Wɔteke Oti ni Ji Akpei Nyɔŋmai Ekpaa Lɛ!
Sɔɔmɔ Afi lɛ Ba Naagbee Kɛ Shiɛlɔi Ayifalɛ Hee ni Ji 60,112 ni Buɔ Amɛshiɛmɔyaa He Akɔntaa
“Akpei nyɔŋmai ekpaa!” ji tsɛmɔ ni akɛha yɛ July Wɔ Maŋtsɛyeli Sɔɔmɔ lɛ mli. Shiɛlɔi 60,112 ni buɔ amɛshiɛmɔyaa he akɔntaa yɛ August mli lɛ here nakai tsɛmɔ lɛ nɔ. Enɛ ji yifalɛ ni feɔ 5,878 ni bagbe yi loo oha mlijaa 10.8 ni fa fe nyɛsɛɛ yifalɛ ni fe fɛɛ ni aná yɛ August 1997 mli lɛ. Wɔmiisɔle ni Yehowa ajɔɔ wɔmɔdɛŋbɔi anɔ daa koni wɔjaje e-Maŋtsɛyeli lɛ wɔtsɔɔ.
Aawo onukpai, asafoŋ sɔɔlɔi, kɛ shiɛlɔi fɛɛ hu hewalɛ koni amɛsusu mɔdɛŋ ni amɛbɔ ni ha ashɛ oti nɛɛ he lɛ he. Shiɛlɔi akpei nyɔŋmai ekpaa kɛ nɔ ni fata he lɛ ji mɛi ni kɛ wɔ yɔɔ momo yɛ asafoi lɛ amli. Ni babaoo yɛ ni baaba daa nyɔŋ nɔ yɛ be mli ni wɔtsuɔ wɔsɔɔmɔ nitsumɔ lɛ he nii daa kɛmɔɔ shi lɛ. Shi kɛlɛ, gbɛjianɔ kpakpa ni atoɔ kɛhaa shiɛmɔ nitsumɔ lɛ, kɛ yelikɛbuamɔ ni mlijɔlɛ yɔɔ mli ní akɛhaa yɛ he ni ehe hiaa yɛ lɛ, ji nɔ ni he hiaa waa kɛha nɔyaa babaoo. Wɔmiikpa gbɛ akɛ, Yehowa kɛ ejɔɔmɔ ni he hiaa fe fɛɛ lɛ baaha koni aya hiɛ be fɛɛ be.—1 Kor. 3:7.
Kɛ onukpai kɛ asafoŋ sɔɔlɔi—titri lɛ mɛi ni ji Asafo Woloŋ Nikasemɔ nɔkwɛlɔi lɛ—kɛ shiɛlɔi krokomɛi ni edara yɛ mumɔŋ kɛ gbɛgbalɔi lɛ hiɛ mɔdɛŋbɔɔ krɛdɛɛ ni amɛkɛtsu nii yɛ August mli lɛ mli lɛ, Yehowa jɔɔmɔ babaoo baaje kpo kɛ̃ yɛ shiɛlɔi ayifalɛi ni yaa nɔ daa lɛ mli. Bei komɛi lɛ nɔ ni he hiaa kɛkɛ ji wiemɔ ni akɛkaiɔ mɔ yɛ mlijɔlɛ mli koni akɛ he awo shiɛmɔ nitsumɔ lɛ mli kɛ agbɛnɛ ekolɛ wiemɔ kroko ni akɛkaiɔ mɔ koni akɛ shiɛmɔyaa he akɔntaabuu lɛ aha. Akɛ ŋaawoi krokomɛi baaha yɛ Wɔ Maŋtsɛyeli Sɔɔmɔ lɛ mli koni eye ebua wɔ ni wɔya hiɛ yɛ wɔnitsumɔ lɛ mli koni eha wɔmiishɛɛ lɛ afá babaoo yɛ be mli ni mɔdɛŋ ni wɔbɔɔ lɛ woɔ yibii kpakpai lɛ.
