Feemɔ Shiɛlɔ ni Hiɛ Yɔɔ Woji Tɛtrɛbii lɛ Anɔ
1 Yehowa kɛ shɛɛ sane ko ni he hiaa eha wɔ akɛ wɔjaje, ni Buu-Mɔɔ kɛ Awake! woji tɛtrɛbii lɛ tsuɔ gbɛfaŋnɔ ni he hiaa waa yɛ shɛɛ sane lɛ ni wɔkɛaaha mɛi krokomɛi lɛ amli. Woji tɛtrɛbii nɛɛ ahe baanyɛ aba sɛɛnamɔ kɛha gbɔmɛi srɔtoi fɛɛ yɛ shihilɛ fɛɛ shihilɛ mli ejaakɛ saji ni yɔɔ ebe naa ni saa gbɔmɛi ahiamɔ nii diɛŋtsɛ ahe ji nɔ ni yɔɔ mli—amɛmumɔŋ, amɛhenumɔŋ, amɛshihilɛ, kɛ amɛweku mli saji.—Mat. 5:3; Bɔf. 26:18.
2 Eyɛ mli akɛ woji tɛtrɛbii nɛɛ ajaa miiya hiɛ yɛ he fɛɛ he moŋ, shi niiamlipɛimɔ ko ni afee nyɛsɛɛ nɛɛ lɛ tsɔɔ akɛ, ehe miihia ni shiɛlɔi ni yɔɔ maŋ nɛɛ mli lɛ amli fã agbala amɛjwɛŋmɔ kɛya woji tɛtrɛbii ni amɛkɛhaa mɛi aŋkroaŋkroi lɛ anɔ babaoo. Akɛni wɔyɔɔ naagbee be lɛ mli vii hewɔ lɛ, mɛɛ gbɛ nɔ wɔteŋ mɔ fɛɛ mɔ baanyɛ afee mɔ ni hiɛ yɔɔ woji tɛtrɛbii lɛ anɔ yɛ?
3 Aŋkro Hesaamɔ He Miihia: Amaniɛbɔi ni jɛ maŋ lɛŋ etsɔɔ akɛ shiɛlɔi enyɔ pɛ yɛ shiɛlɔi etɛ fɛɛ shiɛlɔi etɛ mli kaneɔ Buu-Mɔɔ kɛ Awake! woji tɛtrɛbii lɛ eko fɛɛ eko ni baa lɛ daa. Kɛ wɔɔfee mɛi ni hiɛ yɔɔ woji tɛtrɛbii lɛ anɔ lɛ, ehe miihia ni wɔkane eko fɛɛ eko ejaakɛ enɛ baaye abua wɔ koni wɔ diɛŋtsɛ wɔhiɛ asɔ bɔ ni amɛhe yɔɔ sɛɛnamɔ lɛ waa. Kɛ wɔle saji ni yɔɔ woji tɛtrɛbii lɛ amli lɛ, ebaaha hekɛnɔfɔɔ ni wɔyɔɔ kɛ bɔ ni wɔsumɔɔ koni wɔkɛha lɛ aya hiɛ. Yɛ be mli ni okaneɔ eko fɛɛ eko lɛ, bi ohe akɛ, ‘Namɔ baanya nɛkɛ sane nɛɛ he?’
4 Hiɛkpamɔi ni Mɔɔ Shi: Too shiɛmɔ wiemɔi kukuji fioo komɛi ahe gbɛjianɔ. Halamɔ sane ni baatee nuu miishɛɛ shi, ekroko kɛha yoo, kɛ ekroko kɛha oblahii kɛ oblayei. Shiɛmɔ wiemɔ ní hi fe fɛɛ ji ni ótee sanebimɔ shi yɛ sane ni anyaa he lɛ he, koni agbɛnɛ otsɔɔ sane ni kɛ Ŋmalɛ naa hetoo haa. Hiɛmɔ jwɛŋmɔ kpakpa kɛ naanyobɔɔ su. Feemɔ tswãa ni otao saji ni okɛ shiatsɛ lɛ kpãa gbee yɛ he.
5 Okɛ Hegbɛ Fɛɛ Hegbɛ Atsu Nii: Ekolɛ, sane ni yɔɔ wolo tɛtrɛɛ kome mli lɛ pɛ ji nɔ ni he hiaa mɔ ko koni ekɛbale anɔkwale lɛ! No hewɔ lɛ, kɛ́ okɛ ohe miiwo shia kɛ shia loo gbɛjegbɛ nɔ shiɛmɔ mli jio, shwapo kɛ shwapo loo gbɛkɛnaashi odaseyeli mli jio, kɛ́ oofee sɛɛsaramɔi loo Biblia mli nikasemɔ jio lɛ, okɛ hegbɛ fɛɛ hegbɛ ni yɔɔ lɛ atsu nii kɛmɔ shi koni okɛ woji tɛtrɛbii nɛɛ aha. Bɔni afee ni okanya ohe lɛ, okɛ woji tɛtrɛbii lɛ yibɔ pɔtɛɛ ko ni okɛbaaha nyɔŋ fɛɛ nyɔŋ nɔ lɛ he oti ko ama ohiɛ.
6 Ni trukaa bei amli hu? Nyɛminuu ko ni ta bɔs bibii (trɔtrɔ) lɛ eko mli kɛmiiya nitsumɔ lɛ bɔi lɛ diɛŋtsɛ e-Buu-Mɔɔ lɛ kanemɔ. Mɔ ni ta emasɛi lɛ jie miishɛɛ kpo, ni nɔ ni jɛ mli ba ji akɛ, nyɛminuu lɛ kɛ woji tɛtrɛbii srɔtoi etɛ ha lɛ amrɔ nɔŋŋ! Enɛ tsɔɔ sɛɛnamɔ ni yɔɔ he akɛ wɔɔhiɛ woji tɛtrɛbii lɛ eko yɛ he fɛɛ he ni wɔyaa lɛ. Okɛha nanemɛi nitsulɔi, akutsoŋbii, skul nanemɛi loo tsɔɔlɔi yɛ be fɛɛ be ni sa mli.
7 Buu-Mɔɔ kɛ Awake! lɛ ji woji tɛtrɛbii ni sɛɛnamɔ yɔɔ he fe fɛɛ ni gbɔmɛi baanyɛ akane ŋmɛnɛ. Mumɔŋ anɔkwale ni yɔɔ mli lɛ baanyɛ aná hewalɛ kpakpa ni hiɔ shi daa yɛ gbɔmɛi ashihilɛi anɔ. Ani obaanyɛ ni kɛ́ hoo lɛ oto gbi kome daa otsi kɛha woji tɛtrɛbii ahe odaseyeli? Eba akɛ, wɔ fɛɛ wɔbaatsu nii waa koni wɔkanya shiatsɛmɛi lɛ amiishɛɛ yɛ nɛkɛ woji tɛtrɛbii nɛɛ amli, ni wɔkɛha yɛ hegbɛ fɛɛ hegbɛ mli.—1 Tim. 2:3, 4; 4:16.