Kristo Gbele lɛ ní Akaiɔ yɛ Jeŋ Fɛɛ
1 Yehowa kɛ nikeenii babaoo eha wɔ. Awie enibii kpakpai kɛ suɔmɔ mlihilɛ ni abua fɛɛ naa lɛ he jogbaŋŋ akɛ, ‘enikeenii ni anyɛŋ átsɔɔ mli.’ Hɛɛ, ‘Nyɔŋmɔ duromɔ ní wɔsaaa’ lɛ yɛ naakpɛɛ aahu akɛ kɛ́ wɔɔtsɔɔ mli lɛ, etekeɔ wɔnyɛmɔ.—2 Kor. 9:14, 15.
2 Enikeenii ni Da Fe Fɛɛ: Ákɛ adesai a-Kpɔlɔ lɛ, Yesu Kristo ji nikeenii ni da fe fɛɛ. Beni Yehowa jieɔ suɔmɔ kpele ni eyɔɔ kɛha adesai aje lɛ kpo lɛ, ekɛ esuɔmɔ Bi koome lɛ ha. (Yoh. 3:16) Jɔɔmɔ ni tamɔ nɛkɛ ni esaaa wɔ, ní jɛ Nyɔŋmɔ ŋɔɔ lɛ biɔ ni aye he gbi jurɔ koni akai yɛ jeŋ fɛɛ. Mɛɛ be, ni yɛ mɛɛ gbɛ nɔ? Yɛ Soo, April 1, 1999 gbɛkɛnaashi mli lɛ, Kristofoi ni yɔɔ jeŋ fɛɛ lɛ baaye Nuntsɔ lɛ Gbɛkɛnaashi Niyenii lɛ he gbi jurɔ, ni amɛbaaye Kaimɔ ni da fe afɔlei fɛɛ lɛ he gbi jurɔ.—1 Kor. 11:20, 23-26.
3 “Beni wɔji eshafeelɔi lɛ beebe” ni Kristo bagbo eha wɔ, ni wɔbaanyɛ wɔjie hiɛsɔɔ ni wɔyɔɔ akɛ aŋkro lɛ kpo kɛtsɔ egbele lɛ Kaimɔ lɛ he gbi jurɔ ni wɔɔye, kɛ mɛi krokomɛi ní wɔɔfɔ̃ amɛ nine koni amɛkɛ wɔ ahi nifeemɔ ni he hiaa fe nɔ fɛɛ nɔ lɛ shishi lɛ nɔ.—Rom. 5:8.
4 Nifeemɔ ni He Hiaa Fe Fɛɛ: Klɛŋklɛŋ lɛ, Kristo gbele lɛ gbijurɔyeli lɛ maa nɔ mi akɛ, éwo Nyɔŋmɔ jeŋ muu fɛɛ maŋtsɛyeli lɛ nɔ yɛ emuuyeli mli. Ekaiɔ wɔ hu akɛ wɔbaanyɛ wɔná shidaamɔ kpakpa yɛ Yehowa hiɛ kɛtsɔ hemɔkɛyeli ni wɔɔná yɛ Yesu afɔleshaa lɛ mli, kɛkɛ lɛ, abaama yiwalaheremɔ nɔ mi aha wɔ. (Bɔf. 4:12) Eji anɔkwale akɛ, enɛ ji afi lɛ mli nifeemɔ ni he hiaa fe fɛɛ!
5 Wɔjieɔ suɔmɔ ni wɔyɔɔ kɛha wɔnanemɛi akpo beni wɔfɔ̃ɔ amɛ nine koni amɛkɛ wɔ abaye Nuntsɔ lɛ Gbɛkɛnaashi Niyenii lɛ. Kpɔmɔnɔ lɛ mli sɛɛnamɔi lɛ yɛ lolo kɛha mɛi akpekpei abɔ ni kaseɔ esɛɛnamɔi ni nɔ kwɔlɔ lɛ he nii lɛ. (Fil. 3:8) Mɛi ni jieɔ hemɔkɛyeli kpo yɛ Kristo afɔleshaa lɛ mli lɛ baanyɛ aná naanɔ wala he hiɛnɔkamɔ ni ma shi shiŋŋ.—Yoh. 17:3.
6 Kaimɔ be lɛ kɛ hegbɛi krɛdɛɛi haa wɔ koni wɔtsɔɔ hiɛsɔɔ ni wɔyɔɔ kɛha Nyɔŋmɔ duromɔ ni esaaa wɔ ni fa kɛteke nɔ lɛ. Be ni sa jogbaŋŋ ni akɛhe aaawo Nyɔŋmɔ Maŋtsɛyeli lɛ he sanekpakpa lɛ shiɛmɔ lɛ mli kɛ ekãa nɛ. Sɛɛnamɔ kpelei miimɛ mɛi fɛɛ ni kɛ sɔlemɔ susuɔ Yehowa yaka nikeenii ni anyɛɛɛ átsɔɔ mli lɛ, kɛ mɛi ni toɔ gbɛjianɔ koni amɛya afi nɛɛ Nuntsɔ lɛ Gbɛkɛnaashi Niyenii gbijurɔyeli lɛ shishi lɛ he!