Tswaa Oshihilɛ Oma Yehowa Sɔɔmɔ Nɔ
1 Yesu kɛ etoibolɔi lɛ to tsumalɔi srɔtoi enyɔ he. Mɔ kome tswa eshihilɛ gbɛ lɛ ema tɛsaa ni ji toiboo ni afeɔ ahaa Kristo lɛ nɔ, ni enyɛ edamɔ ahum srɔtoi ni ji shitee-kɛ-woo kɛ amanehulu naa. Mɔ kroko lɛ tswa ema shia ni ji toigbele mli pɛsɛmkunya nɔ, ni enyɛɛɛ shi edamɔ beni nɔnyɛɛ ba lɛ. (Mat. 7:24-27) Akɛni nibii agbɛjianɔtoo nɛɛ naagbee mli wɔyɔɔ hewɔ lɛ, ahum srɔtoi babaoo ni ji amanehulu baa wɔnɔ. Amanehulu kpeteŋkpele lɛ he gbeyei nibii ni jieɔ amɛhe kpo lɛ miibua amɛhe naa oyayaayai. Ani wɔbaaŋmɛ wɔtsui shi kɛyashi naagbee ni nɔ ko kwraa fiteŋ wɔhemɔkɛyeli? (Mat. 24:3, 13, 21) Babaoo damɔ bɔ ni wɔtswaa wɔshihilɛi wɔmaa shi amrɔ nɛɛ lɛ nɔ. No hewɔ lɛ, ehe miihia waa ni wɔbi wɔhe akɛ, ‘Ani miitswa Kristofoi ashihilɛ ni miyɔɔ mli lɛ miima Nyɔŋmɔ sɔɔmɔ ni afeɔ toiboo yɛ mli lɛ nɔ waa diɛŋtsɛ?’
2 Wɔshihilɛi ní wɔɔtswa wɔma Yehowa sɔɔmɔ nɔ lɛ tsɔɔ mɛni? Etsɔɔ akɛ, wɔmiiha Yehowa afee mɔ titri ni he hiaa fe fɛɛ yɛ wɔshihilɛi amli. Nɔ ni fata he ji wɔjwɛŋmɔ ni wɔkɛaama Maŋtsɛyeli lɛ nɔ akɛ nɔ ni wɔsusuɔ he titri. Nɔ ni etsɔɔ ji ni wɔɔbo Nyɔŋmɔ toi yɛ wɔ daa gbi shihilɛ mli nifeemɔi fɛɛ amli. Etsɔɔ akɛ ni wɔkɛ wɔtsui fɛɛ aaakase Biblia lɛ akɛ aŋkroaŋkro, weku, kɛ asafo, kɛ agbɛnɛ ni wɔkɛ wɔtsui fɛɛ aaawo wɔ shiɛmɔ nitsumɔ lɛ mli, ní wɔkɛ enɛɛmɛi aye klɛŋklɛŋ gbɛhe. (Jaj. 12:13; Mat. 6:33) Toiboo nifeemɔ gbɛ ni tamɔ nɛkɛ lɛ haa anáa hemɔkɛyeli ni mli wa tamɔ tɛsaa, ni amanehului srɔtoi ni ji ahum ni tswaa lɛ nyɛŋ akumɔ eshwie shi.
3 Eji miishɛɛ akɛ aaana gbɔmɛi akpekpei abɔ ni amɛkɛ nɔmimaa miitswa amɛshihilɛi kɛ amɛhiɛnɔkamɔi kɛha wɔsɛɛ be lɛ kɛmiima Nyɔŋmɔ sɔɔmɔ nɔ, taakɛ Yesu fee lɛ. (Yoh. 4:34) Amɛkɛ amɛhe kpɛtɛɔ teokrase nitsumɔi ahe gbɛjianɔtoo ni yɔɔ daa lɛ he ni amɛnáa jɔɔmɔi babaoo ni jɛɔ mli baa lɛ mli ŋɔɔmɔ. Nyɛ ko tsɔɔ bɔ ni ekɛ ewu tsɔse amɛbihii enyɔ yɛ omanyeyeli mli kɛha Yehowa sɔɔmɔ: “Wɔhaa anɔkwale lɛ yiɔ wɔ shihilɛi amli obɔ—wɔyaa kpeei wuji lɛ fɛɛ, wɔsaa wɔhe kɛhaa kpeei lɛ ni wɔyaa hu, ni wɔkɛ wɔhe woɔ shiɛmɔyaa mli daa yɛ wɔ shihilɛi amli.” Ewu kɛfata he akɛ: “Anɔkwale lɛ jeee wɔ shihilɛ lɛ fã ko, shi moŋ no ji wɔ shihilɛ. Nibii krokomɛi fɛɛ damɔ no nɔ.” Ani bo hu okɛ Yehowa sɔɔmɔ lɛ eye gbɛhe ni he hiaa fe fɛɛ yɛ oweku lɛ mli?
