoo lɛ amɛyaa daa gbi. Nɔkwɛmɔnɔ kpakpa ni esa akɛ wɔkaseɔ nɛ!—Okɛto Luka 2:37 he.
4 Nyɛhaa wɔhaa efea wɔsubaŋ akɛ wɔɔfĩ anɔkwa jamɔ sɛɛ kɛtsɔ Kristofoi akpeei fɛɛ ni wɔɔya lɛ nɔ, kɛjɛ woloŋ nikasemɔ ni kuu fio ko pɛ yɔɔ mli lɛ nɔ kɛyashi kpee wulu nɔ. Mɛni hewɔ esa akɛ wɔbuɔ henaabuamɔi ni wɔɔya nɛɛ akɛ nɔ ko ni hiɛdɔɔ yɔɔ mli lɛ? Ejaakɛ eji fãmɔ ni jɛ ŋwɛi akɛ wɔkpe kutuu. Shi yiŋtoi krokomɛi ni he hiaa hu yɛ. Ŋwɛi tsɔsemɔ kɛ yelikɛbuamɔ ni mumɔ krɔŋkrɔŋ lɛ kɛhaa ni wɔnine shɛɔ nɔ yɛ kpeei ashishi lɛ he sɛɛ ni wɔɔná lɛ he miihia wɔ fɛɛ. (Mat. 18:20) Atsɔɔ hewalɛwoo ni wɔkɛhaa wɔhe yɛ be mli ni wɔkɛ wɔnyɛmimɛi ni hiɛ hemɔkɛyeli ni jara wa tamɔ wɔnɔ̃ lɛ nɔŋŋ gbaa sane lɛ nɔ atswaa wɔ amaa shi.—Heb. 10:24, 25.
5 Yɛ Yesu hiɛ su ni tsake lɛ mli lɛ, Petro kɛɛ akɛ, “Nuntsɔ, ehi akɛ wɔhiɔ biɛ.” (Luka 9:33) Esa akɛ wɔnáa henumɔ ni tamɔ nakai nɔŋŋ wɔhaa wɔ-Kristofoi akpeei fɛɛ. Lɛɛlɛŋ, kwɛ bɔ ni ehi akɛ wɔɔya daa gbi!