4 Too Nifeemɔ ni Obaanyɛ Okɛtsu Nii Daa Otsi lɛ He Gbɛjianɔ: Yehowa gbɛjianɔtoo lɛ yeɔ ebuaa wɔ koni wɔkɛ mumɔŋ nitsumɔ he gbɛjianɔtoo kpakpa atsu nii daa kɛtsɔ daa otsi kpeei enumɔ he gbɛjianɔ ni atoɔ lɛ nɔ. Kristofoi ni tswaa amɛshihilɛi amɛmaa Yehowa jamɔ nɔ lɛ toɔ amɛnifeemɔi kɛ weku saji ahe gbɛjianɔ bɔ ni baaha amɛya kpeei ni he hiaa nɛɛ fɛɛ. Amɛŋmɛɛɛ gbɛ koni saji ni he ehiaaa tsɔ aha amɛfolɔ kpee ni amɛaaya daa lɛ mli.—Fil. 1:10; Heb. 10:25.
5 Kristofoi ni edara yɛ mumɔŋ lɛ yɔseɔ akɛ taakɛ bɔ ni ehe hiaa ni aye nii daa yɛ bei pɔtɛɛ komɛi amli gbi fɛɛ gbi lɛ, nakai nɔŋŋ ehe hiaa ni ato gbɛjianɔ kpakpa kɛha teemɔŋ nikasemɔ kɛ weku nikasemɔ, ni gbɛjianɔ ni atoɔ koni aya kpeei hu fata he. (Mat. 4:4) Kɛ hoo lɛ, ani obaanyɛ oto minitii 15 loo minitii 20 he gbɛjianɔ kɛha teemɔŋ nikasemɔ daa gbi? Yiŋtoo lɛ ji akɛ, koni nibii krokomɛi akabote be ni ato ama shi kɛha nikasemɔ lɛ mli nigii. Ha efee nifeemɔ ni he baa sɛɛnamɔ daa. Ekolɛ enɛ baabi koni ote shi mra fe bɔ ni amrɔ nɛɛ, ofeɔ daa leebi lɛ. Betel weku lɛ mli bii 17,000 ni yɔɔ jeŋ fɛɛ lɛ teɔ shi leebi maŋkpa koni amɛsusu daa gbi ŋmalɛ lɛ he. Shi kɛlɛ, mra shitee biɔ koni ato ŋmɛlɛtswaa ko ni hi saŋŋ he gbɛjianɔ gbɛkɛ koni ayawɔ bɔni afee ni aná hejɔɔmɔ ni sa, kɛ hewalɛ ni akɛje gbi ni baanyiɛ sɛɛ lɛ shishi.
6 Kɛ oji weku yitso lɛ, ŋɔɔ hegbɛ lɛ koni okɛto oweku lɛ teokrase nifeemɔ he gbɛjianɔ. Wekui komɛi kaneɔ Biblia lɛ, Yearbook lɛ, loo wolo kroko kutuu yɛ be mli ni amɛye gbɛkɛ niyenii amɛgbe naa ni amɛjɔɔ amɛhe lɛ. Fɔlɔi babaoo ni naa amɛbii akɛ amɛdara amɛtsɔmɔ Kristofoi ni he wa yɛ mumɔŋ lɛ kɛɔ akɛ nɔ kome ni haa amɛyeɔ omanye lɛ ji daa gbɛjianɔtoo ni ji gbɛkɛ kome ni weku lɛ kɛtsuɔ nii daa otsi ni amɛkɛnáa be ni tswaa mɔ maa shi yɛ mumɔŋ lɛ mli ŋɔɔmɔ kutuu lɛ. Tsɛ ko ni tamɔ nakai kɛɛ: “Minuɔ he akɛ wɔbii lɛ amumɔŋ nɔyaa lɛ titri jɛ wɔ daa Shɔ gbɛkɛ weku nikasemɔ ni wɔfeɔ lɛ, ní wɔje shishi aaafee afii 30 ni eho nɛ lɛ.” Abaptisi ebii etɛ lɛ fɛɛ beni amɛdarako kwraa, ni sɛɛ mli lɛ amɛyi etɛ lɛ fɛɛ kɛ amɛhe wo be-fɛɛ sɔɔmɔ nitsumɔ lɛ mli. Kɛfata weku nikasemɔ lɛ he lɛ, abaanyɛ atĩ shiɛmɔ wiemɔi amli aloo kpee lɛ mli wiemɔi amli atsɔɔ, ni abaanyɛ aná nitsumɔi kpakpai amli ŋɔɔmɔ kutuu.
7 Ani ‘ohe be’ kɛha Maŋtsɛyeli lɛ shiɛmɔ yɛ odaa otsi gbɛjianɔ ni oto lɛ mli? (Kol. 4:5) Wɔteŋ mɛi babaoo bɛ dekã kwraa, ni wɔyɛ weku kɛ asafoŋ gbɛnaa nii ni wɔbaatsu he nii. Kɛ wɔtooo gbɛjianɔ kpakpa koni wɔkɛ wɔhe awo shiɛmɔ kɛ nitsɔɔmɔ nitsumɔ mli daa otsi lɛ, ebaafee nɔ ni waaa kwraa akɛ nibii krokomɛi aaafee nɔ ni haŋ wɔná be kɛha nitsumɔ ni he hiaa nɛɛ. Mɔ ko ni yɔɔ shikpɔŋ agbo ni ekɛlɛ̀ɔ tsinai kɛɛ: “Aaafee afi 1944 lɛ, miyɔse akɛ gbɛ kome ni matsɔ nɔ mikɛ mihe awo shiɛmɔ nitsumɔ lɛ mli ji ni mato gbi pɔtɛɛ ko mama shi kɛha no. Kɛbashi ŋmɛnɛ gbi nɛɛ, miyaa nɔ lolo mikɛ gbi kome tsuɔ nii kɛha shiɛmɔyaa yɛ otsi lɛ mli.” Kristofonyo onukpa ko na akɛ gbɛjianɔtoo kpakpa ni aaaná kɛha odaseyeli haa enáa kɛ hoo lɛ ŋmɛlɛtswai 15 daa nyɔŋ nɔ yɛ shiɛmɔ nitsumɔ lɛ mli. Kɛ eyɛ heloonaa nitsumɔ ko Hɔɔ lɛ, etoɔ he gbɛjianɔ yɛ leebi shiɛmɔ nitsumɔ lɛ sɛɛ. Kɛ hoo lɛ, ani okɛ oweku lɛ baanyɛ ato gbi kome nyɛma shi otsi fɛɛ otsi kɛha shiɛmɔ nitsumɔ lɛ, ní nyɛha enɛ afee nyɛmumɔŋ shihilɛ gbɛ?—Fil. 3:16.
8 Pɛimɔ Oshihilɛ Mli Daa Gbi Gbɛjianɔtoo lɛ Mli Okwɛ: Nibii komɛi yɛ ni teɔ shi ewoɔ wɔshihilɛi ni wɔtswaa wɔmaa Yehowa sɔɔmɔ nɔ lɛ. Shihilɛ mli nibii ni wɔkpaaa gbɛ lɛ baanyɛ afite wɔnikasemɔ, kpeei kɛ shiɛmɔyaa he gbɛjianɔ ni wɔto jogbaŋŋ lɛ. Ni wɔ-Henyɛlɔ, Satan baafee bɔ fɛɛ bɔ ni eeenyɛ koni ‘etsĩ wɔ gbɛ’ koni efite gbɛjianɔ ni wɔtoɔ lɛ kwraa. (1 Tes. 2:18; Efe. 6:12, 13) Kaaŋmɛ gbɛ ni gbɛtsii nii nɛɛ je onijiaŋ wui ni no ha oŋmɛɛ he. Feemɔ tsakemɔi fɛɛ ni he hiaa koni otsu oteokrase nitsumɔ he gbɛjianɔ ni oto lɛ he nii. Faishitswaa kɛ shifimɔ he miihia koni otsu nɔ ni he yɔɔ sɛɛnamɔ lɛɛlɛŋ lɛ he nii.
9 Esaaa akɛ wɔŋmɛɔ je lɛŋ nibii ni náa mɔ nɔ hewalɛ, kɛ hewalɛ fɔŋ ni wɔheloo ni yeee emuu lɛ náa yɛ wɔnɔ lɛ gbɛ, ní ekɛ nitsumɔi ni jeee mumɔŋ nibii, ní no baanyɛ ebɔi wɔbe fitemɔ babaoo kɛ wɔjwɛŋmɔ ni eeegbala kɛya nɔ kroko nɔ babaoo lɛ miiba wɔnɔ. Ehe miihia ni mɔ diɛŋtsɛ apɛi emli ekwɛ, yɛ be mli ni ekɛ sanebimɔi nɛɛ tsuɔ nii: ‘Fiofio lɛ, ani mishihilɛ gbɛ miifee nɔ ni eŋmɛɛɛ pɛpɛɛpɛ loo eetsɔ kɛmiiya nibii krokomɛi anɔ, taakɛ eji lɛ? Ani mije shishi miitswa mishihilɛ miima je nɛŋ nibii ni hoɔ eyaa lɛ anɔ? (1 Yoh. 2:15-17) Be enyiɛ miyeɔ yɛ nibii ni mitiuɔ sɛɛ, miishɛɛ gbɛfãa, kpɔiaŋgbɔlemɔ nifeemɔi, aloo hiɛtserɛjiemɔi krokomɛi amli—ní tɛlivishiŋ kwɛmɔ loo Internet lɛ mli kwɛmɔ fata he—kɛ́ mikɛto be ni miyeɔ yɛ mumɔŋ nitsumɔi ahe lɛ?’
10 Kɛ oyɔse akɛ oshihilɛ mli eyi obɔ babaoo diɛŋtsɛ kɛ nibii ni he ehiaaa kwraa be fɛɛ be lɛ, mɛni esa akɛ ofee? Taakɛ Paulo sɔle akɛ enyɛmimɛi lɛ ‘aye emuu,’ loo “aha amɛkpã gbee jogbaŋŋ” lɛ, mɛni hewɔ osɔleee obiii Yehowa dɛŋ yelikɛbuamɔ koni okɛ ojwɛŋmɔ ama esɔɔmɔ nitsumɔ lɛ nɔ shikome ekoŋŋ? (2 Kor. 13:9, 11, NW shishigbɛ niŋmaa) No sɛɛ lɛ tswaa ofai shi akɛ ooohi shi yɛ oyiŋkpɛɛ lɛ naa ni ofee tsakemɔi ni he hiaa. (1 Kor. 9:26, 27) Yehowa baaye ebua bo koni okaya ninejurɔ loo abɛku yɛ sɔɔmɔ ni osɔmɔɔ lɛ kɛfeɔ toiboo ohaa lɛ lɛ mli.—Okɛto Yesaia 30:20, 21 he.
11 Yaa nɔ Ofee Mɔ ni Bɛ Dekã yɛ Nyɔŋmɔ Sɔɔmɔ ni Miishɛɛ Yɔɔ Mli lɛ Mli: Gbɔmɛi akpekpei abɔ kɛ ekãa tiuɔ miishɛɛ sɛɛ, ni nɔ ni amɛnaa kɛkɛ ji akɛ, be mli ni wala shihilɛ bɛŋkɛɔ enaagbee lɛ, heloonaa nibii ni amɛkɛ ekãa taoɔ lɛ kɛ naanɔ miishɛɛ ko kwraa ebahako amɛ. Ebatsɔ “kɔɔyɔɔ hakumɔ.” (Jaj. 2:11) Gbɔmɛi ni hi shi yɛ Noa gbii lɛ amli, ní amɛheee amɛyeee akɛ jeŋ fɛɛ nu afua ko baaba lɛ ‘ahiɛ bɛ amɛhe nɔ,’ ni amɛkɛ amɛ daa gbi shihilɛi ma amɛ diɛŋtsɛ amɛ nibii ni amɛtiuɔ sɛɛ lɛ nɔ—niyeli, ninumɔ, kɛ gbalashihilɛ mlibotemɔ—kɛyashi beni nu afua lɛ “baloo amɛ fɛɛ kɛtee.” (Mat. 24:37-39) Toiboo kɛ hemɔkɛyeli shihilɛ ni wɔtswaa wɔmaa shi amrɔ nɛɛ lɛ ji shishijee kɛkɛ kɛha wala ni baahi shi kɛya naanɔ yɛ wɔ-Nyɔŋmɔ ni yɔɔ miishɛɛ lɛ sɔɔmɔ ni miishɛɛ yɔɔ mli lɛ mli!—1 Tim. 1:11; 6:19.